ايه احساس اى حد فينا لو عرف انه بحساب الأطباء
ابنه عمره الإفتراضى حوالى 20 سنة
يعنى يفضل يكبر فى ابنه ويعلمه
ويشوفه بيكبر يوم بعد يوم
وفى الفترة ده بيروح المستشفى ممكن كل أسبوعين لنقل الدم
وفى الأخر ربنا يتولاه ويرحمه
عن الأطفال المصابين
بأنيميا حوض البحر الأبيض المتوسط نتحدث
أنا كنت أكيد أعرفها من قبل كده
بس مافهمتهاش صح إلا لما درستها فى الأطفال
وكانت المفائجة اه مش مفاجأة
ان حوالى ثمن سكان مصر حاملين لهذا المرض على جيناتهم
أنا قصدى ممكن يورثوه لأطفالهم
وطبعا فى بلدنا الحبيبة من المستحيل انك تعرف عدد المصابين الفعليين من الأطفال
وخاصة المصابين بالنوع الأخطر منها
Thalassemia Major
بس ممكن نتخيل العدد هيكون كام
وخاصة لو خطفت رجلك وروحت مستشفى أبو الريش وشوفت بنك الدم
أيوة الأطفال دول عايشين على نقل الدم
من كام يوم كده كنت بناقش حالة مريض مع الدكتور فى الروند
الولد كان اسمه كفاح
وفعلا هو بيكافح علشان يعيش
عنده 11 سنة وبيعانى من المرض ده
وطبعا بيتحجز فى المستشفى كل فترة علشان نقل الدم
الولد كان فى عينه نظرة حزن عميقة
وشايل الهم
الدكتور قاللى أصل فى واحدة ماتت
بقوله مين قالى واحدة من المصابين بنفس المرض ده
كانت فى تانية كلية
وتوفاها الله
وقاللى المرض دول عارفين بعض فلما حد فيهم بيموت
لازم الباقى هيكتئب
ويا ترى الدور الى جاى على مين
والله لولا فعلا ان المفروض ابقى قدام المريض مش زعلان عليه
والمفروض افرفش عنه
كنت بكيت فعلا صراحة أنا مسكت نفسى بالعافية
خصوصا بعد ما عرفت ان أخوه الصغير مصاب بنفس المرض
وهما الطفلين الوحيدين فى الإسرة
هتقولولى واحنا مالنا بده كله يا عمنا
الأول احنا ممكن نتكلم ازاى نحاول أن نتفادى ولادة أطفال مصابين بالمرض ده
عن طريق فحص الجينات قبل الزواج
وده طبعا فى مصر بيعتبروا الفحص قبل الزواج حاجة عيب ومايصحش
سيبنا من ده حاجة صعبة
احنا ممكن بس نواظب على التبرع بالدم
كام واحد فينا بيتبرع بالدم
قليل قوى
انتو عارفين يعنى ايه مريض زى ده يروح المستشفى ويقولوله معطلكش
مفيش دم
أصل الناس معندهاش دم
حاجة مثلا زى الفكسة اللى اسمها 57357
اه الفندق اللى بيقولو عليه مستشفى
بتاع علاج سرطان الأطفال
أيوة اللى نصبوا عليكوا فيه وخلوكوا اتبرعتو ليها
أنا بقول عليكو لأنى رفضت تماما أدفع فيها مليم
بقى نعمل أكبر مستشفى فى الشرق الأوسط علشان علاج مرض واحد
وغير كده كام طفل أصلا عنده سرطان
ومعهد الأورام كان قايم بالواجب وتمام التمام
وكمان المليارت اتصرفت على ايه تصميم المبانى
اه طبعا مش احنا عايزين نتفشخر بيها
ونقول عندنا مستشفى مفيش زيها
كل الموضوع ده معمول علشان فى حد من العيلة المالكة قصدى العيلة الحاكمة
عايز ياخد جايزة نوبل وهيموت يا عينى عليها
وكل شوية يعمل اى مشروع فكس ويسميه بإسمه
ان شاء الله ولا حتى هيطول جائزة موبل
كان هيحصل ايه ان المستشفى الضخمة ده اللى مش عارفين يملوها
واللى أنا عرفه ان المرتبات هناك ضخمة وهيا شغالة بالتبرعات فمتوقغ انها هتقفل وابقى أفكركم
تبقى بتاعت أمراض الأطفال كلها
مش مرض واحد
أو كانت تبقى أكبر بنك دم فى الشرق الأوسط
ويصرفوا عشر تمن الدعاية اللى صرفوها بس
علشان الناس تتبرع بالدم مش بفلوس
المهم احنا اللى ممكن نعمله
اننا نتبرع بالدم بصفة منتظمة
كل أربع شهور مثلا
وده ليه ثواب كبير
ومحدش يقول هو أنا عارف الدم ده هيروح فين دول هيبعوه
مالكش دعوة اعمل الخيرة بنية الخير وربنا يتكفل بالباقى
