Jul 20, 2010

الموت


مغبة الموت ثقيلة
تحط بظلالها على البيوت الامنة
وعلى العائلات السعيدة
وعلى الليالى الهانئة
فتغير حالهم وتربك أيامهم
وتطيح فى طريقها بكل المسرات
ولا تعطى لأى حدث مهما كان سعيدا أى إهتمام
لا يشعرون أبدا بطعم السعادة
بل يتجرعون كأس الحزن
الحزن الذى تنكسر عند أسواره الأقلام
ويعجز مداد الأرض عن وصفه
ولا يصفه حتى قطرات الدموع
ولا اهات الحزن
فقد يأتى الحزن
يصهرك كالشمعة
يسكبك كالماء
يلاحقك كالغيلان
يقيم فى صدرك
يكتم أنفاسك
يضيع عناوينك
يضيق ذاكرتك
يصادقك
يتودد إليك
ولاسيما إذا كان من فقد هو الأهم لكل أفراد العائلة
تمر الأيام بل و السنوات
وتأتى الذكريات دوما
بالمواقف
يجلس مع نديمه وقد تكون الضحكة على وجهه
فيتذكره
فتدمع عيناه حزنا وافتقادا له
فالله الله فيمن فقد العزيز
إنما هو الإختبار والإبتلاء والإمتحان
هو اختبار الصبر الأعظم
هو الجزاء الأعلى
هو الفوز بالجنة والنعيم المقيم
لم تكن الجنة أبدا إلا غالية
ألا إن سلعة الله غالية ألا إن سلعة الله هى الجنة
فلربما أراد اللله أن يجمع عئلة فى الجنة
بفقدهم العزيز وصبرهم على ذلك
والدعاء له
لا يعلم الغيب إلا الله
والكل سيأخذ منه الموت من هو عزيز عنده
الأب والأخ والإبن
لا ينفك الموت دائما وأبدا عن فعل ذلك
لا ينفك عن التفريق بين الأحباب والأبناء
هذا هو عمله المنوط به من الله جل وعلا
حتى النبى عليه أفضل الصلاة والسلام لم يكن استثناءا
إنك ميت و إنهم ميتون

لــــــــــــــــــــكــــــــــــــــن

هل من فارق الحياة و انتقل بإذن الله إلى حياة أفضل هو من مات
هل من تبقى سيرته العطرة بين الناس هو من توفى
هل من يذكر بالخير يعد مفقودا
لا يرجو الإنسان أبدا ما هو أفضل من ذلك
طال عمرك أم قصر
تتمنى أن تفعل الخير وأن يذكرك الناس بالخير
وأن تكون لك الذرية الصالحة التى تعينك بدعائها وصدقتها

فمن البشر من هم يمشون على الأرض وبيننا
ولكنهم لا يعيشون بل هم الأموات بعينهم
لا يقدمون جديدا
لا يزرعون زرعا
ولا يغرسون غرسا

هل من عاش من الأبناء بعد أبيهم مثلا
فلم يحفظ العهد ولم يصن الأمانة
ولم يعمل على أن تعلو درجات أبيه فى الجنة يعد من الأحياء

ليس من مات فاستراح بميت***انما الميت ميت الأحياء
إنما الميت من يعيش ذليلا ***سيئا باله قليل الرجاء

فالميت ليس من فقد حياته واستراح
وسبقته أعماله الصالحة ودعاء أهله وصدقتهم إلى الجنة
ليس من شيعت جنازته
إنما هو من الدنيا بإبتلائاتها
هو من حكم عليه الدهر بثقل الحمل وطول المسيرة
فقد تشيع جنازة من هو أسعد منك وأفضل حالا
وستلحق به عما قريب

ولكن ليعنا الله أن يجعل ما بعد الوفاة أفضل لنا مما قبلها


اللهم أنزل على قبور موتانا الضياء و النور و الفسحة و السرور
اللهم جازهم بالحسنات إحسانا و بالسيئات عفوا و غفرانا

Jun 20, 2010

القدر

ما زال وسيظل دوما لعبة الأقدار فى حياتنا
ندور فى فلكها قد لا نستطيع أن نجزم ماذا سيحدث غدا
ولكنك
وبلا شك
وقعت ولو مرة
فريسة لهذه الأقدار
تنهش لحمك وتنخر عظمك
القدر صدمته عنيفة وتقبل تبعاته من أصعب الصعاب
لا يقوى عليها ولا يقدر عليها الجميع
عندما ترسم طريقا وتأتى الدنيا بأقدارها لتطيح به
وترى انهيارها كناطحة سحاب كانت الأجمل
بل كانت الأروع و الأطول بين أقرانها
عندما لا ترى الطريق بعدها
لا من غبار انهيار الناطحة فحسب
ولكن من عدم الإستدلال أصلا على الإتجاهات
بل من عدم وجود مصدر للضوء يلوح فى الأفق


