إزيك يا مودى عامل ايه
ده جارتنا اللى قدامنا بتكلمنى
وجارتنا فى البلكونة اللى فى العمارة المقابلة بينا وبينهم جنينة صوغنتوتة
وحيث ان احنا فى الدور السادس فبتحس ان كل ما العمارة تعلى باقرب من العمارات التانية -
طبعا ده مجرد احساس
المهم بس علشان مانروحش بعيد عن الموضوع
أنا رفعت راسى كده ببص عليها وفى ايدى المشبك - اه كنت بنشر الغسيل- استروا عليا ربنا يسترها عليكم
لقيتها واقفة كده ولابسة براحتها حر بقى انتو عارفين
طبعا العبد لله وشه قلب لون الميكروكرون - إلا بالحق الميكريكرون ده يعنى عبارة عن ايه-
قلتلها الحمد لله
قاللتلى وماما عاملة ايه
قلتلها تمام
قالتلى سلملى عليها
قولتلها الله يسلمك يوصل ان شاء الله
أنا مش عارف انتو ايه دخلكوا بالموضوع ده بتتصنتوا علينا ليه
:D
المهم أنا لقيتها واقفة بتعمل حاجة فأنا اتكسفت ودخلت من البلكونة
وبعد شوية أكمل نشر الهدوم
المشكلة انه المشابك ده وحشة وعايز مشابك جديدة
وكمان الحبال لازم انضفها كويس
لأ لأ مش دى
المشكلة فعلا ان جيرانا لسه فاكرينى مودى بتاع زمان
اللى كانوا بيلعبوا بيه وياختى خدوده أنتش والكلام ده
ايوة جارتنا زى والدتى لكن برضه أنا مش لسه نونتش
ده برضه مش مشكلة عويصة
المشكلة بقا ان الشباك بتاع صالتنا يطل على شباك الصالة بتاعتهم
وتتجلى - حلوة تتجلى صح- بقا المشكلة فى الحر ده
خاصة بعد المغرب أول ما الجو يتحسن
ونبقا عايزين نفتح الشباك
علشان يجيب شوية هوا طبيعى
هما برضوا بيفتحوا الشباك
وحيث أن جارتنا عندها بنات ومش صغيرين
فالستارة هنا لازم تتقفل
هما يفتحوها واحنا نقفلها
مع اننا الأولاد
أصل هما عايزين ياخدوا راحتهم
المهم بقول لماما بتقولى هيا بتقول عليكم انكم زى أولادها
قولتلها أولادها فى كل حاجة إلا ده
الكارثة انها مرة بتكلم ماما وبتقولها هما بيقفولوا الستارة ليه
خليهم ياخدوا راحتهم
أنا مبقتش فاهم صراحة
والأنكى انى مرة كنت بقفل الستارة وزوجها شافنى
عمو يعنى
وقاللى بتقفل الستارة ليه خد راحتك
طبعا أنا كنت مذبهل وهو بيقولى الكلام ده
ياعم ده مراتك وبناتك اللى موجودين قدامى دوول
بس هقول ايه بقى
مش بقولوكو ناس طيبين قوى
بصراحة عدا هذه النقطة هم جيران ولا أروع
محترمين عمرهم ما ضايقونا إلا فى ده طبعا
بس أنا مش عارف حل بقى للموضوع ده
أعمل ايه
أبعت للبرنامج الخنيق أريد حلا
ولا أعمل ايه بالظبط
بعد إذنكم أكمل نشر الهدوم
___________________________
ملحوظة: أنا أهو بعدت عن الكآبة اللى الناس اتهمتنى بيها البوست اللى فات
وعملت كمان تحيديث لبوست امتحانات العصبية بناء على طلب الجماهير
29 comments:
اول رد
:D
حلوة جيت وعلقتش كانك مجتش دى
المهم
انا على حد علمى اسمه ميكروكروم
و لسة كنت مجرباه انا وسخسوختى من كام يوم على ايدنا و طلع بيطلع بالصابونة عادى
ففكرنا نحطه على وش واحدة نايمة فينا
ما علينا :D
انا عارفة فعلا انت بتعانى قد ايه من كبت حريتك جوا بيتك
حاجة تخنق فعلا
احنا كنا بنعانى من نفس المشكلة السنة اللى فاتت
كان قدامنا طلبة جامعيين غراب
