تناقلت وكلات الأنباء الطبية بالكلية
أنه سيتم عقد امتحان باطنة أعمال السنة للمجموعة المأسوف على شبابها
واللى أمهاتهم أكيد داعية عليهم وبهبهاتهم خلاص احتسبوهم فى عداد شهداء الطب
الإمتحان سينصب فى المستنفع قصدى فى المستشفى اللى فى باب الشعرية
وسط أعلى كثافة سكانية فى العالم
سينصب الجلاد نصبته يوم السبت القادم
تحت شعار
معانا مش هتقدر تحل سؤال
نياهاهاها نياهاهاها
الضحكة الشريرة ده تبع الشعار
المحرقة تحت رعاية واشراف
التنين خريبة اللى هيخربها
والدصنانور الركيب اللى هيدينا بالمراكيب
على فكرة ده اساميهم فعلا
عموما أنا واحد من المأسوف على شبابه وعنده امتحان مع الشباب دول
وقلت أقول الكملتين اللى مضايقينى من زمان عن الباطنة
لحسن أموت وهما لسه فى قلبى
الأول هتكلم يعنى ايه باطنة؟
ب: بهدلة
ا: انتحر أحسن لك
ط: طريق الأهوال
ن: ناس قرن اللى هما اساتذة الباطنة يعنى
ه: هتسقط هتسقط
بجد فيه ناس كتيير مش عارفيين يعنى ايه باطنة
وفاكرين ان الباطنة ده هيا البطن
احب اقولهم لا وألف لا
الباطنة ينطلق على كل ما هو باطن مش شايفينه
يعنى أمراض الصدر والقلب والعصبية
والنفسية والكلى و أمراض الدم
والغدد الصماء
وكله وكله أى حاجة باطنة لو فاضيين ممكن نقولهم يعنى
فكلمة دكتور باطنة ده صعبة قوى أصلا
المهم مش فاهم ازاى أصلا يبقى فيه حاجة اسمها دكتور باطنة
ده صاحب بالين كداب وصاحب تلاتة منافق
مابالكم بقى بصاحب اا أو 12
ده ربنا بيقول
ما جعل الله لرجل من قلبين فى جوفه
ده عايز يحط بتاع عشرة خمستاشر قلب
وعلى هذا من الصعب جدا بل قد يكون من المستحيل
ان فيه حد يحيط علما بكل الحاجات ده
وعلشان كده تلاقى حيتان ودصنانورات الباطنة اللى هما الأساتذة
فيهم حاجة مش مظبوطة كده وعاملين مفيش زيهم
وصباح الكبر اللى فى الأرض
مع انهم كلهم الا من رحم ربى ما يعرفوش الا تخصص واحد والباقى فيه بلاليص
مش الإنجليز بيقولو
Jack of all trades Master of non
كل واحد يذاكر تخصص وينسى الباقى
واحنا بقى المفروض نعرف كل حاجة
بالذمة مش حاجة تفرس وتفقع المرارة
تاني حاجة هتكلم عنها طبعا
كتب الباطنة
فيه كتب باطنة مصرية وده كتبها دصنانورات الباطنة فى الجامعات المختلفة
وده كتب عاملة زى ميكى ماوس كده
لا تطلع منها لا بحق ولا باطل
ومافيهاش شرح معمولة علشان تتحفظ أصلا
والغريب ان كل الكتب المصرية زى بعض
كلهم يمكن حتى بالكلمة
كلهم فيهم معلومات قديمة
مرصوصة بنفس الطريقة حتى مع اختلاف الناقل قصدى المؤلف
والأغرب بقى والأعجب ما فيش ولا كتاب يشبه أى كتاب من بتوع الخواجات
اللى هما أصلا عملوا الباطنة
بس هما عاملين كتب علشان تفهم مش تحفظ
الحاجة التالتة اللى هتكلم عنها
حاجة شوية متخصصة بس هحاول أوضحها
فيه حاجة عندنا فى الطب اسمها متلازمة
Syndrome
يعنى شوية أعراض كده تلاقيهم مع بعض فى عيان واحد
ويروح الدصنانور اللى شاف الأعراض ده