*************

ليس ما يدمى القلب فقط ما آل اليه القدر
ولكن الطريقة التى يتم بها قد تكون أقسى و أقسى
قد تصدم بالأحداث
قد يحدث ما لم تكن تتخيل أنه قد يحدث فى يوم من الأيام
وربما قصد أحد بك الخير ولكنه لا يعلم مقدار الألم الذى ألحقه بك
وربما يكون ألحق بك الضرر بحسن نيته
ولكن هل يا ترى حسن النية يبرر كل الأفعال والأقوال
لا أظن أن حسن النية وقصد المصلحة لوحدها ذريعة لأى فعل
فقصد المصلحة أو حتى دفع الضررمن وجهة نظرك لا يبرر إطلاقا كل أفعالك
قد تكون خبراتك فى الحياة أكثر
ولكن رأى غيرك يحتمل الصواب و الخطأ

**********

ولكن لكل خطوات القدر حكمة قد لا أراها الآن لقصور نظرى
وقد لا أعرفها أبدا
وتكتفى بقول سبحان الله
أما لماذا حدث فهذا فى علم الغيب
فى اللوح المحفوظ
و كل شئ عنده بمقدار
بل إنه ليس من حقى أن أسأل لماذا
لأنه من إساءة ألأدب
والله قادر
إِنَّا كُلَّ شَيْءٍ خَلَقْنَاهُ بِقَدَرٍ

**
*********

علمتنى الحياة
إذا بكيت ابكى صامتا
وإن تألمت فتأوه بلا صوت
وأن أوراقك فقط هى التى تصدقك
وأن مداد قلمك هو صوت حنجرتك

وأن لا ترجو أحدا إلا الله
وأن لا تشكو إلا اليه

Oct 9, 2009

رفقا بالقوارير

حد يقولى أكتب ايه
طب أبدأ منين
بلاش
طب حد يقولى هو فيه ايه
ايه اللى عملو شيخ أزهرنا ده
الراجل اللى المفروض رئيس أكبر مؤسسة إسلامية فى العالم بدأ يحارب الإسلام
بعد ما راح المعهد الدينى وأمر الفتاة بخلع نقابها
هو كمان خلع برقع الحيا
وأخذته العزة بالإثم
ومنع النقاب فى المعاهد والجامعة
ولكن ولله الحمد لم يوافق المجلس الأعلى للأزهر على العك ده
فى قرار وصفته الس إن إن بأنه أخرج طنطاوى من المأزق اللذى وضع نفسه فيه

هو السؤال بقى يا ترى النقاب عيب ولا حرام
أنا مش مصدق نفسى
دايما المناقشة فى موضوع النقاب بتدور حول أهو واجب أم سنة أم مستحب
لكن يتدنى بنا الأمر لدرجة ان يدور النقاش حول بدعيته وانه عادة ولا لأ
ليس من حقى إطلاقا الكلام عن حكم النقاب الفقهي
ولكن فى خلال دراستنا فى الأزهر اللى بيقولو عليه ده
الفقه لم يذكر حكم النقاب
واقصد بهذا مذهبى اللذى درست
فلم يذكر أى مذهب إطلاقا إن تغطية الوجه ليس من الإسلام كما يدعون
ولم يبدعه أحد كما يقولون
بل البدعة ما قالوا
ولا يرى أى عاقل لم يطمس الله على بصيرته
إلا أنها من الأشياء المحمودة اللتى وإن كان ليس لها نفع أخروى كما يدعون
إلا أنها وباليقين الجازم لها نفع دنيوى
بلاش ده كله
حد يقوللى ضرر واحد للنقاب
بلاش كده هتكسب ايه يا عم الشيخ انت وهو لما ترى وجه أى فتاة
ليست من محارمك
ألم يأمر الدين بغض البصر
ده يا عم الحاج هتريحك من الوزر ده خالص
فبدل من أن تشكر تعاقب
فعلا
إن لم تستح فاصنع ما شئت

منع المنتقبات من المدينة الجامعية لجامعة القاهرة
كان من باب أولى أن يمنع الخليعات المعروفات بسلوكهن غير المنضبط
ولكن هل فعلا يتوقعوا من الطالبات خلع النقاب بمنتهى البساطة
لا أظن إطلاقا
لا أرى أى نية سليمة من جراء فعل هذا
خصوصا أن من ينادون بالحرية الشخصية وحقوق البتنجان أقصد الإنسان
هم نفسه من يطلب منعه
يعنى لازم البنات يبقوا ستايلش و كوول علشان يعجبوا والأساتذة يعرفوا يشرحوا

أليسوا يدعون أن النقاب ليس من الإسلام فى شئ
فكيف بالتبرج

علم الناس قديما وحديثا أن الجواهر والأحجار الكريمة
إنما كانت ثمينة وغالية لقلتها وندرتها وصعوبة الوصول إليها
أليس كل ما كام بعيد المنال أغلى كثيرا مما كان سهل المنال
وبهذا ولهذا فضلت المحجبة على غيرها

