" يعقد باحث التاريخ الفرعونى باسم الشماع يوم 25 فبراير المقبل مؤتمرا علميا بمكتبة الإسكندرية يدور حول الطب الفرعونى يعرض خلاله صورا نادرة ودلائل علمية جديدة توضح براعة الفراعنة فى العديد من المجالات الطبية ومنها تحديد جنس المولود من خلال السونار"
طبعا كلام غريب مايدخلش دماغ عيل, مش عارف أنا ليه بنحمل الفراعنة أكتر من طاقتهم وقاعدين كل شوية نقول انهم الأول فى كل حاجة ليه علشان نلاقى حاجة نفخر بيها وخلاص.احنا كده بنشتم نفسينا طيب لما احنا أحفاد الناس اللى عملوا كل حاجة طب ليه احنا متخلفين, فالحين بس نقول ان مصر أم الدنيا واننا حاجة كبيرة ونلزق فى الفراعنة كل حاجة حتى السونار.
ولا ممكن يقوا دا احنا لاقينا هارد عليه الكلام ده وكان مستخبى مع مومياء حتشبشوشو.
وممكن يجيب معاه واحد من المخابيل بتوع الطب الفرعونى يقعد يقنعنا بالكلام ده.
الموضوع ماخلصش على كده شوفو الإفتكاسة ده كمان نقلا عن نفس الموقع:
" كما يعرض لبعض الوصفات الطبية الفرعونية المنقولة عن بعض البرديات, ومنها علاج دمل العين والتى تعتبر مكوناتها من أغرب ما سجلت البرديات, حيث تتكون من خليط من ملح النطرون والعسل النحل وفضلات التمساح وصدأ الرصاص"
أيوة زى ما انت قريت كده ده الكلام اللى بيقولوه مش وصفة دجال
بس السؤال اشمعنى فضلات التمساح هى بتاع الحمار ولا الدصنانور- على أساس ان كان فيه دصنانورات- ماتنفعش ليه.
وليه صدأ الرصاص مش النحاس.
واللى يعرف ايه ملح النطرون ده يقولى.
والأنقح من كده ان ممكن المخبول اللى معاه يقول انهم كمان كانوا بيستخدموا مسحوق ركب النمل الفارسى ولا مسحوق عظام حمامة مريضة نفسيا.
الظاهر انى اللى ترجم البرديات ده ماكانش مستغطى كويس أو انه بيستغفلنا لأننا ما نعرفش هيروغليفى.
المهم أنا شايف اننا نسيبنا من الأجيال اللى راحت ونشوف الأجيال اللى هتروح فى داهية ده.
قاعدين نقولهم ان الطفل المصرى أذكى طفل وان الفراعنة أول من طلع القمر فهيفتكروا نفسهم ناس غير الناس ونقتنع اننا أحسن ناس فى الدنيا.
فوقوا من سباتكم العميق ده وكفاية لحد كده وصبح صبح يا عم الحاج.
3 comments:
عالم الآثار في مصر قريبا سيتخرج من قسم التخدير بكلية الطب
حيث أن وظيفته تخدير مشاعر شعبه وشغله عن واقعهم المؤلم
وقد يتخرج أيضا من قسم الطب النفسي حيث أن من وظائفه علاج هذا الشعب المنهزم المصاب بمرض التفوق فوبيا
إنه الرجل المختص بتشغيل آلة الزمن ونقل الناس إلي الأزمنة السحيقة
طب والنبي قوللي إستفادة واحدة نستفيدها من العلاج المستخلص من خصية الكتكوت الدكر وبويضة الخفاشة النتاية المخلوطة لاسعر الأبيض في ذيل الحمار الأجرب الذي هو لا ذلول يثير الحرث مسلم لا شية فيه
أحيانا أعتبرها سياسة داخلية وخارجية بتخدير هذا الشعب وحبسه في ذكريات الماضي الذي لا يقوم عليه أي دليل سوي ترهات هؤلاء المهيسين الذين يسمون أنفسهم بعلماء الآثار
أعتبرها أحيانا سياسة تعني بطمس الهوية العربية الإسلامية لهذا الشعب المغلوب علي أمره وإرضاعه بالقوة ثقافة وثنية يتعدي عمرها السبعة آلاف سنة
أليست هذه رجعية أيضا ؟؟؟؟؟
علي كل حال .. أضم صوتي إلي صوتك
تعالوا نعيش في حاضرنا وليذهب ماضينا إلي الجحيم إن كان يساعدنا علي التخدير والنوم وفقط
وصبح صبح يا عم ياللي نفسك تحج وتبقي حاج
كلامك مظبوط يا عم خالد
أنا عايز حد يقولى على شعب غيرنا مقتنع انه اللى محصلش ويفكر نافسه أحسن شعوب العالم وحضارة بتاع عوشروميت سنة.
عايزين فعلا نبطل نخدر نفسينا.
وشكرا على التعليق.
e7na keda el masryeen fr7aneen b enena bnetmasa7 fil fra3na tool 3omrna bn2ool shofo dol 3mlo eh w nseena klmet shoof e7na meen w 3mlna eh
Post a Comment