وفى معظم الأحيان ما يكونش عارف ليها سبب مسميها باسمه
وأكيد يعنى بيكون تنين أو دصنانور خواجة
تلاقى بقى أسامى عجيبة
Herferrodt's syndrom
و
Caplen's syndrom
وممكن تلاقى
Bedengan syndrom
حاجة تفقع فعلا
أى دصنانور يجيلوا حالة ( مريض يعنى) فيها تلات أو أربع خمس حاجات مش عارف يربطهم ببعض
يروح يقول عليها سيندروم ويسميها با سمه
يعنى مثلا نعكشة ممكن حد يجيلها وصباع رجله مدوحس ومتعور فى قفاه
وعنده دور برد ومناخيره كبيرة شوية وشعره منكوش
تروح مسمياها
Na3kasha el na3kosha's syndrom
نعكشة سيندروم
أو سنووايت تلاقى بنوتة حلوة ولابسة فستان حلو
وأكلت التفاحة وأغمن عليها ولقيت كمان ودن فيها حلق والتانية لأ
تروح مسمياها
Snowwhite's syndrom
وعلى هذا فقيس
والمشكلة ان معظم هذه السيندرومات محدش بيشوفها أصلا
والراجل اللى اكتشفها عملها من هنا واتمدد مات
ومحدش شافها تانى
بس هو بلانا بقى بيها فى الكتب
ولازم تحفظها صم والا الحيتان بتوع الباطنة يفرموك
يعنى ممكن تقول لأحد التماسيح دول ده العيان عنده كذا و كذا و كذا
اللى هما الأعراض والعلامات الطبية بتوع السيندروم
وانت يا عينى مش فاكر اسم السيندروم
يفضل يقولك ايه اسمه خلصنا والا ما فيش درجة وكائنه مناسب الدصنانور اللى عمل السيندروم
انتو عارفين ايه العجيب فى الموضوع
ان السيندرومات ده معظمه ملوش علاج
يعنى بنعالج كل عرض لوحده ايه بقى لازمة انى اسميها أصلا مش عارف
وتلاقى الدكتور بتاع الباطنة مضايق
ويقول يا خسارة الحالة ده كان فاضل لها ان صباع رجله الصغير يكون طويل 2 مم
والحالة كانت تبقى فسكونيا سيندروم
عايز أعرف العيان هيستفيد ايه لما يعرف ان اللى عنده ده فسكونيا سيندروم ولا بلا أزرف
هو أهم حاجة عنده انه يتعالج
ارحمنى يا رب
هتكلم كمان عن حاجة شوية متخصصة برضه
اسمها
Differential diagnosis
مش عرف قوى معناها بالعربى
بس هيا حاجة للتفربق بين الأمراض
وتحت العنوان ده فى أى مرض تلاقى فيه عشرين تلاتين مرض تانى يتاشبهوه معاه
حتى ولو فى عرض واحد
يفضلوا يحطو كلام مالوش لازمة
والدصنانورات لازم يسالوك فيها
يعنى الحالة قدامك واضحة ويتحلف عليها انها مرض كذا
لكن التمساح اللى بيسألك مالوش دعوة
لازم تقوله ايه الحاجات التى تتشابه مع المرض ده
يا باشا الحالة واضحة
أفضل أعقدها ليه
اى نعم فيه حالات بتحتاج كده بس المعظم لأ
وتلاقى الدصنانور ده حافظ الحاجات ده صم
وبرضه يغلط فى التشخيص عادى يعنى
انتو متصورين مثلا
سؤال زى
يا ابنى ايه الديفرينشيال دياجنوسيس بتاع الكحة ده يتجاوب ازاى
انت المفروض تقول أى حاجة على وجه الأرض تخلى الواحد يكح
من أول اللى بيدلع وبيستهبل لحد السرطانات
طب وفى الأخر أنا استفدت ايه مش عارف
العيان استفاد ايه برضه مش عارف
هذه هى قصة الباطنة يا ناس
أنا كده استريحت قولت اللى فى نفسى قبل ما اموت
**************
المهم الإمتحان اللى جاى ده
دعواتكم معايا