أصبحنا فى زمن النقاب فيه غلو و شطط
والعرى والتبرج لا ينكر عليه

ما يدرينا ما سيحدث فيما بعد
من حق أى مسلم أن يخشى على مستقبل بناته وصبيانه
أن يجزع ويهلع إذا ما فكر فى مستقبل أحفاده
و اظنه يموت حزنا إذا ما فكر فيما بعدها من الأجيال
ربنا يستر

Sep 17, 2009

أحبك ربي

يقرأ الإمام القران فلا تدمع الأعين ولا تخشع القلوب
إلا بذكر النار وأهوال اليوم الأخر
ويحتاج هذا إلى جهد جهيد من الإمام الذى يبدأ بتغير نبرة صوته
ويبكى أو يتباكى فيستفيق الناس على أن هذه الأية ممن يُبكى فيها
ويبدأ احدهم بالبكاء ثم بالنواح وقد يلجأ إلى العويل
وينتقل الأمر كالعدوى من مٌصل لمٌصل آخر
وكأنه يألى على نفسه ألا يبكى
فهل فلان هذا أخشع منى؟

وتنقضى الصلاة فلا يشرع الإمام فى الدرس إلا لشرح الأهوال والعذاب
ويستمر الناس فى مص الشفاه
وينسى الإمام أنه سبحانه كما خلق النار خلق الجنة
وأنه لا بد من الترغيب حتى لا يثقل الأمر على كهولنا

ما لنا لا نبكى ولا نخشع إلا بذكر العذاب
ما لنا لا نعبده سبحانه إلا خوفا
ما لنا نصمم على استمرارنا كعبيد خوف

لماذا مثلا لا نشعر بعتاب الله لنا فى أياته
فلا تجد من يستشعر قوله تعالى
إِنَّ اللَّهَ لَذُو فَضْلٍ عَلَى النَّاسِ وَلَكِنَّ أَكْثَرَ النَّاسِ لا يَشْكُرُونَ

فلا نشعر بها وتمر مر الكرام
ولا فى قوله تعالى

مَا لَكُمْ لا تَرْجُونَ لِلَّهِ وَقَارًا

اشتمل القران العظيم على جميع الطرق للدعوة لله
الترغيب والترهيب والتيسير والمشقة
فسبحانه يعلم أن طباعنا مختلفة
فمنا من لا يلتفت للعتاب حتى
ومنا من لا يشعر بكرم الله عليه
ومعظمنا للأسف لا يستجيب إلا بالترهيب
بالعين الحمراء كما يقولون

لماذا نصر على أن ينطبق علينا قول الشاعر

لا تشـتَـرِ الـعَـبـد إلا والـعَـصَـا مـعــه *** إِن الـعَـبِـيــدَ لأنـــجـــاسٌ مَـنـاكــيــد


ما لنا نخاف الله أكثر مما نحبه
طاعة الخوف هى طاعة الذليل
وطاعة المحب هى طاعة القرير العزيز

وكلنا يعرف الفرق بين أنك مضطر لهذا العمل
و أنك تحب هذا العمل
وما ينعكس على النفس من ذلك أو ذاك

فلا عيش كريم إلا عيش من أحب الله
وسكنت نفسه إليه
واطمئن قلبه به
واستأنس بقربه
وتنعم بحبه

فالقلب فيه وحشة لا يزيلها إلا القرب به
وفيه لوعة حزن لا يذهبه إلا الإجتماع عليه والفرار منه إليه
وفيها نيران حسرات لا تصدها إلا الرضا بأمره ونهيه
وفيه شجن والام لا تردعها إلا الإيمان بقضاءه وقدره

أحبك ربى
فما أعطيتنى إلا لفضلك
وما منعتتنى إلا لحكمتك
ولا أضحكتنى إلا للطفك
ولا أبكيتنى إلا لعنايتك

أحبك ربى
أعطيت قبل أن تأخذ
أضحكت قبل أن تبكى

اللهم إنا نعوذ بك من قلب لا يخشع ومن عين لا تدمع ومن دعاء لا يرفع

أدعوك ربى ستغفر ذنبى ستجبر كسرى
سترحم ضعفى ستمحو إثمى
ستمسح برحمتك دمعتى
وتذهب هم قلبى وتشرح صدرى
ستقبل دعائى وتحقق رجائى وتقبل توبتى

أحبك ربى

Feb 27, 2009

تخفيف لا تقييد

هل فعلا الدين مقيد للحريات؟
هل مجرد التدين يمنعك من الإستمتاع بلذة الحياة؟
أسئلة قالها الكثيرون بلسان المقال أو حتى بلسان الحال
فمن تتجاهل مسألة الحجاب مثلا
وتقول لا بد أن يكون عن قناعة أو حتى تنوى تأجيله لما بعد الزواج مثلا
فهى تؤكد ذلك
أو كمن تدعوه إلى ترك الغيبة
وبعدين يبقى قاعد مع أصحابه وعايز يجيب سيرة حد
ويقول استغفر الله ويتكلم برضه