وكنا بنحب نذاكر فى البلكونة طبعا بنبقى لابسين الحجاب بس الرخامة بقى انت عارف
وكنا مبنتهناش ربع ساعة على بعضها
ربنا يكرمهم مطرح ما راحوا
ورغم كدة البوست دمه خفيف اوى
ههههههههههههههه
بوست جامد جدا يا دكتور.. وبعدين إنت زعلان ليه؟؟ حد يلاقى سينما صيفى زى كده وميتفرجشى .. طبعا كلام يودى جهنم حدف .. ربنا يسامحك يا ميوشة
بس أكتر حاجة ضحكتنى عمو اللى مش عايزاك تقفل الستارة ده ..ههههههه مش ممكن دمه زى العسل ... مش أبويا اللى بهدلنى لما لاقانى مبينة شعرى قدام ابن خالتى اللى فى 6 إبتدائى.. الواحد كان عايز كده أب لارج
بس بجد ربنا يحميك ويقويك علىنفسك .. بس زمان ولاد كتير بيقولولك يا بختك يا عم مين قدك..ههههههههههه
ههههههههههههههههههههههههه
هههههههههههههههههههههههههههه
ههههههههههههههههههههههههههه
لا بجد جيرانكم دول ولاد حلال
وخدوا راحتكم وافتحوا الشباك يااخى الدنيا حر
تحياتى لك ولخفة دمك
هههههههههههه
طيب طالما الناس واخدين راحتهم , انتو كمان خدوا راحتكو وخلي الشعب يعيش
هو الحل الوحيد ان مامتك تكلمها وتقولها بينها وبينها كدة لعل وعسي
بريك دخلت قامت بالواجب
اما عن البوست فانا دحكت كتير على خدو انتش دى لانى مش فهمتها
و ضحكت اكتر على صورة المسبهل على رد عمو
و الله يابنى انت الصح و هم الغلط..الطبيعى ان هم اللى يقفلوا الستارة
بس اقولك على خبيث حبه
هات مرة حبه من صحابك و افضلوا فاتحين الشباك مش لازم ترزلوا بس على الاقل يفضلوا اصحابك ناحيه الشباك..ساعتها بس البنات دى هتضايق و هم اللى يقفلوا الستارة
و لو صحابك بعد ما مشيوا فتحوا الستارة تانى قعد انت بأه تنح فى الشباك شويه
حل ولا اروع اهو
"وش خبييث موووت"
والله شوية بنات شاطرة عرفت تخليكوا انتم اللي تقفلوا الستارة
المشكلة في نظام البناء عندنا في بلدنا تحس انك في بلكونة الجيران ده اذا كان فيه بلكونة وكنت من المحظوظين
بص يادكتور اللي عنده تكييف فيكم هو اللي يقفل الشباك لكن اللي ماعندوش هو اللي يفتح براحته
كدة حلتهالك وعداني العيب هات الحلاوة بقي
انا من راى سنو وايت مامتك تكلمها او لو عندك اخوات بنات اختك تكلم واحده من بنات جيرانكو بالمحسوس كدا وتفهمها انه ميصحش يعنى
خلاص انا هعلق اهو
ههههههههههههههههههه
عسل
وصورة الواد النونو دى قمر
يارب ابنى مستقبلا يكون كده يارب
ننصحكم بضبط النفس
استمر فى قفل الستاره اللى فى ريحنا
الامر لصاحب الامر
ياه فى ناس طيبه كدا.... وبا الشكل دا, وفى الزمن الطيب اللى احنا فيه دا, دا الدنيا لسه بخير بقى وانا لسه ......, بس اوعك يا راجل يا طيب تفتح الستارة, نصيحه من اختك الصغيره , وكمان لازم تعرف انك مش الوحيد فى مصر الطيبه اوى بتعانى من المشكله دى... هى مشكله برده... حكم احنا الشعب المصرى بنعمل من الحبه..., المهم انى فيه ناس كتير زيك وعاتى بردوا... بيقفولوا الستاره بردوا من الناس الطيببن. والله انا مش عارفه اقوللك ايه غير انك طيب والناس جيران طيبين قووى, مع اختلاف المعنى المقصود من كلمة( طيب) .. بس قولى يا دكتور هو ايه( المفرود( نقوله على الناس( الطيبين),وبعدين انا والله مش عامله مستر اكس ولا حاجه, انا مش عارفه مش عارفه المدوونه بتبان ازاى, مع انى حاولت كتير.. يقولى حفظ الاعدادت سيستغرق عدة دقائق ولا كدا... وبحيك على مدونتك وفى انتظار الامتحانات العصيبه... وربنا يعدى امتحاناتنا على خير وعلى كل المسلمين.. يااااارب