تذكر قوله تعالى
ومن أحياها فكأنما أحيا الناس جميعا
اقرا الأيه تانى وافهم معناها
فكأنما أحيا الناس جميعا
لو بس شاركت فى حاجة بسيطة زى ده
شوف الثواب قد ايه
أكبر من أن يتخيله بشر
مش عايزين نبقى احنا كمان معندناش دم
*************
تبقى راكب فى مواصلة من المواصلات العامة بتاعتنا
وتلاقى واحدة كبيرة تركب المواصلة
والشباب قاعدين ولا هما هنا
أنا بصراحة بقف وأقعدها
لمن بيكون غيرها كتير واقف
تقول لواحد قوم وقعدها ده قد والدتك
ينظر اليك شذرا ويقولك كلام من عينة
اركن انت كده على جنب
وخدلك شاى خفيف على ما اخلص الرغيف
واقعد جنب الحيط على ما اشغل الشريط
الكلام ده برضه موجه للبنات مش الأولاد بس
مش عايزين نبقى زى الناس ده
اللى معندهمش دم
ويبقى عندنا شوية من الأحمر
*************
نفسى أعرف البنات اللى فى الشوارع دول مالهومش أهل
بعنى أبوها عرف هى بتلبس ايه
وشايفها وهيا نازلة ولا مش عارف
ان كان لا يعرف فتلك مصيبة
وإن كان يعرف فالمصيبة أعظم
بقى بالذمة ده عنده دم أصلا
لو اتعور هينزل ميه مش دم
ده غير البهبهات والمهمهات اللى بيقولو على بناتهم محجبات
يا جماعة الحجاب مش طرحة والسلام
ومش لبس وبس والسلام
الحجاب أدب و دين وأخلاق
نخلى بقى عندنا شوية من اسمه
ونربى بناتنا صح
وصبح صبح
51 comments:
الـ 3 مواضيع متعلقين بالدم
الاول :
شفا الله هؤلاء الاطفال
الثانى :
ده موضوع اخلاق الشباب و البنات بتربو عليها
زى خلق الرحمه و احترام الكبير و للأسف قل جدا فى مجتمعنا فى الوقت ده
الثالث:
ربنا يهدى البنات و يكرمهم بالحجاب الشرعى
و ده واجب عملى لأى بنت مش عجبها حجاب البنات دى لما تشوف بنت كده
تقف و تكلمها مكسوفه تكلمها ممكن اوى يبقى معاها مطويات فيها شروط الحجاب و تديها للبنت و تمشى و محدش يقول يعنى هما مش عارفين فى بنات فعلا مش عارفه و لو مش جابت آثر دلوقتى إن شاء الله تجيب أثر فى اى وقت تانى المهم نعمل احنا اللى علينا
وطبعا لا ننسى الدعاء لهم
اللهم آرنا آيه فى هداية بنات و شباب هذه الامه
السلام عليكم
بوست رائع
بالنسبه للدم فعلا لازم نتبرع فعلا بالدم كلنا ودي حاجه سهله جدا وفي ايدينا كلنا ولازم الأطفال دول ميروحوش ضحيه الجهل والثقافه اللي شعب عايشها
موضوع الأتوبيس ((لقد أسمعت إن ناديت حيا..ولكن لا حياة لمن تنادي))ن
بالنسبه للحجاب((كيف يتم يوما للبنيان تمامه..إذا كنت تبني وغيرك يهدم))ن
فعلا الأول البنت اللي مش محجبه غرقانه في موضات أحدث التسريحات واللي اتحجبت غرقوها هي كمان في موضات الاشربات ولا حول ولا قوة الا بالله
ده حتى برامج الأزياء أصبح بها فقرات للمحجبات
بوست رائع تحياتي
سلام
مؤثر جدا
انا عندى مشكلة ان ضغطى واطى علطول
ف كل ما اروح اتبرع يقولولى مش هينفع
بالنسبة لمستشفى السرطان
فانا شايفة انه غلط انها مش لكل امراض الاطفال
بس نص العمى
يعنى ان شاء الله فعلا تكون قد الامل اللى الناس حطااها عليها
بس كدة مش فاكرة ايه تانى
:)
السلام عليكم
ايه دا رابع كومنت دا لو حسبنا الكومنت المحذوف يبقى كدا تقدم كبير اوى
بجد الموضوع مؤثر خالص
ومن الحاجات اللى انت اشرت لها وياريت يتم تقنينها حكاية التحليل قبل الجواز لانى قريت مرة فى صفحة الحوادث ان فى واخده بعد شهرين جواز اكتشفت انه مصاب بمرض الايدز يعنى الموضوع حماية لكل الفردين من بلاوى كتير ممكن تحصلهم وبصراحة مابقاش حد ضامن حد الزمن دا
فياريت الموضوع دا يتم تقنينه
وبالنسبة لموضوع التبرع بالدم
