أزهرى أنا

نشرت جريدة المصرى اليوم فى عدد الإثنين الى هو النهاردة يعنى

خبر عن التباحث فى فصل الكليات العلمية عن الشرعية بجامعة الأزهر

وان عم نظيف بيقترح فصل الكليات العلمية اللى هى الطب والهندسة والعلوم والحاجات ده

عن باقى الكليات الشرعية

والظاهر معاليه ناوى يرجع طلبة الأزهر تحضر للشيوخ فى الجامع الأزهر وكل شيخ ليه عمود بتاعه

يسنده لحسن يقع عليه وعلى تلامذته

والجو ده اللى انتو عارفينه بتاع مسلسل المراغى والشعراوى

ولكن الأساتذة بتوع مجلس إدارة الجامعة عايزين يلموا الموضوع

وقالوا بكل حزم لن نسمح مطلقا بفصل الكليات

لكن بعد كده قالوا

إلا بموافقة مجلس إدارة الجامعة

وحيث إن الموضوع دخل فيه إلا وإذ قد ربما و حيثما والحاجات ده

يبقى قصدهم الموضوع قدامه شوية وقت

وللأسف الشديد كده أول مسمار قول أول شوية مسامير

فى نعش الكليات العملية بالأزهر اتحطوا

لكن اللى فعلا مش فاهمينه ايه المشكلة إن الأزهر فيه طب

ويعنى المشاكل بتاعت الأزهر هتنحل لما يفصلوا الكليات العملية

وكإن الكليات العملية هى اللى يا عينى قللت من مستوى الأزهر ككل

والتعليم أصلا فى بلدنا خربان من فوقه لتحته أزهر وغيره

اشمعنى الأزهر يعنى اللى عايزين يحلوه

********

وفى نفس المقال يقول العميد السابق بتاعنا اللى نفسى أتبرأ منه

يقول كلام يفور الدم ويخليه يندلق كمان

سعادته بيقول

يجب أن نتخلي عن فكرة الطبيب أو المهندس المسلم

وعلينا أن نعترف بوجود قصور فعلي في مستوي طلبة الأزهر

شوفتو الكلام

ده للأسف كان عميد كليتنا

قال إيه فكرة الطبيب المسلم يجب أن نتخلى عنها

طيب نتبنى ايه فكرة الطبيب الهشك بشك مثلا

فكرة الطبيب عضو نادى الروتارى

نتبنى فكرة الطبيب الذى بلا مبادئ

فيه ايه هو احنا بنرجع لورا ولا الدنيا بتمشى بقفاها يا عم الضكتور

وحضرة الأستاذ اللى مش قادر أقول عليه المحترم مسكتش وقال بعد كده

إن فيه قصور فى مستوى طلبة الأزهر

طب كده العيبة فى وش مين يا حضرت

حضور ومابتجوش وشرح بنتحايل عليكم تشرحوا ومافيش فايدة

طب نعمل ايه المفروض الأساتذة هى اللى تتغير

بجد أكتر طلبة بتنحت فى الصخر طلبة الأزهر

الدروس عندنا مش منتشرة كالجامعات الأخرى

معالى الباشا لو الأزهر مش عاجبك حضرتك ممكن تتفضل وتسيب مكانك

لحد فعلا معتز بإنتمائه للأزهر

ثم ايه علاقة الكلام الفاضى ده ومستوى الطلبة بفصل الكليات

ما لو حدث الفصل سيبقى الوضع كما هو عليه

والأساتذة هيفضلوا هما هما

والتهدور هيفضل

أى نعم هيجى بقى طلبة مالهومش دعوة بالأزهر

لكن سيؤول بهم الحال للتدهور لا ريب

********

أنا بس عايز أقول للناس اللى بتدق المسامير ده بتاع النعش

بالطريقة ده بتقضوا على الأزهر

مفيش حد هيدخل ابنه الأزهر بعد كده لما يعرفوا إن مافيش إلا كليات شرعية

ومش هيدخل إلا عدد محدود جدا

واحنا مش ناقصين بعد عن ربنا

والسطحية الدينية اللى احنا فيها هتزيد

بجد أنا بأقابل ناس ما يعرفوش أساسيات فى الدين بسيطة

وبيكونوا خريجى كليات محترمة

أنا بأقول للمسؤلين اللى هتعملوه ده فعلا سيئة جارية

هتكون سيئة جارية كبيرة قوى

معنى كلامى إن السيئات بتاعتكم هتزيد كل يوم

وإنت قاعد فى بيتكم حتى بعد ما تموت

أنا نفسى بس تحضروا إجابة السؤال ده لما ربنا يسألكم

عملتو كده ليه؟

*******

بالرغم إنى فعلا اتبهدلت فى الأزهر

لكن ليه فضل كبير عليا كفاية حفظت القرأن

من أول إعدادى باتعلم فقه وحديث وتفسير

أعرف فى النحو والبلاغة حتى الأن الكثير

أحفظ مئات الأبيات من الشعر فى كل الفروع

يا جماعة الأزهر علمنى ازاى أكون مسلم صح

هتقولولى ده طلبة الأزهر زفت

هقولكم العيب فيهم مش فى الأزهر

مش معنى الكلام ده كله إن الأزهر تمام التمام ولا تشوبه شائبة

لأ طبعا

الأزهر محتاج تطوير كبير على كل المستويات والمراحل المختلفة

محتاج تطوير مش إبادة يا أصحاب الفخفخينا

ويبقى السؤال اللولبى

لما يحصل فصل الكليات والمستشفايات والأساتذة والأفلامانات ده

هيبقوا تبع مين؟

أنا بأقترح الأمم المتحدة