ولكن هل فعلا الدين يفرض علينا قيودا لا نطيقها؟
وكان الناس قديما أول ما الأزهر يتدخل فى أى موضوع ما
يدخل فى نفوسهم أن الأزهر ده مش موجود إلا علشان يخنقهم
-أكيد ساعتها كان الأزهر غير دلوقتى- ويكرههم فى عشيتهم
واللى بيضيق على الناي أكتر فى اليومين دوول بعض الفضائيات
اللى معظم كلامهم فى الواجب والحرام
وكأن الدين أقتصر ت أحكامه على ذلك
فلا مباح ولا مندوب ولا سنة ولا حتى مكروه
بل وقل الكلام فيما يرقق القلوب
وزاد الكلام فيما يجعل التعامل بين العبد وربه معاملة التجار
فهتعمل كذا هتاخد كذا حسنة بإذن الله طبعا
وهتعمل كذا هناخد كذا سيئة
وأظن هذه أسوأ أنواع العبادة
فإنها وإن كانت بإذن الله طريقا للجنة
فهى وبلا شك مرهقة بل ويراها معظم الناس صعبة الدوام عليها
لأن العلاقة بيننا وبين الله لا بد و أن يكون لحمها وسداها
حب الله أولا ثم الخوف منه

ولكن هل فعلا الدين فى الأساس يكرههنا على شئ ما؟
بل أتذكر انى سمعت مرة أحد العلمانين يكلم شيخا
وبيقوله ما هو انت كده ديكتاتور
وقال زى الديكتاتور اللى فى السماء-تعالى الله عن ذلك علوا كبيرا
وهبقى محترم ومش هاشتم الراجل ده بألفاظ قبيحة
خلونى ماشى زى ما أنا كده

بس فعلا الإسلام عكس كده تماما
فأفرد أكبر معنى للحرية
بعدم الإكراه على الإسلام أصلا
كما فى قوله تعالى
( لا إكراه فى الدين) فلا مدعاة لإكراه الناس على الفعل والترك
وأيضا يظهر أكبر معنى لذلك بين الأنبياء صلوات الله عليهم
مع أقاربهم
كما فى زوجات سيدنا نوح سيدنا لوط
وكذلك ابن سيدنا نوح عليه السلام

فالقران أوضح أن لك حق الإختيار وعليك تحمل نتيجة اختيارك
فأوضح أن من
اختار غير الإسلام دينا فلن يقبل منه وهو فى الأخرة من الخاسرين

بل ابن نوح أدرك خسارته وخطأه فى الإختيار
بأن أغرقه الله

فلتكن مسئولا عن اختيارك

ولكن هل مسألة الإختيار ترجع إلى استفتاء القلب
فى أمور الدين
فالحديث إنما هو فى الأمور التى لم يحسمها الدين
مش فى حاجة زى الحجاب مثلا أو الخوض فى أعراض الناس
ثم هل قلوبنا نحن بما أصابها من أمراض
وبما رأت وسمعت هى تلك القلوب التى لها حق الإستفتاء

ومما لا يخفى أن الله تعالى عندما شرع لنا
إنما فعل ذلك لحكم نعلم منها ما نعلم ونجهل ما نجهل
لكن ما نتأكد منه أنه تعالى ما يريد بنا إلا الرحمة
والتخفيف والأصواب
ولعل أوضح ما يشير لذلك قوله تعالى
يريد الله أن يخفف عنكم
فنحن وبلا شك مخلوفاته وهو سبحانه يعتنى بنا أيما إعتناء
فلا أحد منا يرضى أن يتعرض ابنه بأذى
فما بالك بالخالق مع خلقه
فهو سبحانه شديد الفرحة بتوبة عبده
وهو الذى ينتظر مسألته ليجيبه
فهل أكبر من ذلك رحمة
لعلنا إن أدركنا هذا المعنى نعبد الله ونطيعه حبا لا خوفا

يارب اهدنا لما تحب وترضى

Dec 29, 2008

رقص السنة

بدأ التهييس
اللى هو بصراحة موجود
لكن بيزيد حبتين نقول تلاتة فى اليومين دول
طبعا التهييس بتاع راس السنة حاجة تانية
فالراديو والتليفزيون يقضوها استفتاءات
ويا ترى ايه أحسن متين قول تلتميت أغنية
ومين أحسن تافه
ومين أحسن تافهة