انا بشوف عربيات كتير بيلموا دم بس بصراحة عمرى ما فكرت انى اتبرع على اساس انى عندى انيميا
فهل ينفع انى اتبرع لهم وبعدين اخد اى حاجه تعوض اللى فقدته عشان بجد بعد كلامك حسيت بمعاناة المرضى دول
وبالنسبة للمواصلات
اركب المترو كدا شوف نظرات الترقب اللى فى عين اى حد واقف لاى حد هيقوم تحس ان فى هجوم هيحصل ومش مهم حد كبير او مريض يقعد
سلاموز
اولا مواضيعك تحفة ثانيا بما انك دكتور يعنى هو ينفع اتبرع بدمى حتى لو جتلى صفراء وانا صغيرة؟؟؟؟ اصلى كل ما اروح يقولوا لى ما ينفعش وبعدين مؤخرا بيقولوا ينفع فانا مش عارفة ايه الصح بصراحة
انا لسة من خمس دقايق بس جالى ميل بيطلب التبرع بالدم لمستشفى سرطان الاطفال الجديد
ولسه يقول لجوزى ما تيجى نتبرع بالدم
قالى لأ
ليه يا بنى
وانتى ايش ضمنك ان السرنجة اللى هاتدخل جسمك مش ملوثتة انتى ما بتسمعيش عن موضوع تلوث القرب بتاعة التبرع بالدم ؟؟ يعنى اروح اتبرع من هنا وبعد شوية الاقى نفسى عندى فيرو سي ولا اى مصيبة
انا مش هاتبرع
اتبرعى انتى .. انتى حرة
بما انك طبيب ياريت تصلح لى المعلومة دى لان انا كمان قلقانة
انا عندى عيالعايزة اربيهم وانا بصحتى اجو الافادة منك يا دكتور
يا فانكى الموضوع الأول أحييك عليه و احب أقولك إن نوران الشاملى صاحبة مدونة بت خيخة و أى كلام و دا اللينك بتاعها
http://nouranelshamly.blogspot.com/
مهتمة بالموضوع دا و عملت أول زيارة للمصل و اللقاح فى أول أبريل
و بتدعو لتجمع اكتر و أكتر فى راس مدونتها من فوق و إن شاء الله كلنا هنشجع الفكرة فى مدوناتنا عشان العدد يكتر
جزاك الله كل خير على دعوتك أنت كمان
أما موضوع البنات المحجبات و لبسهم فرأيى يمكن ميعجبكش خالص
بس أنا رأيى هيكون متحيز لأنى محجبة حجاب بهدف الإحتشام لا اكثر لأنى شايفة أن الهدف هو الأحترام فى الشكل و عدم الأغواء لأن الشعر بيغير الشكل كتير
طبعا أنا مش مع اللبس المحزء و لا الشفاف لكن برضو مش مع التزمت و التقييد
ربنا بيحكم علينا من أعمالنا مش من صورنا و أتمنى نحكم على بعض بتصرفاتنا بس لأن ساعات كتير بيتقى بنت مش محجبة و كويسة جدا و ملتزمة فى سلوكها و بنت تانية محجبة و سلوكها منفر لا علاقة له بالدين فى شىء
الدين سلوك اولا و اخيراً
و برضو أرجع و أقولك البس بحدود مش محزء و لا مكشوف
تحياتى يا دكتور
دانا ارمي السلام ونص وتلت تربع ايه يا بني الروعة دي
والاروع ف اسلوبك اني بجد حاسس ان انا اللي بكتب بجد انا شايف تشابه كبير اوي بينا واتمني تعدي عليا
خالص تقديري
al salamo 3alaykom
awalan ba7ayeek 3la tar7ak ll
mawdoo3 da la2enno fe3lan mohem geddan
belnesba l mawdoo3 al tabaro3 bel dam ana 3amalt ta72ee2 3an nesbet el motabare3een bel dam fy masr mokaranatan b nesbet el me7tageen ll dam w tab3an la2eet mahazel, el nas mesh adra tefham ennaha b keda hatfeed w hatestafeed sawa2 k sadaka garya aw 7atta se7eyan ya ret bgad mn 5elal your post te3mel da3wa ll tabaro3 bel dam w na5odha bneyet allah fi 3awn el 3abd ma dam al 3abd fi 3awn a5eeh 3la fekra ana gmma3t so7aby w ray7een 2day isa netbara3 kollena f gzak allah 5ayran 3la ennak fakartena
ama belnesba l mawdoo3 el otobees f 5alas maba2ash fi ay 7asasa wala zo2 wala 2eethar tab3an el 7agat di ba2et 3omla nadra
w a5eeran mawdoo3 el hijab mesh ha2ool 3'er "ennak la tahdi man a7babt......"
