الحاجة باطنة

وعدى الشفوى أبو 80 درجة عمى لا يساوو أى شئ فى بحر الباطنة العظيم

والحمد لله الكروت اللى سحبتها كانت فى المعقول والعملية مشيت

والحمد لله ان اللى بيمتحنو الشفوى هما الدصنانورات الصغيرة

وحتى أكون منصفا الناس كانوا كويسين جدا

حتى فى دكتور من اللى كانوا بيدونا فى المحاضرات شافنى واقف

على باب اللجنة مستنى دورى الذى لكل أسف كان اخر واحد لحد ما كانت أعصابى باظت

وقالهم الواد ده كويس بس لو ما عجابكومش ارموه من الشباك

وللأسف كنت أول مرة أشوف الناس اللى امتحنتى كان يوم الإمتحان

يعنى لا أعرف أسامى ولا ده كويس ولا وحش

بس المهم عدت

*******

وتبدأ العدة للمحطة الأهم فى تاريخك كطالب طب

وهو يوم الكلينيكال أى العملى بتاع الباطنة

وما يسمى بأغلى يوم فى الطب

ويوم النزيف الأكبر أى نزيف الدرجات

امتحان من 250 درجة يعنى أكتر من ربع درجات المادة

واستأثر به دصنانورات الباطنة الكبيرة

وأبوا الا انهم يعلموا علينا

وحيث انك هتمتحن ثلات حالات بثلاث ممتحنين

ومفيش أصلا فى القسم كله ثلاثة يتقال عليهم بيدوا درجات

فهذا يعنى وبكل أسى وأسف انك هتتعض وهتتبهدل على ألأقل قى واحدة منهم

ده لو مهماهتنا بتدعيلنا وقطعت سجادة الصلاة

وكما كان يقول الدكتور اللذيذ دائما

ستخسر كثيرا وستذوق العذاب الأليم ولن يرحمك أحد

ده طبعا غير مشكلة المرضى المحترفين

اللى يعرفو حالتهم أكتر من الدكتور نفسه وبالإنزليجى قصدى و بالإنجليزى كمان

ويبدأ الإمتحان دايما انك أول ما العيان يشوفك

يقولك الحلاوة يا بيه

وتبدأ بقى تفاصل فيه وتسيبك من الإمتحان خالص

يقولك 300 تقولوا لأ 100

وترسى على 120 أو 150 فى الأخر

وفى اخر اليوم يكون لم غلة كويسة

هو مش القصد انه يمليك الحالة ولا كمان انه هيقولك الأسئلة بتاعت الأساتذة

أصلهم محترفين امتحانات وبيحضروا امتحانات مثلا من 10 سنين

هما نفسهم ما بيتغيروش

الكارثة انك لو ما رضيتوش هيضيعك ويلخبطك ويقولك حاجات عجيبة

ويدعى حاجات تانية

بالذات المرضى بتوع العصبية وعلى رأسهم

عم عيد أكبر سمسار مرضى فى البلد وكنت بتصل بيه يبعتلنا حالات

وكله على مزاجنا عايز قلب تلاقى صدرية وما أكثرها

عصبية عز الطلب

ولو بطن يبقى لووز قوى

وطبعا كله بحسابه

وطبعا بعد مناهدة وفصال

الموضوع بيمشى ويظبطك ويمليك كل حاجة

وبكل صراحة أنا ناوى ان شاء الله أبلطج(من البلطجة) عليهم ومش هطاولهم حاجة

وبعدين يجى الدكتور ويقولك أنا عارف انه هو قالك كل حاجة

وما يرضاش أصلا يسمع منك حاجة

وبعدين يقولك

هى حالتك ايه ؟

وده السؤال الوحيد اللى هتجاوب عليه لأن العيان محفظهولك

ويا سلام لو حظك تمام وكانت الحالة عيان عادى مش محترف

وحيث ان أكيد الحالة أصلا مش متشخصة ومحجوزة علشان يتعملها فحوصات

فانت وبكل أسى هتسكت

وبعدين الدكتور بقى يقولك طب افحصلى الوجه أو الأيد

وده سؤال ظاهره الرحمة ولكن من باطنه العذاب

لأنك هتقوله عشرة خمستاشر حاجة انت عارفهم

فهيبصلك بكل قرف ويقولك بس

وبعدين يقولك افحصلى كذا

وأول ما تحط ايدك على العيان

يقولك ايه اللى بتهببه ده مين ال.... اللى قالك كده

أصل الكارثة ان كل حاجة وليها كذا طريقة للفحص

وكل دكتور متبنى طريقة أو مفتكس طريقة

والأنكى انك مطالب تعرف ان الدصنانور الفلانى بيحب كذا والتنين العلانى مايعرفش الا كذا

والأضل سبيلا ان بعضهم مقتنعين بحاجات مش صح أصلا وعكس المعلومة الصحيحة

ولو قولتله الصح هتلبس يا معلم

يعنى لازم نداديهم ونحايلهم

تصوروا مثلا فى واحد مسكين فى دفعتنا دخل على تنين من اللى بيطلعوا نار

وقالوا افحص كذا الولد عمل

قاله ايه الهباب ده

وبعدين جاب نايب يعملها برضه معجبهوش وقاله زفت

وبعدها جاب مدرس مساعد يعنى واحد معاه ماجستير

وبرضه معجبهوش وقالهم انتو التلاتة زفت

وفى الأخر الولد اخد 70 من 130

يعنى 60 درجة استفتاحة على الصبح كده

ربنا المنتقم

بعد هذا كله ممكن يسألك حتة كده موجودة فى أعماق كتاب باطنة منقرض

من أمثال الحلمنتيشى سيندروم والبرورروم المستعرض

وأكيد مش هتكون حتى سمعت عنه

وأخيرا هيقولك أعتقد كده إنك ما قولتيش حاجة

وهيحط درجة دون حتى ما يفكر ان كل ذنب اللى قدامه انه دخل طب وحظه العسر وقعه فى سكته