ومين احسن واحدة عملت عملية تجميل
ويا ترى مين أحسن واحد كتب كلام تافه
واحنا ما نتوصاش فى الحاجات ده
وتبدأ بقى الرسايل من كل حتة فى الوطن العربى
وكله لصالح المحطة
ما أصل الموضوع كله عبارة
عن شوية مجطات شغلانتها الهيافة ويهمها تحافظ عليها
طب ياكلو كفيار ومارونج لاسيه ازاى
وللأسف ده أسهل طريقة دلوقتى


نسيبنا من اللى بيحصل اليومين دول
ونشوف اللى بيحصل ليلة الراس
نلاقى الشوارع فى عز البرد والإمتحانات زحمة موت
ولا المولات حدث ولا حرج
وأخص بالذكر ستارز طبعا
والموضة بتاعت ان النور ينطفى عند منتصف الليل
طب بينطفى ليه؟
هه سؤال برئ


الليلة ده بالذات كل سنة أكيد بتشكينا لربنا
من كتر المعاصى و المهازل اللى بتحصل فيها
مئات الملايين بتتصرف فى اليوم ده
لا لشئ إلا على المعاصى
عندكو كل فندق من أسبوع تقريبا
معلق الإعلانات بتاعته عنده مين فى راس السنة
مغنى و راقصة

وفى من المغنيين دول اللى بيروح يعمل نمرة
ويطلعله سبوبة فى كذا فندق
وتشوف الإعلانات وتبقى مستغرب هو هيروح أى واحد فيهم
وده برضه أكتر يوم بيتشرب فيه خمور
وده برضه أكتر يوم مبيعات العقاقير

اللى فى منها الأصلى بتاع فايزر أو الهندى
أو حتى المصرى بتقفز لأعلى معدلات
أما عن السينمات والمسارح
الأعداد أمامها بتوصل للألاف وكله بيتخانق على التذكرة
مش عارف أقول ايه ولا أيه ولا أيه

ليه الناس بتصر على إن اليوم ده
تبارز ربنا بالمعاصى
ليه دايما بنحب نختم السنة بيوم
ممكن يضيع كل السنة
الكم الهائل من المعاصى اللى بتحصل عيانا بيانا
فى هذا اليوم
بتدينى تخيل انه ممكن نلاقى الشياطين بتصافح الناس
وبتاخدهم بالحضن كمان
بابقى متخيل انه لولا شيوخ ركع وأطفال رضع
فعلا لخسف بنا
رحماك يا الهى

الجماعة بتوع اسرائيل مش مكدبين خبر
بيحتفلو بالكريسماس بس بطريقتهم
لقو غزة يا عينى مافيهاش نور والناس بردانة
قالو ننورها بحريقة أهم يدفوا بالمرة
وهنسمعهم أحسن ميوزيك على نغمات القنابل
فى نفس الوقت الجماعة العرب بيحتفلو

يبقى من حق اسرائيل تعمل أكتر من كده
والمفروض كل العرب رجالتهم قبل حريمهم
يلبسو طرح
كل اللى احنا بنعمله بنشوف اللى بيحصل
ونمصمص شفايفنا

ولو شتمنا شتمتين على اسرائيل يبقى كتر خيرنا
وبعدها نتكلم عن خسارة الزمالك من بنى عبيد
ونتفق هنعمل ايه فى الكريسماس
هى ده قمة اللا مبالاة
قمة الأنانية

مش هاين حتى علينا نسيب حاجة كلها ذنوب
حتى ولو تضامن مع الناس ده
بلاش علشان الناس
حتى علشان الإسلام
فيها ايه لو اليوم ده نستكن كده فى بيوتنا زى الشطار
ونقفل التليفزيون والراديو
وندعى للناس ده
مش هقول تبرع بتمن السهرة

بس حتى ادعى ليس إلا


يحضرنى الأن كلمات قصيدة تقول
أيها التاريخ لا تعتب علينا
مجدنا الموؤود مبحوح الحناجر

