الأسبوعين دول الروند بتاع الأمراض النفسية
فعلا أكتر مريض يصعب عليك
أكتر مريض منبوذ من المجتمع
شفت مرضى نفسيين قبل كده فى التليفزيون
بس طلعوا من خيال المخرج
قليل قوى منهم اللى ممكن يأذى
التليفزيون فهم الناس غلط
الناس بقت بتخاف منهم
بدل ما تحاول تقرب منهم بتبعدهم
كده هما بيزودوا فى مرضه
*********
معظم المرضى النفسيين من الطبقة المتوسطة
لأنهم لا منهم طايلين فوق ولا تحت
متعلمين لكن مش لاقيين
متعشمين لكن مفيش فايدة
فخد عندك بقا
إشى إكتئاب
قلق مرضى
فصام
ومن الصدمة يجيله هلع
وفى الآخر يدروش ويسيب دقنه
والناس تعمله بركة
وهو أصلا يا ولداه مسكين
مريض عايز يتعالج
**********
ليه الناس بتخاف تروح للطبيب النفسى
بذمتكم مش كلنا كده عايزين شزلونج ونفضفض
امال إحنا عاملين مدونات ليه
علشان نفضفض
مش معنى انك تروح لطبيب نفسى انك مريض
المفروض كلنا كده نروح لدكاترة بتاعت طب نفسى نفضفض
قبل ما أهالينا يودونا غصب عنا
بعد فعلا ما يكون اللى حصل حصل
فى الأماكن الشعبية الناس بتروح لعم الشيخ
المعالج الشعبى
النصابين دول
الغريبة انهم ممكن يدفعوا أضعاف اللى بيدفعوه للدكتور
علشان يفك العمل اللى الراجل وهمه انه موجود
أنا مش عارف فلسفة الطبيب النفسى عندنا ضايعة ليه
إحنا فعلا فى أمس الحاجة ليه فى الوقت الحالى
الذهول اللى فى عيون الناس
الناس كل واحد بيكلم نفسه
المفروض اليومين دول عيادات الدكاترة النفسيين تبقى زحمة
لكن الناس لسه برضه بتخاف من الكلمة ده
ربنا يهدينا
ويرفع عنا البلاء
13 comments:
أول تعليق وسعيدة اني اكون اول من يعلق علي موضوع عن الطب النفسي
انا باعشق الطب النفسي صحيح مش هاتخصص فيه , بس هو علم جميل ودراسته ممتعة
اما بالنسبة للمرضي فهم بشر زينا وطبعا فكرة الاعلام عنها خلت الناس تنبذهم زي مانت قلت , انا في امتحان الباطنة كان احد مرضاي مريض نفسي "سكيزوفرينيا" وكان الحديث معاه ممتع جدا , اتمنيت بجد انه يتعالج ويرجع طبيعي تاني
اكيد كلنا عندنا مشاكل نفسية بس مش لدرجة المرض بدليل اننا عايشين بيها , بحس المرض النفسي هو اللي ممكن يعطلك عن حياتك , او احيانا فعلا بنمرض وبنخف من غير ما نحس اننا كنا مرضي
انا بضم صوتي لصوتك لتحسين صورة الطب النفسي سواء بالاعلام او بأي طريقة تانية
عذرا علي الاطالة بس الموضوع شدني
انا رديت علي تعليقك في سر من حيرت العالم وعذرا للتاخر في الرد
جزاك الله خيرا ع التذكره انا شايفه ان النفس لاتقل اهميه عن اى عضو يحتاج للاهتمام والا يجى وقت ويمرض
وده فى كل حد فيينا بيتعب نفسيا بس كل مازاد الاهتمام بيها قل المرض والنفس بتستمد قوتها من العلاقه الروحانيه بين العبد وربع وكل ماعبد العبد عن ربه كل ماكان فى جفاء لنفسه ويزيد تعرضه للأزمات
انا نفسى اروح لدكتور نفسى
بس ماما مش راضية
والله يا دكتور عندك حق كلنا مرضي نفسين ومحتاجين نتكلم ونفضفض
احمد زكي كان بيوصف الدكتور النفس بأنه صديق بأجر
تحياتي لك
الشعر والأغنية جامدين قوي
سنووايت:
أهلا وسهلا أنا بقول البلوج كله أنوار ليه كده
آه فعلا يمكن مابنوصلش للمرض النفسى الكامل بس إحنا فى الطريق للأسف.