ياااه على كده كل الجيران طيبين خالص
الطيبة فى كل مكان يا سلااام
عمااار يا ايجيبت
المهم كويس إن حضرتك موقعتش المشابك زى ناس بتتلخبط وتوقع نص المشابك وتدخل وشها مذبهل
غالبا حتى لو اقترحت عليك تختار ميعاد مختلف للنشر (الغسيل يعنى) هتلاقى برضه في ناس صاحية
احنا عندنا الناس الطيببين ورديات طول النهاروالليل
لكن الزم ما أنت فيه واقفلوا الستارة طبعا :)
يااه طولت خالص معذرة بس بجد مدونة حضرتك حلوة ربنا يوفقك ويتقبل منك
بص يا دكتور هو الحل الوحيد انك انت واخواتك تجوزوا البنات دى لان واضح جدا ان اهلهم بيرسموا على كدة
وساعتها هايبئى زيتنا فى دقيقنا
وونرخى الستارة اللى فى ريحنا
السلام عليكم
صحيح مش ممكن يكون أهل البنات دول
شايفينكم مؤدبين وبيفكروا ياخدوكم
عرسان لبناتهم يالله مبروك يا عم
تحيـــاتي
السلام عليكم ورحمة الله ازيك يادكتور وازاى حال المذاكرة وكمان(بحس واطى اهوه علشان ما حدش ياخد باله بقولك ازى حال الغسيل والنشير ماشى تمام!!!عفارم عفارم)
المهم اولا ياسيدى الباش دكتوررررر الميكروكرم ده =الميكركروم= كرومات الزئبق بل هو كروم وزئبق MERCUR & CHROM
ويستخدم الكروم و ( الكوبالت ) عادة في تلوين العناصر التي تخلط به !!
وبالنسبة للزئبق قد استخدم منذ مدة كمادة خام في الآت القياس كالترمومترات وغيرها .
وهو مادة قاتلة للبكتريا و مساعدة على تجلط الدم تستخدم في الجروح و إن كان لها أضرار مكتشفة حديثا والأفضل استعمال البيتادين(بوفيدون أيودين) ذو فعالية أكثر و بدون أعراض جانبية..
*******دى أجابة جبتهالك من عمنا الكبير اوى جوجل
وكمان عايزة اقولك زمان كنا بنستعمله عمال على بطال لكن دلوقتى بطلنا استعماله بناءآ على اوامر منظمة الصحة العالمية ....قال ايه سام !!!!ياسلام!!!...والملايين اللى استعملوه قبل كده ما اتسمموش ليه ؟مش عارفه
واذا كان على جارتكو وزوجهاوبناتهااصدق وصف ليهم
(عالم ماعندهاش دم بتاعة خليل اللى فى مسلسل ونيس فعلا عالم ماعندهاش دم
كان الله فى عون من عنده جيران زيهم
وماااااااا أكثرهم
تحياتى وتمنياتى ودعواتى بالنجاح للكل
break:
اه مش أحسن من يا تعلق يا تتعلق :D
أنا كان قصدى تركيبنه العلمية يا دكتورة - مستقبلا يعنى-
شوفتى أنا مسكين ازاى وانتى بتطلعى البلكونة ليه هه وكمان بتلبسى حجاب ماتخدى راحتك انتى كمان :D
المهم مش هما راحوا فى داهية قصدى يعنى ربنا غورهم من عندكم
يبقى الحمد لله
وشكرا على الإطراء الأخير ده
maiosha:
ربنا يسامحك روحى يا شيخة وتعالى بسرعة:D
شوفتى عمو طلع اكس لارج ازاى
وربنا يخليلنا الرجالة اللى زى والدك
يا رب أنا عاجبنى وهو سمول small
:D
قصدك الناس هتحسدنى أنا مش شايف ده ميزة
وربنا يسهل
شكرا على زساراتك والريدر ;)
رئيسة حزب الأحلام:
يعنى ده رأيك
ممم محتاج شوية نظر
سنووايت:
ههههه
نخلى الشعب يعيش ههههه
باقول لماما تقولى هما ياخدوا راحتهم وانتو اقعدوا فى غرفكم :(
ماما بتتامر معاهم سيدتى
sa7'so7'te:
خدوده أنتتش يعنى حمرة كده ومكلبظة :D
اه الصورة مذبهلة قوى
نتنح ونرذل هههه
مين ده أنا بقولك باتكسف تقولى تنح
ده صعبة جدا معاليكى
ده اسمه وش تتنيح مووت :D
المفقوعة مرارتها:
العمارات مبنية كويس بس المشكلة فى المسافة الخلفية بينا وبينهم يعنى الشارع عرضه حوالى 20 م
لكن بين ضهر عمارتنا وضهر العمارة التانية جنينة 6 م هى ده البروبلم
بس ايه الإقتراحات الجامدة ده اه ما أنا بقوا اللى حاطط فى الصالة تكيف يشغله بقى وهبقى ابعتلك حتة حلاوة
desert cat;
الأول شكرا على الزيارة
اه عندى اختين بس الكبيرة مش عايشة معانا بعد ما اتجوزت طبعا وهى برضه كانت بتتامر معاهم علينا :S
sometimes:
شكرا على الزيارة والتعليق
أما الواد الصغير فشبهى وأنا صغير أيام الطفولة بقى الله يرحم
ربنا يرزقك بطفل شبهى أقصد شبهه يعنى مش فارقة كتيير :D
dodda:
ماشى يا فندم
وشكرا على الزيارة
حنين: الى مطلعتش مستر اكس وطلعت مظلومة وبريئة براءة الذئب من دم ابن يعقوب :D
متخافيش على موضوع الستارة ده حتى ماما جايبة ستاشر تقيلة ماتبينش حاجة خالص
أما عن الكامة اللى مفروض تتقال أنا بصراحة استقستها - من القسوة يعنى- عليهم
وربنا يستر علينا فى الإمتحانات ودعواتك
خديجة عبد الله:
أهلا بالناس المحظورة ده :D
بجد نورتينا
عمار يا ايجيبت أى معاد فعلا موجودين
ومتقلقوش من موضوع اليتارة أنا خلاص بافكر أمسمر الشباك
شكرا على الزيارة والبيت بيتك اتكلمى زى ما انت عايزة
سبهللة على الآخر:
هههههه
برضه عايزاها سبهللة
جواز ايه هو احنا وش ذلك :D
أمل:
حتى انت كمان
الأدب مابأكلش عيش حاف :(
أصرفه من أياها بنك ده
Norahaty:
شكرا على المعلموات الجامدة ده يا دكتور - أصل مالهاش مؤنث- :D
أما انهم منعوا استخدامه لأتهم عايزين الزئبق لحاجان نانية
أما جيرانا فأنا بصراحة تأقلمت على كده وهما زى ما قولت هيا ده المشكلة الوحيدة يبقى الحمد لله
ودعواتك معنا
بصى يا سيدى هقولك طبعا انت علشان محترم فهما مش خايفين منك بس برضه عيب هما مش عاوزين يضيقوا عليكم ولا على نفسهم
انا كان عندى المشكله دى بس تخيل مع مين جارة واحده ست بتقعد تبص هى عليا ههههههههه اه والله اقرى ليه بوست قديم اسمه الجارة الجاسوسه
المهم عملت تنده يعنى ممكن تعملوا تنده على الشباك صغيرة وبجد الهواء هيدخل عندكم وتبقوا براحتكم وهما كمان
ولو سمحت ربع جنيه لحل المشكله بقى ابعته لعى الكوكب اى خدعه
يا ختي خدودة أنتش
أنا يا عم عمر ما حد قللي كده وأنا صغير ... أكيد أنت اللي كنت بخلي الناس تاخد عليك زيادة عن اللزوم
قليل من التفكير:
اه معاك حق
شكرا على الزيارة الجامدة ده
ya 3am e7med rabak we bos edak wesh we dahr
mesh a7san menny 3azelt fe share3 mafeehsosh 7ata dbana gamda
ya 3am mesh 3agbak badel ma3aya
:@:@:@:@:@
sa7ee7 elly fe ne3ma mesh bey7es beeha
lol
Post a Comment