رقص السنة

بدأ التهييس
اللى هو بصراحة موجود
لكن بيزيد حبتين نقول تلاتة فى اليومين دول
طبعا التهييس بتاع راس السنة حاجة تانية
فالراديو والتليفزيون يقضوها استفتاءات
ويا ترى ايه أحسن متين قول تلتميت أغنية
ومين أحسن تافه
ومين أحسن تافهة
ومين احسن واحدة عملت عملية تجميل
ويا ترى مين أحسن واحد كتب كلام تافه
واحنا ما نتوصاش فى الحاجات ده
وتبدأ بقى الرسايل من كل حتة فى الوطن العربى
وكله لصالح المحطة
ما أصل الموضوع كله عبارة
عن شوية مجطات شغلانتها الهيافة ويهمها تحافظ عليها
طب ياكلو كفيار ومارونج لاسيه ازاى
وللأسف ده أسهل طريقة دلوقتى

نسيبنا من اللى بيحصل اليومين دول
ونشوف اللى بيحصل ليلة الراس
نلاقى الشوارع فى عز البرد والإمتحانات زحمة موت
ولا المولات حدث ولا حرج
وأخص بالذكر ستارز طبعا
والموضة بتاعت ان النور ينطفى عند منتصف الليل
طب بينطفى ليه؟هه سؤال برئ

الليلة ده بالذات كل سنة أكيد بتشكينا لربنا
من كتر المعاصى و المهازل اللى بتحصل فيها
مئات الملايين بتتصرف فى اليوم ده
لا لشئ إلا على المعاصى
عندكو كل فندق من أسبوع تقريبا
معلق الإعلانات بتاعته عنده مين فى راس السنة
مغنى و راقصة
وفى من المغنيين دول اللى بيروح يعمل نمرة
ويطلعله سبوبة فى كذا فندق
وتشوف الإعلانات وتبقى مستغرب هو هيروح أى واحد فيهم
وده برضه أكتر يوم بيتشرب فيه خمور
وده برضه أكتر يوم مبيعات العقاقير
اللى فى منها الأصلى بتاع فايزر أو الهندى
أو حتى المصرى بتقفز لأعلى معدلات
أما عن السينمات والمسارح
الأعداد أمامها بتوصل للألاف وكله بيتخانق على التذكرة
مش عارف أقول ايه ولا أيه ولا أيه

ليه الناس بتصر على إن اليوم ده
تبارز ربنا بالمعاصى
ليه دايما بنحب نختم السنة بيوم
ممكن يضيع كل السنة
الكم الهائل من المعاصى اللى بتحصل عيانا بيانا
فى هذا اليوم
بتدينى تخيل انه ممكن نلاقى الشياطين بتصافح الناس
وبتاخدهم بالحضن كمان
بابقى متخيل انه لولا شيوخ ركع وأطفال رضع
فعلا لخسف بنا
رحماك يا الهى

الجماعة بتوع اسرائيل مش مكدبين خبر
بيحتفلو بالكريسماس بس بطريقتهم
لقو غزة يا عينى مافيهاش نور والناس بردانة
قالو ننورها بحريقة أهم يدفوا بالمرة
وهنسمعهم أحسن ميوزيك على نغمات القنابل
فى نفس الوقت الجماعة العرب بيحتفلو
يبقى من حق اسرائيل تعمل أكتر من كده
والمفروض كل العرب رجالتهم قبل حريمهم
يلبسو طرح
كل اللى احنا بنعمله بنشوف اللى بيحصل
ونمصمص شفايفنا
ولو شتمنا شتمتين على اسرائيل يبقى كتر خيرنا
وبعدها نتكلم عن خسارة الزمالك من بنى عبيد
ونتفق هنعمل ايه فى الكريسماس
هى ده قمة اللا مبالاة
قمة الأنانية
مش هاين حتى علينا نسيب حاجة كلها ذنوب
حتى ولو تضامن مع الناس ده
بلاش علشان الناس
حتى علشان الإسلام
فيها ايه لو اليوم ده نستكن كده فى بيوتنا زى الشطار
ونقفل التليفزيون والراديو
وندعى للناس ده
مش هقول تبرع بتمن السهرة
بس حتى ادعى ليس إلا


يحضرنى الأن كلمات قصيدة تقول
أيها التاريخ لا تعتب علينا
مجدنا الموؤود مبحوح الحناجر