بناء على نصيحتك ( روحي يا شيخة و ارجعي بسرعة )
انا جيت
و الله أحزنتني جداً على الأطفال الصغار دول
حاجة مؤلمة جدا جدا
كمان تعلم الاحتياج في السن المبكرة دة بيكسر الواح من جواه جداً بيحس بضعفه و انه مش زي باقي الاطفال و انه و انه و انه ....
غير حالات الاكتئاب اللي بتمر بيهم لما يعرفوا ان حد منهم مات
التبرع بالدم له شروط معينة بس الحاجة اللي تغيظك ان دايما اللي ماينفعش يتبرعوا بيبقوا عاوزين ينبرعوا
و اللي لازم يتبرعوا بيبقوا مسقعين ودانهم - ايه دة انا بقول لفظ روش اعوذ بالله -
لأن الوصف الصح فعلا انهم بيبقوا مسقعين ودانهم و يا عم سيبك
و صبح صبح ..
السلام عليكم
عوزة اقول حاجة بس خايفة تزعل بس هقول وامرى لله.ما شاء الله كل كلامك صح ولك وجهة نظر محترمة جدا جدا بس ليه معظم شبابنا بالرغم من وعيه ونضجه بيضيع ده فى كلام زى "صبح صبح ياعم الحج" والكلام اللى من نفس النوع على فكرة اول ما قرأت الكلمة دى عندك قلت انى هقرأ اى كلام فى المدونة دى لكن بجد حرام تعطى الفكرة دى عنك وانت لك عقل ناضج وفكر محترم كدة.
بالنسبة بأة لمستشفى الأطفال احنا عندنا الجماعة اياهم بيتفننوا فى السرقة بكل اشكالها سرقة فلوس سرقة منصب سرقة جائزة المهم يسرقوا.
اما بالنسبة للشباب اللى فى المواصلات العامة فهتلاقى الفئة اللى بتعمل كدة هى هياها الفئة اللى بتخرج لبسة حاجات غريبة بتسميها هدوم او هما هماهم اللى بيسيبوا بناتهم وازواجهم يمشوا بالشكل اللى انت عارفه لأن الفساد لما بيكون فى جزء بيصيب الكل
كل مره اعلقلك اقول بوست راااائع
بس اعمل ايه؟!!!ماهو فعلا راااائع
3مواضيع لهم علاقه بالدم المعدوم
والثلاثه اجمل من بعض
.....تحياااااتي
.......دمت متميزا
يا نهار ابيض كل ده شايله جواك طيب والله لك حق فى كل كلمه دى ناس الدم انعدم من عندها امانه عليك لما يحتاجوا نقل دم فى المستشفيات اكتب على مدونتك وانا اجى والم ناس ونتبرع بجد للاطفال
محمود،، انت بتتكلم صح على موضوع مستشفى سرطان لأطفال،، هي كانت المفروض طالما بالكبر ده كله كانوا عملوها مستشفى اطفال وخلاص
وبالنسبة ملموضوع الدم البارد اللي بأه فينا فدي عندك حق فيها مليون في المية
بشوف اعراضه في المواصلات والمحلات والشوارع الدم واقف واقف عن الحركة والاحساس مشلول
اما الامهات والابهات فحسبي الله ونعم الوكيل تقولهم بناتكو خدوا بالكو يقولوا لو ما عاشوش دلوقتي هيعيشوا امتى ؟ ولما تقول طب افرضوا ماتوا صغيرين يسكتوا
قمة التناقض
ربنا يهون علينا
ما تفقدش الامل ان شاء الله مسيرنا نتغير ونفوق قول يا رب
قول !!