كيف أشكو والمسامع مغلقات
و الرجال اليوم همهم المتاجر

ثلة منهم تبيع الدين جهراً
تلثم الحسناء والكأس تعاقر

ثلة أخرى تب
يت على كنوز
لا تبالي كان بؤسا أم بشائر

إنما العيش الذي نحياه ذل
نرتضي حتى وإن دنت الكواسر

يرفع المحتال قومي يا إلهي
والصديق الحق للعدوان آمر

أيها التاريخ حدث عن رجال
عن زمان لم تمت فيه الضمائر

هل ترى يا أمتي ألقاك يوم
تكتبين لنا من النصر المفاخر

ذلك الحلم الذي أرجوه دوماً
أن أراك عزيزة والله قادر


وبلا شك الله قدير
وكل راس وانتو طيبين

Dec 15, 2008

Nov 24, 2008

كيف وإن ؟



كيف وإن ضاقت بك السبل؟

كيف وإن ظننت الدنيا قد انتهت؟

كيف وقد تكالبت عليك الهموم؟

كيف وقد افتقدت عزيز؟



وان كنت تظن أن العقارب ستتوقف عن الدوران

ها هى الأيام تمر وما داخلك أمر

يعتصر الألم قلبك

لكن لا تستطيع أن تفر منه

يؤرقك يطاردك

حتى أصبح شيمة من شيمك

بل قرينك الدائم

فقدت رونقا بعد ما كنت متألقا

لا رفيق الا الهم والغم

تسرق الإبتسامة وهى بطعم المرارة

وأصبح تفكيرك حزين مشوش

وان كنت تخفى ما لا تعلن

وتبطن ما لا يظهر

وتحاول تخفف هموم الناس ولا تجد من يخفف همك



كنت أظن أنه الإنسان سمى بالإنسان لكثرة النسيان

ولكن لا يمكن أن تنسى ماتتمنى نسيانه

أو لا تنسى ما أو من أثر فى حياتك

هى علامات وأقدار فى حياتك لا يمكن إلا وأن تمر بها

ما حدثت إلا لحكمة يعلمها الله


أما وإن حدث ما حدث

وارتجيت من الله أن يكون خالصا لوجهه

وأنه ما كان الا خوفا منه ورغبة إليه

ولا ملجأ اليه إلا إليه

ولا حافظ لمن ارتجى حفظه الا هو

ولا مذلل ولا مهون الأمور الا جل جلاله

ومن بشر الصابرين غيره

ولا منفذ الا الصبر وليس لنا غيره



اللهم ان كنت فعلت هذا ابتغاء مرضاتك فسهله وهونه

يا رب ثبت القلوب التى بين أصابعك

يا من تكفلت بحفظ من يطيعك احفظنا

يا رب ارزقنا حلاوة فى القلب عوضا عن المرارة والهم

رجوناك فمن لنا سواك

أتيتك لا أتى غيرك



ولقد ذكرتك والخطـــوبُ كوالـــــــــحُ *** سودً ووجه الدهر أغبرُ وقاتمُ


فهتفت في الأسحار باسمك صارخاً *** فإذا محيَّا كلُ فجــــرٍ باســــمُ



اللهم فاجعل مكان اللوعة سلوة

وجزاء الحزن سرورا




يآ مجيب المضطر

يآ كآشف الضر

يآ عظيم البر

يآ عليماً بمآ في السر

يآ جميل الستر

أستشفعت بجودك وكرمك إليك

و توسلت بجنابك وترحمك لديك

فأستجب دعآئي بمنك ورحمتك
يآ أرحم الرآحمين

Nov 3, 2008

أزهرى أنا



نشرت جريدة المصرى اليوم فى عدد الإثنين الى هو النهاردة يعنى

وان عم نظيف بيقترح فصل الكليات العلمية اللى هى الطب والهندسة والعلوم والحاجات ده

عن باقى الكليات الشرعية

والظاهر معاليه ناوى يرجع طلبة الأزهر تحضر للشيوخ فى الجامع الأزهر وكل شيخ ليه عمود بتاعه

يسنده لحسن يقع عليه وعلى تلامذته

والجو ده اللى انتو عارفينه بتاع مسلسل المراغى والشعراوى

ولكن الأساتذة بتوع مجلس إدارة الجامعة عايزين يلموا الموضوع

وقالوا بكل حزم لن نسمح مطلقا بفصل الكليات

لكن بعد كده قالوا

إلا بموافقة مجلس إدارة الجامعة


وحيث إن الموضوع دخل فيه إلا وإذ قد ربما و حيثما والحاجات ده

يبقى قصدهم الموضوع قدامه شوية وقت

وللأسف الشديد كده أول مسمار قول أول شوية مسامير

فى نعش الكليات العملية بالأزهر اتحطوا


لكن اللى فعلا مش فاهمينه ايه المشكلة إن الأزهر فيه طب

ويعنى المشاكل بتاعت الأزهر هتنحل لما يفصلوا الكليات العملية

وكإن الكليات العملية هى اللى يا عينى قللت من مستوى الأزهر ككل

والتعليم أصلا فى بلدنا خربان من فوقه لتحته أزهر وغيره

اشمعنى الأزهر يعنى اللى عايزين يحلوه

********


وفى نفس المقال يقول العميد السابق بتاعنا اللى نفسى أتبرأ منه

يقول كلام يفور الدم ويخليه يندلق كمان

سعادته بيقول

يجب أن نتخلي عن فكرة الطبيب أو المهندس المسلم

وعلينا أن نعترف بوجود قصور فعلي في مستوي طلبة الأزهر


شوفتو الكلام

ده للأسف كان عميد كليتنا

قال إيه فكرة الطبيب المسلم يجب أن نتخلى عنها

طيب نتبنى ايه فكرة الطبيب الهشك بشك مثلا
فكرة الطبيب عضو نادى الروتارى
نتبنى فكرة الطبيب الذى بلا مبادئ