يمكن الوقاية خير من العلاج.
بس بجد أول مرة أعرف أن امتحان الكلينيكال فيه نفسية الشيت بتاعها عايز تمرين.
فى الراوند كانوا بيجيبوا حالات وكان أصحابى بيخافوا ياخدو الشيت و قعت أتكلمت معاهم أنا كلمت واحد عنده هوس وواحد عنده فصام وواحد عنده
Post traumatic disorder
ده كان مسكين جدا ابن أخته غرق قدامه :(
فعلا اتشرفت بالزيارة ده
وشكرا على الرد
وابقى زورونا كل سنة مرة D:
هوندا:
أهلا بيكى فى المدونة المتواضعة
فعلا النفس لا تقل أهمية عن الأعضاء بل إن إرادة الشفاء والثقة فى قدرة الله مهميين جدا فى رفع المناعة.
أما بالنسبة لقرب العبد من الله فلا شك أنه شئ محبب لكن لا يعنى ذلك أن الملتزم والمتدين لا يصاب بأمراض نفسية بل هم من أكثر الفئات عرضة للإصابة بالوساوس
متشكر جدا على الزيارة والتعليق.
بريك:
طبعا انتى صاحبة مكان دلوقتى :D
والدتك مش راضية علشان الناس ماتقولش عليكى مجنونة.
خيفة عليكى كعادة المصريين.
مصطفى ريان:
أهلا بيك نورتنا
اه فعلا الفضفضة مهمة
على قول اللى قال :
ولا بد من شكوى لذو مروءة
يواسيك أو يداويك أو يتوجع.
يتشرف جروب السته بتوع صيدله
بدعوه حضرتكم على حفل افتتاح بلوجهم الكريم :)
شكرا علي مرورك في مدونتي وشكرا كمان علي ردك وتعليقك وانا لسة مبتدئة في عالم التدوين
اد اية رائع كلامك عن الصحة النفسية وعالم علم النفس وفعلا ليك حق محدش عارف ان المرضي النفسيين دول ناس عادية مش زي اللي بنشفهم في التليفزيون
واسمح لي ابقي ازور مدونتك
الغجرية ست جيرانها:
شكرا على المرور
اه فعلا فى مفهوم مغلوط للأسف
وأهلا ومرحبا بيكى دائما
eh ya doc, enta nawy tet5asas nafsy wla eh:d
3la fekra ana bahazr
ana ma3ak fe kol kelma 2oltaha
bas ana 3an nafsy
223od ma3 wa7ed sa7bby akalalemo a7san men el doctor 3la el 22al haykoon sa7by fahemny aktar
we akeed mesh ay sa7eb "wa7ed zayak keda;) "
we bassssssssssssss
ashoofak 3la 5er
فعلا الموضوع جميل
انا بعانى من مرض نفسى برده
بس مش قادر اعالج نفسى
بس انا متفائل جدا و عارف ان كل واحد ليه وقت و ربنا بيكرمك
اتمنى الشفاء لجميع المرضى و انا حبيت ان اضع رابط لشات مجانى
للمرضى النفسيين و الغرض منه ليس تجارى حيث انه غرفة ممكن اى حد يعملها فى موقع كبير هذا هوا الرابط
http://tinychat.com/lsoxl
ممكن تتحدث صوت او صورة او كتابة كما تحب
و الحمد لله على كل حال نعم المولى و نعم النصير
Post a Comment