مها ميهوووو
السلام عليكم
طيب والله كويس انى لقيت حد يعرف انيميا البحر المتوسط
ياريت تجاوبنى على سؤالى
كنت عايزة اعرف اعراضها ايه
عندنا طفل فى العيله هو رفيع من يوم ما اتولد ومابيتخنش
بس اللى ملاحظينه ان بطنه كبيره قوى ما تتناسبش مع جسمه خالص
ومامته بتشك انه عنده الانيميا دى
فهل شكها ده فعلا صح ؟
هستنى الرد ضرورى يا دكتور
موضوع فعلا مهم جدا
انا كمان اعرف ان التبرع بالدم صحى
يعنى لازم يكون فى شويه دم
موضوع المواصلات ده حاجه بقت غريبه جدا
اما موضوع الحجاب فانا شايفه انهم بيسئوا للحجاب اكتر منه اى حاجه تانيه بالشكل ده
تحياتى وتقديرى لك
موضوع فعلا مفيد
انا عندي قريبة لي عندها المرض بس مش النوع الخطير الل بيموت ده بس قالوا انه ممكن يقلب اي وقت
بس مكنتش اعرف انه محتاجين نقل دم
بجد اشكرك علي الموضوع واعتقد اني من هنا ورايح هتبرع بالدم بشكل منتظم
شفاهم الله وعافاهم
اما بالنسبة للموضوعات التانية
هي صحيح مرتبطة بالدم برده
بس تفرق كتير
تحياتي
السلام عليكم
كل ده شايله في قلبك وساكت
ربنا يقويك
انا فعلا نفسي جدآ اتبرع بالدم بس بخاف جدآ من الحقن مش بخاف لا بترعب
بس والله باذن الله ربنا يكرمني واتغلب على ده واروح لان فعلا الواحد قلبه بيتقطع على منظر الاطفال
جزاك الله خيرآ
اما موضوع المواصلات والله فعلا لو كل واحد فينا افتكر ان اللي واقف او اللي واقفه هما والده او والدته اكيد هيقوم من غير كلام وربنا يهدي الجميع
اما موضوع البنات انا رأيي انها تقلع الحجاب اكرم لانه بيبقى زي قلته
وربنا يهدي الشباب كلهم
بجد الموضوع مميز ربنا يوفقك
والله أبكتنى يا دكتور أكيد هيمر علينا الحاجات دى مش عارف هستحمل ولا لأ بس والله كلامك مضبوط احنا معندناش حاجه اسمها فحص ولا نيله
مصطفى
أم حبيبة:
أولا: دعواتك بالشفاء مش كفايه لازم ناخد بالأسباب وللا ايه
ثانيا: عندك حق فعلا نحاول بقى نربى عيالنا
ثالثا:حلوة الفكرة ده قوى
ربما يكرمك ونبدأ نعممها وتبقى حاجة كويسة
يا رب يهديهم ويهدى أهلهم ويخلو عندهم شوية من الأحمر
dr.m:
وعليكم السلام
منورنا
اه ما احنا بنقول انه حاجة ببلاش كده وثوابها كبير
اه فعلا موضوع الأتوبيس حاجة زى ما تكون بتأذن فى مالطة
اه الموضة لحست مخهم وبيجروا وراها ويقلدوا بعض تمشى فى الشوارع تلاقى معظم البنات لابسين أخضر وأصفر أصله الموضة بقى حاجة تقرف
تعليقك هو اللى رائع يا باشا.
شكرا فعلا
break:
ايه أخبار الأكازة
أما موضوع ضغطك الواطى فلبقى روحى لدكتور يظبطهولك وبلاش اسلوب التهرب ده :D
ومستشفى السرطان أنا بقولك ولا ليها لازمة وابقى قولى الحاج فانكى قال
حلوة مش فاكرة ايه تانى ههههههههه
شكرا على الزيارة
Don't press F1:
أكيد هدووس عليه زى ما انا عايز الكى بورد بتاعى وأنا حر :P
الناس فى مصر معتبرة الفحص قبل الزواج ضعف هما عايزين يخلوا الجواز بطيخة بجد
كل واحد يتجوز التانى حتى بعيوبه المرضية
ماتتبرعيش وانتى عندك أنيميا لأن انتى كده اللى هتحتاجى نقل دم :D
أما موضوع المواصلات ده فده بقى مشكلة ملخاش حل الظاهر وربنا يستر
وشكرا على الزيارة
سلاموز
enjy:
ايه الأخبارات
شكرا على الكلام ده
أما موضوع الصفرا فهى ممكن تكون فسيولوجية ومفيش منها أى مشكلة
عموما هما هيقسوا الهيموجلوبين ويشوفوا ينفع ولا لأ
جربى كده وروحى للمعهد القومى لنقل الدم هما أدرى الناس بالموضوع ده
بس مانكسليش اتفقنا :)
سبهللة على الأخر:
الكلام ده سبهللة :D
أصلك ماتضمنيش أى حاجة بالطريقة ده ما ننزلش من البيت لحسن ما اضمنش ان عربية تخبطنى
بس الأكيد ان الحاجات ده معقمة كويس جدا
وأصلا حتى لو القربة فيها فيروس سى لا قدر الله فهو هيتنقل للمريض مش المتبرع:(
توكلى على الله
بس اتبرعى فى مكان محترم زى المركز القومى لنقل الدم
وربنا هيباركلك فى عيالك ان شاء الله
نورتينا
اول زيارة ليا لمدونة حضرتك
المدونة بجد رااائعة و البوست اروع
و الاغنية بتاعة يهدي الأرواح فعلا من احلي الاغاني اللي سمعتها