الإمتحان فى الباطنة كلها
ربنا يستر
هيبقى جزء اسئلة اختار من متعدد
وده الإختيارات فيه مابيبقاش ليها علاقة بالسؤال
ده لو السؤال مكتوب صح أصلا
يعنى لو عرفت تحل نصه يبقى انت من الأوائل أكيد
والجزء التانى بقى العملى
وده منك للدصنانور علطول
وهيفرمك هيفرمك
يعنى لو واحد زى خريبة - عاشت الأسامى- مثلا
هيبتسم ليك ابتسامة فوتوجونيك فى الأول وبعدين ينقض
على الفريسة
نياهاهاها
ولو الركيب - اسم ده مش اللى هو هيعملو فينا بس اسم على مسمى عموما- هيقولك
بصوت هادى كده قوللى يا ابنى عدد خلايا الكبد
هتقوله نعم يابيه أنا معدتهومش
هيروح زوووووووو رازعك الصفر المتين دون أن يطرف له جفن
ويا سلام لو واحد من التانين
زى الدكتور المبتسم - ده مش اسم ده بقى صفة- هيقولك يا ابنى
سيبك من العيان ده زى الفل
قوللى ايه هيا الحنكولولو سيندروم
وحيث انى فاحت الكتب فهجاوبله عليها
هتروح الإبتسامة طايرة ويقولى انت بتجاوب عليا
وبعدين يقولك ايه عدد كرات الدم الحمرا
هاروخ أقوله خمسة مليون فى الديسيليتر
مذاكر بقا
هيقولى بابتسامة النصر على شفتيه قولى أساميهم
نياهاهاها
ولا الدكتور اللذيذ - ده صفة برضه- ده هيسبنى أفحص العيان
فى 5 دقائق
وبعدين يقوللى
ايه اللى فى العيان اللذيذ ده
هقوله فيه تضخم فى الكبد والفص الشمال كذا واليمين كذا
مش بقولكو مذاكر
هيروح الدكنور يحط ادده على العيان
ويقوللى فعلا الراجل عنده تضخم من النوع الفاخر
ويقوللى أكيد فحصت صباع رجله الصغير وإلا ستخسر كثيرا
أنا هبصله كده وأقوله هفحصه ليه
هو يقوللى معنى كده انك مافحصتهوش
ويقولى هاهاهاها خسرت كثيرا
وزووووووو الصفر المتين
*********
أنا عارف انى طولت والعملية وسعت منى المرة ده بس
اعذورونى
عندى امتحااااااااان بااااااااااطنة
واللى أنا فيه ده اسمه
سيندروم ما قبل الإمتحان
Pre exam syndrom
كل الى ارجوه منكم دعوات
ادعوووولى جامد
واشوفكم على خير بعد الإمتحان ان كان لسه ليا أجل
************
تحدييييييييييث : ايه ده
أنا نسيت أكتب الإمتحان امتى
الإمتحان يوم السبت القادم
الثانى عشر من يوليو
دعوات بقى
علشان ما نتروقش كما حصل فى امتحان الباطنة اللى فات
40 comments:
لا حول ولا قوة إلا بالله العلي العظيم
أنا مش قادرة امسك نفسي من الضحك أصلا
لأ بجد
ربنا يعينكم
كان دكتور اسامة باطنة بيقول للعيال قبلها بكام شهر اقعدو في البرميل لحد ما تخلصوا مزاكرة
ربنا يعينك يا رب و يفتح عليك
وي لهمك الصواب
بالنسبة للسيندروم أنا اصلا من كتر اساميهم بقيت اجمعهم في ورقة و اقعد احفظ احفظ احفظو في الاخر انسي دول بتوع إية
يلا خير
مرة صحبتي دخلت لدكتور - اسمه الطرابيشي- المهم بيقولها
قوليلي بقة
إية هيا ال طرابيشي operation
البنت معرفتش صراحة
قام قالها
يلا هقابلك السنة الجاية
لوووووووووووووووووووووووووول
والله دكاترة سكر
أنا اول ما هتشف مرض هسمية حبظلم سيندروم ( علي اسم ابني ) اصل انا مبحبش اتفشخر
