"الأجرة 75 قرش يا جماعة"
ده كان سواق الميكروباص
قبل ما يكمل كلامه الراجل اللى ورا طلع صوت عميق من قاع الأنف
وقال كلمة إعتراضية بيقولها الإسكندرانية معناها أرفض حدوث هذا
وقاله "ليييييييييييييييييييه مش كانت 50 قرش"
وانطلقت صيحات استنكار مماثلة من باقى الناس
السواق ضرب فرامل كربسنا فوق بعض
وطلع ورقة كده وقالنا
" المنشور بتاع الأسعار أهويا جماعة الجازغلى"
الراجل اللى ورا -هو بعينه- بيقول
يعنى ياخدوا منا العلاوة قبل ما يدوهالنا
مش عايزينها منهم بس يسيبونا فى حالنا حكومة بنت ............... وبلد........ وريس ............
الفراغات ده مكانها ألفاظ بذيئة - حلوة بذيئة ده -
الراجل اللى قدامى علطول بيقول أوعى يكونو هيغلو اللحمة كمان
الراجل اللى جانبى مات على نفسه من الضحك وقال لحمة ايه هيا فين ده
هو احنا بنشوفها أصلا يا دوب باسمع عنها سمع خير
اللى فات ده موقف كده حصل امبارح
معرفتش اكتب غيره لأن باقى المواقف ألفاظها مبتذلة وقميئة -ايه قميئة ده -
الناس مذهولة من اللى حصل
كل واحد عرف انه انضحك عليه
ونفسه يمسك اللى عمل فيه كده
بس المرة ده القفا اللى خدناه كان شديد شوية
الريس قلهم هنديهم بزازة نسكتهم بيها
الناس المساكين والمنافقين برضه طلعوا يقولوا
هشكنا وبشتكنا يا ريس
ده انتا رئيس والنعمة كويس
والحكومة قالت تحت أمرك بس لو معاها ضربة على القفا ماتضرش
اللى لسه ماطلعهوش بالشمال أخدوه باليمين
كام مليون استفادوا من العلاوة ده
وكام مليون تتضرر منها
العلاوة طلعت علاوة على ماسبق سنستكمل عملية اقفاركم مش افقاركم
لأن هما فقرونا من سنين
قاللو اكده بنساعد محدودى الدخل محدودى الدخل
اه علشان يخلوهم مدعوكى الدخل
يعنى ماعرفوش يصبروا شهر كده وبعدين يدونا القفا
المهم احنا ساكتين ليه
أهم زودوا عدد اللى بيضربونا على قفانا - حسب النكتة - اللى مايعرفهاش يقوللى وأنا أقولها له فى الخباثة
القفا ورن خلاص
يا جماعة من أُستغضب فلم يغضب فهو حمار
أنا مش عارف هما متوقعين رد فعلنا ايه
هما أكيد قاللوا دول هيولولوا شوية وبعدين يسكوتوا
اااااااااااااااااااااااه يانى - أدينى كتبتها-
لأنى مش قادر أقولها
يا ريت تيجى على كده
ده الناس بتقول يا ريت تيجى على قد كده
بيرضوا بقليله
بس لسه و لسه
البلد ده مش هتفوق إلا على كارثة
تيجى خمناشر تمناشر ريختر
أصل القفا ده كان بتاع تكعة ريختر
لكن عندما تأتى الصاعقة سيفيق الناس
للأسف أرادونا خانعين فكنا
أرادونا مذلولين فكنا
أرادونا مفلسين فمكدبناش خبر
ساقونا إلى الهاوية فقفزنا فيها
اتى أشتم رائحته العطنة
انها تزيد يوما بعد يوم
رائحة قاع الهاوية
الذى نقترب منه
ربنا يستر
يا رب من ولى من أمرنا شئ فشق علينا فاشدد عليه
اللهم إنا نبرأ اليك مما يفعل هؤلاء
ربنا لا تؤاخذنا بما فعل سفهاؤنا
كفاية نكد على كده
وسلملى على المترو - إلا بالحق غلى وللا لسه-
وتحيا مصر بتاعتنا مش بتاعتهم
وصبح صبح يا عم الحاج
14 comments:
sabba7 sabba7
7kooma btenta7 w tebta7
w sha3b msh 3ref le bo2o yfta7
معرفش أقول أكثر مما قيل, كويس ان الناس حست انها انضحك عيلها , هنعمل ايه؟ ولا حاجة في الأغلب , زي الحاجات اللي بناخدها في الطب , أي عضو يتحط تحت ضغط مش بينطق ولا بيشتكي , بيفضل يشتغل لحد ميوصل لمرحلة ميقدرش يشتغل اطلاقا يقوم بكل ببساطة بيموت بهدوء.