نيجي بقي لل 3 مواضيع اللي حضرتك اتكلمت عنهم
بالنسبة للتبرع بالدم
هو لو كان خوف الناس من التبرع ان الدم ميوصلش او يتباع ففي دار رسالة و كلنا طبعا عارفين رسالة و واثقين فيهم و متأكدين انهم هيوصلوا الدم ده بجد
هما عاملين اول خميس من كل شهر تبرع بالدم و مخصصين التبرعات اللي بتجيلهم دي لأطفال انيميا البحر المتوسط
و هما مش بياخدوا تبرعات من اي حد لازم يتأكدوا الاول من فصيلة دمه و ووزنه و انه معندوش اي امراض او اي حاجة تمنع من التبرع
يعني الموضوع ان شاء الله يكون مضمون جدااا و محدش يقلق منه
تاني موضوع
الأخلاق هو علي اد ما في ناس فعلا معندهاش دم بجد
في بردو ناس تانية بتبقي كويسة جدااا يعني ساعات بحس اننا في زمن فيه من كل حاجة الحلو اد الوحش و الطيبة اد الشر
مصر مش حرمانا من حاجة يعني و لله الحمد
اخر موضوع بقي و اللي بينرفزني جداااااااااا
ان ناس كتير مفكرين الحجاب هو مجرد طرحة نغطي بيها شعرنا و خلاص
ربنا يهدينا جميعااااا
و بجد البوست اكتر من رااائع و المدونة عجبتني جدااا
تحياتي لك
تسلم فى كل ماكتبت
السلام عليكم
اولا بخصوص موضوع التبرع بالدم
الواحد لما بيسمع عن الاطفال المرضي بيحزن فعلا ,
و المفروض كل واحد عنده المقدرة ميستناش لما حد يقوله اتبرع,
مستشفي سرطان الأطفال خطوة كويسة و بتساعد ناس
انما مبالغ في تكاليفها اووي
كان ممكن بالمصاريف اللي صرفوها علي التصميم و المباني يجيبوا معدات و أدوية للأطفال أفيد !!
-------------------------
بالنسبة لموضوع المواصلات
المسألة مسأله مبادئ
يعني اللي اتعود يفكر في نفسه بس عمره ما هيغير ده لأي سبب
و للأسف اللي من النوع ده كتير
------------------------------
اما الموضوع التالت بقي
فده اللي لا تعليق فعلا
ربنا يرحمنا برحمته
و بجد يهدي شباب المسلمين !!
موضوع 3 X 1 , بس في الجووون :)
بجد ما شاء الله البلوج رائع جدا وانا كنت ناوية اقرأ اول بوست
وفجأه لقيتني في أخر بوست وبجد محستش بالوقت ونفسي اعلق على كل موضوع من موضوعات المدونة بس هبدأ بالموضوع ده
موضوع التبرع بالدم ده عامل مشكله معايا اول حاجه لأن للأسف عندي فوبيا الدم ومع ذلك بحاول برضه اضغط على نفسي واحاول اتبرع بالدم بس كل مره بتيجي عربية التبرع بالدم (الاسعاف) الدكاتره مبيرضوش يطلعونا من المحاضره وبعدهاالعربية بتمشي وكمان لما بفكر اروح مستشفى بكون موسوسة جدا طب يا ترى مش ممكن تكون في امراض في الحقن والادوات بتاعتهم وتتنقل ليا او تتنقل لكيس الدم وبعدها المريض
وعن موضوع المواصلات الحمد لله لما بلاقي حد كبير في السن بقوم علشان يقعد وكمان مش بسلم من تعليقات الناس حد يعمل كده حد يقوم من مكانه ايه الهبل ده وحاجات كده
انا جيت
ربنا يشفى كل مريض
وانا بقترح اننا نعمل حمله فى كل المدونات للتبرع..
انا شخصيا صحتى مش اد كده ودايما عندى انيميا..بس جوزى الله يكرمه قصيلته oفكل ما يحتاجوا دم هم بيطلبوه وعمره ما بيتأخر ربنا يجازيه خير..
اما عن اللبس ف الرساله للصبيان والبنات
المؤخره عوره ولازم تستخبى...
ربنا يسترك دنيا وآخره
لازم نرمي السلام طبعا
ولما نيجي لازم نعلق ولو حتي بالتحية
هو موضوع الدم ده فعلا شئ حياة او موت ويا ريت ننشئ ثقافة التبرع بالدم - وغيره - ونمد الناس بالمعلومات الطبية من عينة ان كرات الدم تتجدد كل تسعين يوم وهكذا
اما عن موضوع مستشفي سرطان الاطفال فهي مسخرة تضاف للمساخر التي تعلي ضغطنا ولا ندري كيف تحمل ويتحمل هؤلاء البشر ان يجري كل هذا من تحت انوفهم
اما عن موضوع الاتوبيس والبنات فربنا يهدي ولا ازيد
تحياتي لك والا بوركت افكارك
شكلك محمل ومعبء بكل ضغووط الحياة
ارحم نفسك يا صاحبي مش كدا العمر مش بعزقة
.
.
انت اتكلمت في كذا موضوع كل واحد فيهم مصيبة لوحدة
.
.
للامانة اول مرة اسمع حد يتكلم عن مستشفي السرطان بالشكل دا وجهة نظر مختلفة تماما عما كان يطرح امامي
ولكن جديرة بالاحترام
.
.