كان برضو السنة اللي فاتت في ال باثولوجي عندنا دفرينشيال دياجنوز لل cafe' olae كلر
يلا خير
هما بيتفننوا في قرف الواحد
بس السؤال الذي يطرح نفسه و يتلعلع في الافق
هو الامتحان امتييييييييييييي؟؟؟؟؟؟؟؟؟؟؟؟؟
عشان نبقي ندعيلك ساعة النكسة
قصدي ساعة المحنة
قصدي ساعة الحرب
قصدي سعة الامتحان
ربنا يعينك يا رب و يعلمك ما جهلك و يذكرك ما نسيت
و يوفقك لما يحب و يرضي
دمت سالم
سلامون عليك
محمود بيه ربيع , لما انت عامل كده أمال أنا أعمل ايه؟ :(
عموما هو أنا سمعت ان الدكنور "اللذيذ" مسافر اليومين دول , مع اني والله شايف انه طيب جدا "اذا ماقورن باقرانه من أساتذة القسم"
حبيت برضو أفكرك بامتحان الباطنة السابق أعاده الله علينا و على الأمة العربية بالخير واليمن و البركات
خبر آخر ربما يسعدك , جوجل تعرف عليك, جرب كده تكتب "محمود ربيع" بالعربي في الجوجل
dear 7uda,
i know that you know that i know that:
en fel oral el mawdoo3 bahdala bas brdo fe 7agat bte7sal keda feeha masaln law wa7ed zameel 3aziz ma3ak fel dof3a aboh doctor -ra2ees kesm el ramad masalan- we beyd5ol 3la el dr men dool we ye2ol esmo ye2om el dr yerfa3lo el kobba3a
we ye2olo salemly 3la baba ya 7amada we yezabatto fel drga
ana 3aref ennak 3aref enny 3aref ennak 3aref we mota2aked en dah bey7sal we azon en dah 7asal odamak keteer
we 5aleeny saket ba2a
balad kosa we dinsorat kosa
aaaaaaah, fen ayam zaman, kan el dinasor men dol beytala3 nar men bo2o
yalla ayam el baraka ra7et men sa3et ma 3'alo el banzeen
mesh ha2ol tany we 5aleeny saket
salam
ارحموني
انا مدخلتش طب
قوم
صاحبتي الانتيم تبقي طب
واختها طب
وقطران اخويا طب
والله انت صاعبانين علي ربنا معاكو
مع اني مش قادره امسك نفسي من الضحك
بس نفسي اعيط عليكو اوي
السلام عليكم
هههههههههههههههههههههههههههههه
والله بجد الموضوع دمه خفيف اوي
وباين فيه حجم المعاناه بس معلش ساعات الدراسه بتكون كويسه مش سهله اوي بس مش مستحيله لكن المشكله في الدكاتره هما اللي بيعقدو الدنيا
ربنا يوفقك
وان شاء الله تحل كويس في الامتحان وربنا يرزقك بدكتور كويس وطيب وابن حلال يراعي ربنا فيك
السلام عليكم ورحمة الله وبركاته
funckydoctor
قلبى عندك وربنا يقويك على الباطنة والجراج بتاع الباطنة زى ما بنسميها بعد ما اشتغلنا.
انا ممارس عام(ماتسالنيش ليه:اجيب لك من الاخر:خايبه!) المهم الممارس تقريبآبيشتغل باطنة بس من غير الدبلوم (علشان دى بلد شهادات) كل مماتتصوره بشوفه عندى من اول صباع رجله الصغير بينقح عليه الساعه 2الفجر لحد الشعرايةاللى فى وسط راسه ليه مبتطولش؟
مأساة اسمها الباطنة!!!!
او كما يسميها المرضى :الباطنية(كان اسم اشهرمكان فى مصر لبيع المخدرات...معرفش لسه الحال هو هو ولا
اتغير؟).