الكارثة ان معظم الدكاترة ليهم سقف فى الدرجات

يعنى فلانى الفلانى اخره 100 مثلا يعنى اعمل قرد هتاخد 100

وعلى هذا فقس وطبعا الدرجة النهائية تعد ضربا من الخيال العلمى

إحنا إن شاء الله سنعقلها ونتوكل على الله

وإن شاء الله على اخر الأسبوع القادم أخلص الباطنة

قصدى الحاجة باطنة أم خمس أيام ده

وربنا يطلعنى منها على خير إن شاء الله

استعنا على الشقا بالله

ومضت الجولة الأولى

الباطنة النظرى على ورقتين بينهم ثلاث أيام بس يعنى بعون الله قرينا ونحط تحت قرينا

ميتين سطر حوالى خمسمائة صفحة فى ثلاث أيام

وأعتقد ان احنا كلية الطب الوحيدة اللى فيها بين الورقتين ثلاث أيام

وكانوا ورقتين عجب

الورقة الأولى 11 سؤال من النوع الحلوف اللى بيقى راس السؤال فيه

اكتب ما تعرفه وما لا تعرفه عن

ويكتب عنوان درس

الذبحة الصدرية مثلا

الربو الشعبى

والأمر ما يسلمش من سؤالين رخمين من عينة الديفرنشيال دياجنوسيس

وكانت الشكوى الكبرى ان الورقة خلصت ومش راضيين يدو الناس ورقة تانية

أو الوقت ما كفاش وايدينا وجعتنا وملحقناش نخلص

عالم مذاكرة يابا

مش أى حد يعنى

أى نعم هو حط فيه كمية أسئلة عن العلاجات اللى أخدناها فى سنة تالتة

بس على مين يابا كتبنا أى كلام فى أى اتجاه

وما افتكرتش أى جرعة دوا والحمد لله

وطبعا كروتة وخط ما ينقراش

بس عدت

ثم جاء يوم الورقة الثانية

وطبعا قلبنا العصبية والدم والكلى والغدد الصماء كده

فى 3 أيام قوام قوام

وروحنا تانى ورقة ايد ورا وايد قدام

و يا عينى قلقانين على الوقت وكده

وقبل ما تجينى ورقة الأسئلة سمعت صوت واحد بيصوت

بيقول لاااااااا أنا عايز أطلع أنا مش هامتحن

أصل ورقة الأسئلة وصلته قبل ما توصلنى

رئيس اللجنة قاله ما ينفعش قبل نص الوقت

قاله هطلع غصب عنك

قوم ايه وكيل الكلية جه وقطع الورقة وطلعه

وأخيرا وصلتنى الورقة

وقعدت اقرا ووقت الإمتحان كان ساعتين ونصف

وكان الوقت كتيير

أسئلة عجيبة كده

ما تعرفش رايحة فين ولا جاية منين

حاجة زى مثلا ما هى الحاجات اللى تخلى الواحد يطلع قصير

وأنا مالى يا عم خلقة ربنا

ربنا عايز كده

المهم فعلا الناس كانت سايبة القلم بمعنى الكلمة

بما تحمله كل الكلمة من معانى

بعد ما ملوا كراسة فى الورقة الأولى

وزعلانين على حتة نسيوها فى السؤال أو حاجة اضطروا أسفين يسيبوها لضيق الوقت

دلوقتى كله بيبص لبعضه وسايب الورقة

بعد امتحان الورقة الأولى