تحياتي ليك يا دكتور
والسلام
بجد ثلاث مواضيع قيمة جدا ودعوة جميلة لإنقاذ هؤلاء المرضى اللى الموت بيخطف كل يوم واحد فيهم
بوست جميل جدا يا محمود
ايه يا ابنى حرقة الدم اللى انت فيها روح كده قيس الضغط هتلاقى انه عاااالى و مينفعش تتبرع :)
كلامك تمام فى ال3 مواضيع
موضوع مستشفى السرطان اقولك هششششش احنا ما صدقنا ان هم عملوا حاجة كده فشخرة مش فشخرة المهم ان فيها ناس بتتعالج فعلا
و ان كنت معاك انها كانت هتبقى انجح الف مرة لو عملوها لامراض الاطفال كلها
بس الواحد خايفف يتلككوا و يقولوا طب لا ده و لا ده
موضوع الاتوبيس ده بقة بيشلنى جدا بس ليا تعليق كان المفروض تضيف الانسات على الناس اللى سنها كبير :) او تقدر تضيف الستة بتوع صيدلة
حاكم احنا مفقوعين اوى اوى من الولاد اللى بيركبوا العربيات حتى لو كانت اخر مواصلة و يسيبونا نتشحطط قطر او موقف
ثالثا : موضوع المحجبات اللى هم كاسيات عاريات دول
الله يديهم هم و اهاليهم
و الله لما بيشوفهم بيقول الله يكون فى عون الشباب اذا كان احنا ياللى بنات زيهم لازم نعلق عليهم و بيلفتوا نظرنا من وسط الف بنت امال الشباب يعملوا ايه
و فى الاخر يقولوا الشباب دول كخ ياى بيعاكسونى يا بابى- و هى طبعا فى سرها بتقول هيييييييييه- يقوللها اهاليهم مربوهمش يا حبيبتى- و واحد زى ده طبعا بيشوفها كده و ميعلقش اكيد بيقول فى سره - كبرتى يا بت و بقيتى تتعاكسى يللا خلينا نجوزك و نخلص -
و بعد الاطالة الفظيعة ده اعتقد انك هتعملى بلوك من البلوج
بوست اجتماعى رااااااااااااااائع
فاتيما:
أهلاااااااااااااان منورانا والله
اه طبعا عارف الخيخة وهل يخفى القمر طب كويس أنا هابقى ان شاء الله أحاول أنشر الموضوع ده
أما موضوع الحجاب فأنا مش شايف أى خلاف بالعكس أنا بقول الحجاب مش لبس بس وده اللى أنا قاصده أنا مقولتش نلبس نقاب بس برضه نبقى محترمين مش محزء ولا مكشوف زى ما بتقولى :D
وما تنسيش تسلميلى على يوسف
شرفتينى بالزيارة :)
amgad:
مشرفنى
طب الحمد لله ان الكلام عجبك
وان شاء الله هعدى عليك طبعا:)
Dooooody:
eh el a5bar ya rab tkoony in agood
health
thank u for ur visit amd comment
ah 3andek 7a2 be el nesba le mawdoo3 eltabaro3 fe3lan mesh fahem leeh el nas mesh moktani3a b el kalam
7elw 2awy el ba7th elly enty 3amalteeh dh o7aieeky 3ala el fekra dh
tab kwais kedh ana a5adt thwab we ana fe betna
:)
isa ha3mel da3wa kebeera bas lama yeb2a 3andy wa2t isa
ama el otobis ba2a
f mafeesh a5la2 delwa2ty fe3lan
rabina yostor
we el 7egab enty 2olty feeh el 5olasa
el comment bta3ek a7san men el post
thanks again
realy thanx
قهوة بالفانيليا - شيماء على:
طب حمدا الله على السلامة
فين بقا اللاتيه بتاعى :d
اه مؤلمة بس اللى عنده احساس أصلا أنا اتعقدت من كلامك أصلا :D
حلو موضوع مسقعين ودانهم على أساس انهم حاطيين ودانهم فى تلاجة مثلا ولا فى ديب فريزر :D
أيوة أنا لاحظت كده فعلا سبحان الله
وصبح صبح
مجرد خواطر:
أزعل من ايه أبدا
هو المقصود اسم معبر ويوصل المعنى ويجذب معظم الناس
بس برضه وجهة نظرك تحترم بس شوفتى الإسم طلع خدعة :D
اه المستشفى ده فيها نهب للصبح ربنا يستر
حلو الربط بين الإتنين ده عندك حق الأخلاق لا تتجزأ
تحياتى
:)
Ghada & Rofid :
متشكر جدا على التعليق والكلام الجميل ده
شكرا على المرور
جزاك الله خيرا
appy:
اه حاجات كتير معلش بقى
اه ان شاء الله نبقى نحاول نتفق على يوم علشان نتبرع كلنا ان شاء الله
شكرا على التطوع ده
أحسن تستاهل:
طب كويس حد بقا يقولهم الكلام ده
علشان قاعدين يضحكوا على الشعب المسكين
معدش فيه مروة ولا حمشنة ولا شهمنة ن بتوع زمان
أما الموضوعين التانسسن فأنا بضم صوتى لسوتك و أقول يا رب
fatma:
أولا أهلا بيكى
على فكرة كل دكاترة الأطفال عارفيين الأنيميا ده
يعنى انتو ازاى ساكتيين لحد دلوقتى على الطفل ده لازم تروح لدكتور فى أقرب وقت
الأعراض ده أيوة ممكن تكون الأنيميا ده وممكن تكون حاجة تانية بس ضرورى تروح لطبيب أطفال
وأنا بقى اللى مستنى انك تطمنينى.