عايزة اقولك(الركيب ده مستشار عندنا وعامل عمايل يامحترم فى المرضى حدث ولا حرج!!!.
مرةتانية ربنا ينجح حضرتك وتكون الوالدة راضيه عنك وتدعيلك من قلبها فى ساعة رضا
ويتقبل منها ربنا يارب
حرام عليك والله اللى إنت بتعمله ده
أهو أنا كل علاقتى بالطب والدوا زى علاقتى بالحرب الأهلية السنغافورية.. بس مش عارفة أبطل ضحك
كل ما أفتكر متلازمة نعكشة أموت من الضحك.. على كده لو جتلك واحدة فى كلية تربية قسم إنجليزى وفاشلة وعندها حالة من الغباء والبله المنغولى يبقى عندها متلازمة ميوشة
لوووووووووووولى والله كبرتى يا ميوشة وبقى ليكى متلازمة
ملحوظة أخيرة: واضح كده خير اللهم أجعله خير .. إن الدكتور المبتسم واللذيذ والظريف مش موجودين عندك بس.. دول شكلهم نسخ بيبقوا موجودين فى كل كلية .. وكل واحد فى مجاله
السلام عليكم
ياااه..كانك قلت اللي جوايا كله..
بشس نظام التعليم كله بايز جت على الطب..
الكليه بالنظام ده ما هي إلا رخصه لمزاولة المهنه وتبدأ بأه تتعلم طب صح بعد ما تتخرج ..
بالنسبه للإمتحان ربنا يسترها معانا ويوقف لنا ولاد الحلال..
بوست رائع
تحياتي
سلام
وياريت بعد كدة وبعد كل التعب دة بنشوف اطباء باطنة كويسين
تعرف
انا جالى الم فى بطنى غير محتمل افتكرت انها حصوة المرارة بتتحرك ولا حاجة كالعادة يعنى قمت اخدت المسكن المعتاد فى الحالة ودى والامل ما قلش انما بيزيد والمهم لفيت على اطبائء الباطنة واحد يوقى دى المرارة فيها حصوة ولازم عمليه وواحد سوقى المعدة ملتهبة وفى الاخر خالص واحد قالى دة القولون العصبى وكنت باخد حوالى سبع انوا ع اقراص فى وقت واحد
والحمد لله خفيت دلوقتى
وانا واثقة ان رينا استجاب دعائى مش خفيت منالاديوة ولاالدكاترة بتوع السيندروم دول
عموما ربنا يوفقك وتنجح فى الباطنة بإمتياز ويشيلوك المرتبة كمان عليها
ههههههههههههه
واضح انك بدات تعاني من
Batna syndrome
عموما ما تقلقش ان شاء الله تاخد امتحان كل 96 ساعة لمدة اسبوع وبعدها راحة تامة لمدة 3 شهور , احتمال احتمال يعني تبقي كويس وتنسي الصدمة
بجد قلبت علي المواجع
انا فاكرة قبل امتحان الباطنة دا كنت قاعدة في الارض وحاطة قدامي ال 13 كتاب ومش عارفة ابدا بايه ولا ايه
والمشكلة ان في الامتحان لازم لازم هتتسأل في حاجة اول مرة تسمع عنها , دا لازم يعني
الديرينشيال دياجنوزيز دا لذيذ جدا
وخصوصا في الشيست , لان كل حاجة كانت بتعمل اي حاجة
امتحان الحالات النظري بتاعنا كان طلاسم , والنظري كان اكتب ما تعرفه عن الباطنة يما لا يزيد عن 600 صفحة
حاجة بسيطة يعني
لا بجد بجد ربنا معاكم ويعينكم
الباطنة دي سايبة لي scar لحد دلوقتي موجود ومش بيروح
بس انا بفكر في موضوع سنووايت سيندروم دا , لازم بردو اسيب اثر في الطب
ابقي طمنا بقي عملت ايه
زمل
ههههههههههه
فكرتني باللذي مضي
بس تجربتي كانت ف الرمد
تعددت المواد والهم واحد
الله معك يا حبيبي وخلي بالك م البهست سيندروم
الباطنة هىمعجزة افلام الخيال العلمى ..كانك بتشوف تركيبةحرب النجوم على فيلم مصاصين دماء وتتر النهاية فيلم كارتون توم وجيرى مينفعش معاها حفظ بس فين اللى يفهمنا