شافنى واحد من اللى معانا فى الدفعة من اللى هما بيحبوا يحفظوا الحجات العجيبة

من أمثال البدنجنانو سيندروم

ومرض مش عارف ايه المستكنيس

والحاجات اللى بيكتبوها فى الكتب علشان الذكرى

والراجل اللى عملها هو بس اللى عملها واتمدد مات

المهم مسكنى أنا وواحد تانى وكل سؤال يقولى طب كتبت الفنكوشى سيندروم فى السؤال ده

أقوله وايه لازمتها يقولى يا بنى ده مهمة ده لاقوها فى 100 واحد فى العالم

ولا يجى سؤال تانى يقولى طب كتبت الحنكلولو فى السؤال ده

وتتطلع علاقة الحنكولو بالسؤال نفس علاقة ما هو اسم السواق فى الفزورة الشهيرة

المهم فضل يعقد فينا ويستفز فينا

وطلعنا ممكن ما ننجحش

أنا متأكد ان فيه طلبة من العينة ده فى كل كلية

يحفظون فقط علشان يقرفوا خلق الله

بجد بكون عارف حاجات بس ما بفضلش اطنطط على الناس

ربنا يهديه يا رب

سيبكوا من ده كله احنا خلصنا من النظرى

بسلاطاته ببابا غنوجه

وأى نعم اتعلم علينا فيه علامة جامدة احتمال هى وعلامة أعمال السنة

لوحدهم كفيلين بضياع الإمتياز

الجولة الثانية وهى الشفوى بعون الله

وده مافيش بينك والدصنانور القرن الا المكتب وما حدش معاكم الا ربنا طبعا

وعاملين عندنا نظام كده للشفوى

اللى عمله كان قصده انه يوحد مستوى الأسئلة الى حد ما

فعاملين كروت يفترض جدلا ان الأسئة اللى فيها على نفس المستوى

هى مش كده أصلا

المهم كل تنين من دول بيقى معاه كروت

أول ما تقعد قدامه بتسحب كارت

والمفروض ان الأسئلة لا تخرج عن هذا الدرس

ولكن بقى لو حظك سوبر ومزعل الحاجة فى البيت

تسحب الكارت تلاقي فيه سؤال ولا تسمع عنه

أنا فاكر الدكتور المبتسم كان بيقولنا دخل عليه واحد وسحب كارت

لقى فيه سؤال مش مذاكره كويس

قاله ممكن أغيره فقاله ماشى

أول ما غيره قاله كده نقصت خمس درجات

الواد يا ولداه لقى نفسه مش عارف حاجة فى الكارت الثانى

قاله طب ممكن أرجع للأول

قاله ماشى بس كده عشر درجات طاروا

يعنى الإستفتاحة كده طيرت منه عشر درجات

ولسه بقى هنتكلم والدكتور ما عندوش أى مانع يديك الصفر المتين

وهو بيضحك كمان وممكن كمان تلاقيه يزعق فيك ويلم عليك كل الدصنانورات

وكمان السحالى (النواب يعنى) ويقولهم تعالو شوفوا بيقول ايه

يعنى كأنك ضمنت صفر فى اللجنة ده

وكمان اتوصى عليك توصية تمام فى اللجنة التانية

لأن أكيد التنين التانى هيكون واخد عنك فكرة تمام

وتتنوع الأسئلة طبعا من