رحيل:
اه هو حاجة كويسة وتنشيط لنخاع العظم
بس يا ريت الناس تواظب عليه حتى علشان الثواب
أما المواصلات فده هتظل كده والله أعلم ربنا يستر
أه فعلا بعض المحجبات أشاءوا للإسلام والمحجبات عموما
ربنا يهديهم
Kochia:
طب ربما يشفيها ان شاء الله
واه اتبرعى بالدم مش عايزين الدلع ده وحاولى تنتظمى
اه الباقى ليه علاقة بالدم بس فعلا فيه فرق كبييييير
:D
Bota:
يا رب قوينى
وتخافى ليه من الحقن أنا برضه بهاف منها بس هيا بجد ما بتوجعش أصلا
ما ده اللى أنا بقوله قولى معايا انت كمان
الحجاب ده بقى دعواتك ربنا يهديهم
شكرا على الزيارة
egy boy
ده انت يا ما هتشوف
شرفتنى بالزيارة
esraa hamed:
شرفتيتى بالزيارة و ياريت ما تحرمنيش منها
أه نشيد فعلا حلو والله أهداه الى صديقى صاحب مدونة قلب أبيض ربنا يكرمه ان شاء الله
بس ايه حضرتك ده أنا لسه عندى 22 سنة يعنى مش بابا جدو :D
بالنسبة لرسالة فأنا ماكنتش عارف المعلومة ده وشكرا فعلا عليها أنا كنت عارف ان فيه تبرع بالدم بس مش عارف انه مخصص لحاجة معينة
طبيعى ان الفحوصات تتعمل مش أى حد هناخد منه دم يعنى
اه فعلا مصر مش حرمانة من حاجة :D
أما موضوع الطرحة فانتى قلتى المفيد
شكرا على الزيارة والمرور
موناليزا:
الله يسلم ايديكى :)
Bongo:
وعليكم السلام
اه فعلا الأطفال مساكين عايزين تبرع بالدم واحنا ولا هنا
اه ده المبالغ ده تعمل عشر مستشفيات أصلا
أه فعلا النوع ده كتيييير ملا البلد ربنا يتوب علينا منه
ربنا يهديهم يا رب
وشكرا على المرور
lady e:
تشرفت أكيد بالزيارة ده
معلش بقا أصل البلوج بتاعتى رافعة شعار مش هتقدر تغمض عينيك :D
ممم ربنا يعينك على موضوع الفوبيا ده
وعموما أأمن مكان المركز القومى لنقل الدم
طب والله برافو عليكى ربنا يكرمك وأكثر الله من أمثالك
Doda:
حمد الله على السلامة
اميين يا رب
ان شاء الله وربنا يباركلك فى جوزك يارب
ويكملك عافية ان شاء الله
اه فعلا أول مرة أركز فى الموضوع ده عندك حق المؤخرة عورة
حاجة تقرف
وشكرا جدا على الدعوة ده
تايه فى وسط البلد:
نورتنا وشكرا على التعليق
اه فعلا نحاول ننتظم
صدقت فى كلمة مسخرة ده عندك حق
هيا مسكرة على رأى عادل امام :D
أدم المصرى:
نورت البلوج أكيد
مععلش بقا هعمل ايه ربنا يستر علينا جميعا
اه المستشفى ده هتتفرجو عليها وهيا بقت خرابة
والا هيخلوها لعلاج الأطفال عموما
Kahramana:
الحمد لله ضغطى مظبوط:D
ههههه خايفة لحسن يتلككوا طب كويس
حلوة أضيف الأنسات ده معنديش مانع بص تدفعى كام :D
بصراحة لما بلاقى واحدة فى سنى واقفة أنا باقوم بس لما بحس انها مش محترمة أسلا بقسم معاها السكة :D
والمفروض يعنى يعملو للستة عربية مخصوص دول عالم معندهمش دم صحيح :P
بصراحة الموضوع التالت نسلم ايديك فى التعليق ده
هههه
حلوة أعمللك بلوك ده بس فكرة قوليلى بيتعمل ازاى :P
ونورتينى أكيد
Post a Comment