امال تعمل اية لو فى بيطرى دة الباطنة عندنا ست باطنات والدوخة ست مرات
ربنا معاك هنعمل اية بقى
تقبل مرورى
ايه يا ابنى ده بجد حرام انتم لما بتتخرجوا بتتخرجوا بكامل قواكم العقليه ولا بيحص لكم تربنتينه فى حاجه
يا نهار ابيض الحمد لله انى مدخلتهاش يا ساتر هو انا ناقصه جنان على خرفانى
ربنا يكون فى عونك
ربنا يوفقك ياااااارب وتجيب تقدير كمان في الباطنة خير ان شاء الله
والحمد لله اني مدخلتش كلية طب الحمد لله
وعلى رأي ميوشة
ملحوظة أخيرة: واضح كده خير اللهم أجعله خير .. إن الدكتور المبتسم واللذيذ والظريف مش موجودين عندك بس.. دول شكلهم نسخ بيبقوا موجودين فى كل كلية .. وكل واحد فى مجاله
منكوا لله يا دكاترة الكليات جننتونا وجيبتولنا سيندرومات مش سيندروم واحد
هههههههههههههههههههههههههههه
ربنا يصبرك علي ما بلاك يا دوك
انا من كتر ما سمعت عن طلبه طب المعذبين و الله اتعقدت , بقيت بنصح اي حد اعرفه ميدخلهاش هههههه
بس لذيذة اوووي حكاية السيندروووم دي
ربنا يكرمك و تكتشف مرض إن شاء الله في المستقبل و يبقي اسمه funky Syndrome
لأ خير ان شاء الله الامتحان ييجي كويس
و ربنا يهدي الأخوة الدصنانورااات
ربنا معااااك :)
ربنا يوفقك وييسرلك كل صعب
جميل شرحك لما يحدث حتى تتضح لنا الصورة
ربنا معاك
ركز انت بس وان شاء الله ناجح وبتقدير محترم كمان
اااااااااااااااااااااه فكرتني بالذي مضي دي ايام ربنا ما يعودها
بس نصيحه امسك نفسك ياراجل بلاش اللي بتعمله في نفسك دا ... أمال لما تاخد النسا هتعمل ايه
ربنا يخرجك منها علي خير زي ماخرجنا
ياااااااه بسم الله ما شاء الله
انا اتخضيت فعلا
اولا انا لسة معدية على البلوج امبارح باين مكنش فيه بوست جديد
ببص لقيت بوست طويل عريض
ولما قريته جاتلى حالة ضحك غريبة
تقدر تسميها بريك سندروم
المهم انى استفدت فعلا
انا كنت فاهمة الباطنة دى اللى هيا البطن
ومنكم نستفيد
هندعيلك يومها ان شاء الله
BREAK
مستينك يا دكتور تحكيلنا عملت ايه الركيب عمل شغله ولا لأ
دا شكلنا داخلنا على شغل جامد
مصطفى
اييييييييييييييييييه
يالهووووووي
رغي رغي رغي
ايه...
هههههههههههههههههههههههههه
ممكن تسكت لحد اما ابطل ضحك وبعدين تكمل واللا هو محدش بيعرف يمسكك
لا استنى لسة ماخلصتش عندي شوية ضحك تانيين لسة
هاهاهاهاها هي هي هي هي هو هو هوهوهوووووو
ااااااااه... صحة وعافية يا عفروتو
ايه ياعم الدكتور...
ما انت شاطر اهو ومذاكر
"وفاكرين ان الباطنة ده هيا البطن
احب اقولهم لا وألف لا
الباطنة ينطلق على كل ما هو باطن مش شايفينه
يعنى أمراض الصدر والقلب والعصبية
والنفسية والكلى و أمراض الدم
والغدد الصماء"
يعني بعد كل السنين دي طلع دكتور الباطنة مش يعني دكتور البطن؟؟ طلع دكتور الحاجات اللي المستخبية؟؟
ياسبحان الله.. شوف الواحد بيستفيد والله طول ماهو عايش
حححححححح قلبي معاك والله
انا اول مرة اجي هنا بس بس هنطلك كل شوية وهتشوفني كتير
miro el niro kwaniro
اهلا اهلا اهلا ....