حصل تقريبا نفس الموقف معانا
احنا بنروح طنطا علطول
بدل 150 بئت 175
وفى ناس اعترضت بردوا بس بطريقة أقل شوية
طلبة بئا وكدة
ربنا يستر مش عارفين بجد هنروح فين بعد كدة
اهو سكتهم ومحدش عمل الاضراب
وبعدين عملنا فجأة خرعتنا
شلبى :
بصراحة تعليقك أحسن من البوست
فعلا شعب مش عارف لبقه يفتح فالمفروض ياخدوهوم على المدبح وصبح صبح.
درش:
فعلا بس العيان برضه بيموت معاه
بريك
أنا برضه مش عارف
بس اللى عارفه إن الناس ده مض هتورد على جنة ولا حتى على نار
ههههه
تقريبا المواصلات اكتر حاجه الناس بتطلع فيها غيظها وكبتها
روغم انا لناس كلها تقريبا عرفت ان المواصلات غليت الا انهم هيفضولا يتكامو فى الموضوع ده شهر
مجرد كلام ليس الا
تحياتى لك
ميرسىى مووت على الكآبه اللى كآبتهالى
ربنا ينتقم منك هو الواحد ناقص مش كفايه عليه مذاكرة السيوتكس اللى مش فاهما منها حاجة دى
يابنى اعمل نفسك مش واخد بالك و ادفع وانت مبتسم للحياه هتستريح كتير
الصراحة اجمل حاجة الدعاء اللى فى الاخر عشان ربنا عمره مابيضيع حق حد
bos yabny el7md lelah enaha gat 3la ad keda...2Adeeny 2olt el7md lelah:D
salby ya3ny"btkalem 3la nafsy tab3an"
bas enta akeed 3aref en ana mesh keda
el mohem el7md lelah enaha gat 3la keda, kman yomeen hayo2af abl el maw2af be 7awaly 3 aw 4 ma7atat we ye2olak el 5at 5eles 3shan el banzeen 3'ely aw 7ata el gaz, ya a5y elahy yewla3o homma bel gaz wel banzeen
el mohem el 7md lelah tany, howa e7na leena meen 3'ero
howa fe 7aga kman 3ayez 22olha bas 5aleeha ba3deeen mesh 2odam el nas:P
yalla salam
رحيل " لا ترحلى "
نورتى البتاعة ده اللى مش عارف أقول عليها ايه هو تصغير بلوج ايه بلوجاية :D
آه فعلا هيفضلوا يتكلموا ويبعبعوا بس هيقولوا برضوا لأولادهم مالكومش دعوة بالسياسة
سخسوختى وكمان بريك
مش عارف أقول ايه بس أعضاء الستة بتوع صيدلة فى مدونتى يا مرحبا يا مرحبا
لا شئ يدعو الى الكابة الحياة وردى كده أنا أبقى كداب " يا بخت من بكانى وبكى الناس عليا ولا ضحكنى وضحك الناس عليا"
وبعدين انتى شوفتينى عملت ايه يا دوب قولت بقين كانوا واقفين فى زورى وبعدين كشفت راسى ودعيت عليهم.
وايه السيوتكس ده حاجة كده زى مستر اكس D:
على فكرة انا بادفع وساكت لكن المشكلة كل حاجة بتتنقل من مكان لمكان هتغلى :s
مى توين :
قوول ماتخافش مافيش حد غريب
رغم اني مش باركب ميني باص بس اعرف ان سعر التذكرة كان 110 قرش
وكانت بتحصل مشاكل وحكايات بسبب ال"فكة" لأن غالبا السواق مش بيرجع الفكة الباقية
يوم الخميس قرأت في الجرنال ان سعر التذكرة وصل 125 قرش لحل مشكلة الفكة!!!!
اعتقد قريبا جدا هتبقي 150 قرشا بعد الغاء ال25 قرش
ومش هتحصل مشاكل في الميكروباص اللي كنت راكبه لان اكيد الاجرة هتوصل 1 جنيه دا بردو بعد الغاء ال25 قرش
سنووايت:
اه فعلا كات فى مشاكل بسبب الفكة
أنا لما كنت باركبه عمرى ما أخدت الباقى.
هما مش هيلغو الربع جنيه بس كمان هيلغو الجنيه.
امبارح أخدت من الراجل بتاع المكتبة ربع جتيه من خمس خمسات وكانت الخمس قروش المعدنية اللى هيا كان لونها أبيض ده فاكراها الرتجل قاللى احنفظ بيهم للذكرى :s
العيال يا كبد أمهم متنحيين ومبزبهليين وهما بيسمعوا حواديت جدهم عن الحيوان الخرافي القديم المسمي باللحمة
يا عم الحج دا العلاوة المشئومة ديه ما بتكفيش الناس فرق السعر بين أستهلاكهم للبنزين قبل وبعد التسعيره الجديدة ... فما بالك بقي بالزيادة في أسعار الأكل والدوا والكهربا وال .. وال...
قليل من التفكير:
اه فعلا ساعت ما جت العلاوة كان نفسى اتنطط من الفرحة لكن ضهرى كان واجعنى
:D
كنت مستنى ال "إن"
شكرا على الزيارة
Post a Comment