فيه ايه هو احنا بنرجع لورا ولا الدنيا بتمشى بقفاها يا عم الضكتور

وحضرة الأستاذ اللى مش قادر أقول عليه المحترم مسكتش وقال بعد كده
إن فيه قصور فى مستوى طلبة الأزهر

طب كده العيبة فى وش مين يا حضرت

حضور ومابتجوش وشرح بنتحايل عليكم تشرحوا ومافيش فايدة

طب نعمل ايه المفروض الأساتذة هى اللى تتغير
بجد أكتر طلبة بتنحت فى الصخر طلبة الأزهر
الدروس عندنا مش منتشرة كالجامعات الأخرى

معالى الباشا لو الأزهر مش عاجبك حضرتك ممكن تتفضل وتسيب مكانك
لحد فعلا معتز بإنتمائه للأزهر
ثم ايه علاقة الكلام الفاضى ده ومستوى الطلبة بفصل الكليات

ما لو حدث الفصل سيبقى الوضع كما هو عليه
والأساتذة هيفضلوا هما هما
والتهدور هيفضل
أى نعم هيجى بقى طلبة مالهومش دعوة بالأزهر
لكن سيؤول بهم الحال للتدهور لا ريب

********


أنا بس عايز أقول للناس اللى بتدق المسامير ده بتاع النعش

بالطريقة ده بتقضوا على الأزهر

مفيش حد هيدخل ابنه الأزهر بعد كده لما يعرفوا إن مافيش إلا كليات شرعية

ومش هيدخل إلا عدد محدود جدا

واحنا مش ناقصين بعد عن ربنا

والسطحية الدينية اللى احنا فيها هتزيد

بجد أنا بأقابل ناس ما يعرفوش أساسيات فى الدين بسيطة

وبيكونوا خريجى كليات محترمة

أنا بأقول للمسؤلين اللى هتعملوه ده فعلا سيئة جارية

هتكون سيئة جارية كبيرة قوى

معنى كلامى إن السيئات بتاعتكم هتزيد كل يوم

وإنت قاعد فى بيتكم حتى بعد ما تموت

أنا نفسى بس تحضروا إجابة السؤال ده لما ربنا يسألكم

عملتو كده ليه؟

*******

بالرغم إنى فعلا اتبهدلت فى الأزهر

لكن ليه فضل كبير عليا كفاية حفظت القرأن

من أول إعدادى باتعلم فقه وحديث وتفسير

أعرف فى النحو والبلاغة حتى الأن الكثير

أحفظ مئات الأبيات من الشعر فى كل الفروع

يا جماعة الأزهر علمنى ازاى أكون مسلم صح

هتقولولى ده طلبة الأزهر زفت

هقولكم العيب فيهم مش فى الأزهر


مش معنى الكلام ده كله إن الأزهر تمام التمام ولا تشوبه شائبة

لأ طبعا

الأزهر محتاج تطوير كبير على كل المستويات والمراحل المختلفة

محتاج تطوير مش إبادة يا أصحاب الفخفخينا



ويبقى السؤال اللولبى

لما يحصل فصل الكليات والمستشفايات والأساتذة والأفلامانات ده

هيبقوا تبع مين؟

أنا بأقترح الأمم المتحدة

Oct 23, 2008

الحاجة باطنة

وعدى الشفوى أبو 80 درجة عمى لا يساوو أى شئ فى بحر الباطنة العظيم

والحمد لله الكروت اللى سحبتها كانت فى المعقول والعملية مشيت
والحمد لله ان اللى بيمتحنو الشفوى هما الدصنانورات الصغيرة
وحتى أكون منصفا الناس كانوا كويسين جدا
حتى فى دكتور من اللى كانوا بيدونا فى المحاضرات شافنى واقف

على باب اللجنة مستنى دورى الذى لكل أسف كان اخر واحد لحد ما كانت أعصابى باظت

وقالهم الواد ده كويس بس لو ما عجابكومش ارموه من الشباك
وللأسف كنت أول مرة أشوف الناس اللى امتحنتى كان يوم الإمتحان
يعنى لا أعرف أسامى ولا ده كويس ولا وحش

بس المهم عدت


*******

وتبدأ العدة للمحطة الأهم فى تاريخك كطالب طب

وهو يوم الكلينيكال أى العملى بتاع الباطنة

وما يسمى بأغلى يوم فى الطب

ويوم النزيف الأكبر أى نزيف الدرجات





امتحان من 250 درجة يعنى أكتر من ربع درجات المادة

واستأثر به دصنانورات الباطنة الكبيرة
وأبوا الا انهم يعلموا علينا
وحيث انك هتمتحن ثلات حالات بثلاث ممتحنين