اهم حاجة انك تبقى كووووووول
تبىق واقق في نفسك كدة و ضارب البدلة التمام
و البارفان التمام ..
و تبقى و لا هامك أي حاجة ..
عشان لو اي من الأعداء .. اكتشف انك مش واثق في نفسك حتى و لو لفمتو ثانية ..
هينقض عليك بالأسئلة .. و تلاقي الاصفار كما المطر في يناير ..
ربنا يعينك ..
هدعيلك ..
و ابقى طمنا يوم السبت ..
ربنا معاك .. ربنا يوفقك يا رب
بدعاء خالص من القلب و الله
ياخبر كل ده شايله فى نفسك وساكت
وبعدين تعالى هنا هو ده مه بوست ومنه مذاكره ولا ايه
اتنين فى واحد يعنى
ههههههههههههههه
الحمد له انى عمرى عمرى حتى ماتمنيت ادخل طب
ربنا يعينك يارب
اسال الله العظيم ان يكتب لك التوفيق
والله يا اخى انا بيصعب عليا كل من يدرس الطب يبنى دة اشغال شاقة
والمشكلة انهم اقل الناس اجورا
ربنا ينتقم من نظام الدولة اللى ظالم اهم شريحة بالمجتمع والنتيجة بتطلع على عين المرضى
المهم ياسيدى ربنا يكتبلك التوفيق
ربنا معاك
السلام عليكم ورحمة الله وبركاته
funckydoctor
جيت اتمنى لك التوفيق والنجاح بكرة ان شاء الله
ماتنساش فيه ساعة يستجاب للدعاء الطيب بها مابين صلاةالعصر وصلاة المغرب حابقى ادعى لك فيها ان شاء الله
ربنا يوفقك.
يا عينى يا عينى يا عينى على الولد........ولا يهمك ان شاء الله خير وبعدين انت قلت كذا حاجة مكلكعة اهو يعنى مذاكر.........ربنا معاك يا دكتور
ربنا يعينك ويصبرك ويوفقك يارب فى انتحار الباطنه قصدى امتحان الباطنه
السلام عليكم ورحمة الله وبركاته
ماذا فعلت يازميل
مع الراكيبى واعوانه اليوم فى الموقعة؟
ابلغنا انك مازلت على قيد الحياة ثم اذهب لتستريح
دعواتى لك
محمود ..
عملت ايه في الامتحان ؟؟
انا رايحة جاية على المدونة و مستنياك ..!
طمنا الله يكرمك .
فى الأول شكرا يا جماعة على التعليقات والدعوات هحاول أرد عليكم كلكم ان شاء الله
نعكشة:
اه فعلا اختارتلى برميل بس الظاهر طلع ضيق.
اه فى الباطنة انتى عايزة كشكول لأن كل صفحة فى الكتاب تقريبا فيها سيندروم
هههههه
حلوة هقابلك السنة الجاية ده
هتسمى ابنك حبظلم يبقى أكيد أبوه هيبقى اسمه فسكونيا :D
أنا عملت تحديث وقولت فيه الميعاد
شكرا على الدعوات وسلامون
dr_drsh:
ادي يا عم ما فرقتش اندبحنا
واللذيذ فعلا مسافر
والأمتحانين كانوا زى بعض وأعاده علينا خريبة باليمن والبركات
:S
شكرا يا باشا على موضوع اسمى ده ما كنتش عارف
My twin:
ebn ra2ees kesm el ramad ah meen leeh betetkalem 3an meen :P ana seme3t 3an 7ad b el mwasafat dh 2abl kedh
hahaha 7elw el dasnanoor elly bytala3 nar dool dh el dragons homa elly bytala3o nar sa3adtak :P
we oskot ba2a we kefay tasee7 :D
زفتة وقطران:
عيطى عيطى جامد علينا وعلى حالنا
اه يانى يا امه
Bota :
الدراسة حلوة بس الدكاترة نيلة أعوذ بالله منهم
Norahaty:
الممارس العام مش خيابة
ده حاجة مهمة وهو مش قرن فمابيكونش عنده مانع يحول الحالات
وربنا يعينك
الباطنية ده ورا المستشفى بتاعتنا وما زالت أكبر مكان للمخدرات
ايه ده يا خبر اسوس انتى عارفة الركيب اوعى تقوليله عنى لحسن ........