قولى يا بنى 600 مرض يعملوا تضخم فى الطحال

الى يا بنى قولى 20 سبب بس يعملو مرض البروروم وانت اصلا مش عارفه هو ايه

تروح انتى يا ولداه تقوله نصهم

يقولك والباقى

ويفضحك فضيحة العالمة فى الحارة ( هو فيه فضيحة كده )

المهم أنا هتوكل على الله ولا هيهمنى اى تنين

وربك كبير على الكبير

وربنا يستر ان ركبى بدأت من دلوقتى تخبط فى بعض

والعملية بقت فى النملية وصبح صبح

يا أهلا بالمعارك

المعارك يعنى الإمتحانات

الناس فى كل الكليات ما اشتروش الكتب لسه واحنا هنمتحن

بعد سنة دراسية طولها حوالى عشروميت يوم

يعنى بتاع سمعوميت اسبوع

بجد سنة بدأت من أول أكتوبر السنة اللى فاتت

ويا ريتنا اتعلمنا حاجة بجد

ولا هما حتى هيمتحنونا فى اللى يعتقدوا انهم شرحوه

كلا وألف كلا طب يبهدلونا ازاى

بس وان كان هما ما علموناش احنا برضه

ولا بلاش احنا أنا فعلا حاسس انى مقصر

ايه حاسس ده كمان هكدب بعد رمضان ولا ايه

انا قطعا مقصر

ايوة أنا مذنب يا بيه

فااااااااااااااشل

أقر أنا وبكامل قواى العقلية ان لو ربنا ماسترش

ولم يستجب لدعاء الناس الكويسة اللى أنا برضه مش منهم

هتظبط ظبطة ما يعلم بيها الا ربنا

كل مرة ما نكونش مبسوطين من الحل بتاعنا فى الإمتحان بنلقى اللوم على واضعى الإمتحان

لكن هذه المرة من الأن وقبل أن أبدأ الإمتحانات أصلا

حتى لو جاب الإمتحان صعب أنا أكيد مش هيكون لأمثالى حق الإعتراض

وامتحانات الباطنة على خمس امتحانات فى خلال تمناشر يوم

يعنى هيمتحنونا فى كل معلومة قريناها أو ما قرينهاش

عفوا حتى أكون أكثر مصداقية حفظناها أو ما حفظناهاش

واللى مش هيكون قرأها قصدى يعنى حفظها زى حالاتى الفاشل فى الحفظ

هيركب التروماى ولو كان بيجيب امتياز قبل كده ايه المانع انه يجيب مقبول فى الباطنة

أصل محدش كبير عليها

عموما فاضل أسبوع على الإمتحان هحاول انقاذ بعض ما يمكن انقاذه

ويا رب بس ما اتفضحش السنة ده فضيحة زى فضيحة الراجل ده بتاع مدينتى

ولا حتى ابقى فى أسفل سافلين زى الناس بتوع الدويقة

اللهم انى أسألك فهم النبيين وحفظ المرسلين والملائكة المقربين

اللهم انى أستودعتك ما علمتنيه

يا رب لا تفضحنى يا رب لا تخذلنى

وأشوفكم بعد معركة النظرى بتاع الباطنة ان شاء الله

المهم انا كنت بكتب البوست ده علشان أهزم القلق اللى جوايا لقيته هزمنى بالقاضية

وده واضح ان العنوان مالووش دعوة بالكلام بس مش هغيره برضه

ومش هوصيكم على الدعوات