ومفيش أصلا فى القسم كله ثلاثة يتقال عليهم بيدوا درجات

فهذا يعنى وبكل أسى وأسف انك هتتعض وهتتبهدل على ألأقل قى واحدة منهم

ده لو مهماهتنا بتدعيلنا وقطعت سجادة الصلاة

وكما كان يقول الدكتور اللذيذ دائما


ستخسر كثيرا وستذوق العذاب الأليم ولن يرحمك أحد






ده طبعا غير مشكلة المرضى المحترفين

اللى يعرفو حالتهم أكتر من الدكتور نفسه وبالإنزليجى قصدى و بالإنجليزى كمان

ويبدأ الإمتحان دايما انك أول ما العيان يشوفك
يقولك الحلاوة يا بيه

وتبدأ بقى تفاصل فيه وتسيبك من الإمتحان خالص
يقولك 300 تقولوا لأ 100

وترسى على 120 أو 150 فى الأخر
وفى اخر اليوم يكون لم غلة كويسة



هو مش القصد انه يمليك الحالة ولا كمان انه هيقولك الأسئلة بتاعت الأساتذة


أصلهم محترفين امتحانات وبيحضروا امتحانات مثلا من 10 سنين
هما نفسهم ما بيتغيروش

الكارثة انك لو ما رضيتوش هيضيعك ويلخبطك ويقولك حاجات عجيبة

ويدعى حاجات تانية

بالذات المرضى بتوع العصبية وعلى رأسهم

عم عيد أكبر سمسار مرضى فى البلد وكنت بتصل بيه يبعتلنا حالات

وكله على مزاجنا عايز قلب تلاقى صدرية وما أكثرها

عصبية عز الطلب

ولو بطن يبقى لووز قوى

وطبعا كله بحسابه

وطبعا بعد مناهدة وفصال

الموضوع بيمشى ويظبطك ويمليك كل حاجة

وبكل صراحة أنا ناوى ان شاء الله أبلطج(من البلطجة) عليهم ومش هطاولهم حاجة

وبعدين يجى الدكتور ويقولك أنا عارف انه هو قالك كل حاجة

وما يرضاش أصلا يسمع منك حاجة

وبعدين يقولك

هى حالتك ايه ؟

وده السؤال الوحيد اللى هتجاوب عليه لأن العيان محفظهولك


ويا سلام لو حظك تمام وكانت الحالة عيان عادى مش محترف

وحيث ان أكيد الحالة أصلا مش متشخصة ومحجوزة علشان يتعملها فحوصات

فانت وبكل أسى هتسكت

وبعدين الدكتور بقى يقولك طب افحصلى الوجه أو الأيد

وده سؤال ظاهره الرحمة ولكن من باطنه العذاب


لأنك هتقوله عشرة خمستاشر حاجة انت عارفهم

فهيبصلك بكل قرف ويقولك بس

وبعدين يقولك افحصلى كذا

وأول ما تحط ايدك على العيان

يقولك ايه اللى بتهببه ده مين ال.... اللى قالك كده

أصل الكارثة ان كل حاجة وليها كذا طريقة للفحص

وكل دكتور متبنى طريقة أو مفتكس طريقة

والأنكى انك مطالب تعرف ان الدصنانور الفلانى بيحب كذا والتنين العلانى مايعرفش الا كذا

والأضل سبيلا ان بعضهم مقتنعين بحاجات مش صح أصلا وعكس المعلومة الصحيحة

ولو قولتله الصح هتلبس يا معلم

يعنى لازم نداديهم ونحايلهم

تصوروا مثلا فى واحد مسكين فى دفعتنا دخل على تنين من اللى بيطلعوا نار

وقالوا افحص كذا الولد عمل

قاله ايه الهباب ده

وبعدين جاب نايب يعملها برضه معجبهوش وقاله زفت

وبعدها جاب مدرس مساعد يعنى واحد معاه ماجستير

وبرضه معجبهوش وقالهم انتو التلاتة زفت

وفى الأخر الولد اخد 70 من 130

يعنى 60 درجة استفتاحة على الصبح كده

ربنا المنتقم
بعد هذا كله ممكن يسألك حتة كده موجودة فى أعماق كتاب باطنة منقرض
من أمثال الحلمنتيشى سيندروم والبرورروم المستعرض

وأكيد مش هتكون حتى سمعت عنه

وأخيرا هيقولك أعتقد كده إنك ما قولتيش حاجة

وهيحط درجة دون حتى ما يفكر ان كل ذنب اللى قدامه انه دخل طب وحظه العسر وقعه فى سكته

الكارثة ان معظم الدكاترة ليهم سقف فى الدرجات
يعنى فلانى الفلانى اخره 100 مثلا يعنى اعمل قرد هتاخد 100

وعلى هذا فقس وطبعا الدرجة النهائية تعد ضربا من الخيال العلمى

إحنا إن شاء الله سنعقلها ونتوكل على الله

وإن شاء الله على اخر الأسبوع القادم أخلص الباطنة

قصدى الحاجة باطنة أم خمس أيام ده
وربنا يطلعنى منها على خير إن شاء الله