انتى عارفة هيعمل ايه
الا بالحق هو بيعمل ايه مع المرضى
ايه ده كله انا عايز اعيط
انا لو كنت مكانك كان زمان الله يرحمني
المفروض مدونتك تسميها
يوميات طالب طب مفحوت
ولا يسعني الا ان اقولك
قلبي معاك يا ضنايا
تقبل مروري وبحد
اسلوبك هايل اوي في التعبير عن اوجاعك
اللي خليتهااوجاع كوول
maiosha:
ممكن تعملى متلازمة اشمعنى انت
بس ايه موضوع الحرب السنغافورية ده :D
هو فى أصلا حرب فى سنغافورا :D
أكيد طبعا الأساتذة دول ماليين الدنيا وكل كلية عامرة بأساتذتها :s
من المعقد نفسيا الى الروش اللى مقضيها وربنا يتولانا احنا بين ده وده
dr.m:
أى خدمة يا معلم ريحت اهو وفضفضتلك معايا وربنا يستر فى اللى جاى ده خلاص راح فى داهية
حبيب قلبي..
أنا شايف إن كلامك له شقين..
الأول فكاهي بحت..
والتاني..أي حاجة تانية غير تفكير واحد عايز يكون دكتور...
أنا على فكرة مش من اوائل الدفعة ولا حاجة..بس شايف إن كلامك مش مظبوط...
إنت لازم طبعا تطلع عارف كل حاجة في الباطنة..لسبب..مش كون الدكاترة الكبار مش عارفين أي حاجة و بلاليص في غير تخصصهم إنك تبقى "بلاص" .ولا ايه رأيك.
تاني حاجة
المتلازمات مش عم عبده بتاع الشاي اللي في المستشفى هو اللي بيعتمدهم...
دي حتى كلياتنا مش معتمده متلازمات..ده لأن محلها من العراب في موضوع البحث العلمي صفر على الشمال..
فممكن أسامح نفسي و أسامحك لو استقلينا بموضوع المتلازمات..
والهدف من تجميعتها..إنك تعرف هو عنده ايه تاني..أكتر من انك تعالجه..
وأخيرا يا د ال
Differential diagnosis
ده معمول عشان الدكاترة اللي لو عالجت غلط المريض ممكن يسيبه المهنه و يشغله حلاق صحة..
ماهو مش هتلاقي في امريكا و اوروبا حد بيعالج بالركة...ولا الفهلوة...
لسه دكتور مجاي من كندا بيقولنا لو اديتلك كتاب و اديت لامريكي كتاب و قلتله طلعلي جرعة الدوبامين للعيان اللي قدامك م ين هيطلعها الأول..قلنا كلنا هو طبعا..
قال لأ المضري..لأنه هيفتح على صفحة الجرعة و يقرأها ويقولها على طول..
الأمريكي هيبص على الاعراض الجانبية و نواهي الاستعمال...
وبعدين يقرر هيدي دوبا ولا لأ..
إحنا دكاترة شغالين بالبركة..
عشان كده لهم حق بره لما نسافر ب بكالوريوس طب و شهادة
icdl
يعترفوا بالicdl
و يخلونا نعادل شهادة الطب :)
بس أنا مع إن الدكتور المصري من افضل الأطباء على الاطلاق..لو اتعلم بره :) ...وطبعا بعدها اشتغل بره :)
واخيرا أسف على الاطالة..وشكرا لك ولكل اللي قرأ كلامي .
Post a Comment