كيف أشكو والمسامع مغلقات
و الرجال اليوم همهم المتاجر

ثلة منهم تبيع الدين جهراً
تلثم الحسناء والكأس تعاقر

ثلة أخرى تبيت على كنوز
لا تبالي كان بؤسا أم بشائر

إنما العيش الذي نحياه ذل
نرتضي حتى وإن دنت الكواسر

يرفع المحتال قومي يا إلهي
والصديق الحق للعدوان آمر

أيها التاريخ حدث عن رجال
عن زمان لم تمت فيه الضمائر

هل ترى يا أمتي ألقاك يوم
تكتبين لنا من النصر المفاخر

ذلك الحلم الذي أرجوه دوماً

أن أراك عزيزة والله قادر


وبلا شك الله قدير
وكل راس وانتو طيبين

كيف وإن ؟

كيف وإن ضاقت بك السبل؟

كيف وإن ظننت الدنيا قد انتهت؟

كيف وقد تكالبت عليك الهموم؟

كيف وقد افتقدت عزيز؟

وان كنت تظن أن العقارب ستتوقف عن الدوران

ها هى الأيام تمر وما داخلك أمر

يعتصر الألم قلبك

لكن لا تستطيع أن تفر منه

يؤرقك يطاردك

حتى أصبح شيمة من شيمك

بل قرينك الدائم

فقدت رونقا بعد ما كنت متألقا

لا رفيق الا الهم والغم

تسرق الإبتسامة وهى بطعم المرارة

وأصبح تفكيرك حزين مشوش

وان كنت تخفى ما لا تعلن

وتبطن ما لا يظهر

وتحاول تخفف هموم الناس ولا تجد من يخفف همك

كنت أظن أنه الإنسان سمى بالإنسان لكثرة النسيان

ولكن لا يمكن أن تنسى ماتتمنى نسيانه

أو لا تنسى ما أو من أثر فى حياتك

هى علامات وأقدار فى حياتك لا يمكن إلا وأن تمر بها

ما حدثت إلا لحكمة يعلمها الله

أما وإن حدث ما حدث

وارتجيت من الله أن يكون خالصا لوجهه

وأنه ما كان الا خوفا منه ورغبة إليه

ولا ملجأ اليه إلا إليه

ولا حافظ لمن ارتجى حفظه الا هو

ولا مذلل ولا مهون الأمور الا جل جلاله

ومن بشر الصابرين غيره

ولا منفذ الا الصبر وليس لنا غيره

اللهم ان كنت فعلت هذا ابتغاء مرضاتك فسهله وهونه

يا رب ثبت القلوب التى بين أصابعك

يا من تكفلت بحفظ من يطيعك احفظنا

يا رب ارزقنا حلاوة فى القلب عوضا عن المرارة والهم

رجوناك فمن لنا سواك

أتيتك لا أتى غيرك

ولقد ذكرتك والخطـــوبُ كوالـــــــــحُ *** سودً ووجه الدهر أغبرُ وقاتمُ

فهتفت في الأسحار باسمك صارخاً *** فإذا محيَّا كلُ فجــــرٍ باســــمُ

اللهم فاجعل مكان اللوعة سلوة

وجزاء الحزن سرورا

يآ مجيب المضطر

يآ كآشف الضر

يآ عظيم البر

يآ عليماً بمآ في السر

يآ جميل الستر

أستشفعت بجودك وكرمك إليك

و توسلت بجنابك وترحمك لديك

فأستجب دعآئي بمنك ورحمتك

يآ أرحم الرآحمين

أزهرى أنا

نشرت جريدة المصرى اليوم فى عدد الإثنين الى هو النهاردة يعنى

خبر عن التباحث فى فصل الكليات العلمية عن الشرعية بجامعة الأزهر

وان عم نظيف بيقترح فصل الكليات العلمية اللى هى الطب والهندسة والعلوم والحاجات ده

عن باقى الكليات الشرعية

والظاهر معاليه ناوى يرجع طلبة الأزهر تحضر للشيوخ فى الجامع الأزهر وكل شيخ ليه عمود بتاعه

يسنده لحسن يقع عليه وعلى تلامذته

والجو ده اللى انتو عارفينه بتاع مسلسل المراغى والشعراوى

ولكن الأساتذة بتوع مجلس إدارة الجامعة عايزين يلموا الموضوع

وقالوا بكل حزم لن نسمح مطلقا بفصل الكليات

لكن بعد كده قالوا

إلا بموافقة مجلس إدارة الجامعة

وحيث إن الموضوع دخل فيه إلا وإذ قد ربما و حيثما والحاجات ده

يبقى قصدهم الموضوع قدامه شوية وقت

وللأسف الشديد كده أول مسمار قول أول شوية مسامير

فى نعش الكليات العملية بالأزهر اتحطوا

لكن اللى فعلا مش فاهمينه ايه المشكلة إن الأزهر فيه طب

ويعنى المشاكل بتاعت الأزهر هتنحل لما يفصلوا الكليات العملية

وكإن الكليات العملية هى اللى يا عينى قللت من مستوى الأزهر ككل

والتعليم أصلا فى بلدنا خربان من فوقه لتحته أزهر وغيره

اشمعنى الأزهر يعنى اللى عايزين يحلوه

********

وفى نفس المقال يقول العميد السابق بتاعنا اللى نفسى أتبرأ منه

يقول كلام يفور الدم ويخليه يندلق كمان

سعادته بيقول

يجب أن نتخلي عن فكرة الطبيب أو المهندس المسلم

وعلينا أن نعترف بوجود قصور فعلي في مستوي طلبة الأزهر

شوفتو الكلام

ده للأسف كان عميد كليتنا

قال إيه فكرة الطبيب المسلم يجب أن نتخلى عنها

طيب نتبنى ايه فكرة الطبيب الهشك بشك مثلا

فكرة الطبيب عضو نادى الروتارى

نتبنى فكرة الطبيب الذى بلا مبادئ

فيه ايه هو احنا بنرجع لورا ولا الدنيا بتمشى بقفاها يا عم الضكتور

وحضرة الأستاذ اللى مش قادر أقول عليه المحترم مسكتش وقال بعد كده

إن فيه قصور فى مستوى طلبة الأزهر

طب كده العيبة فى وش مين يا حضرت

حضور ومابتجوش وشرح بنتحايل عليكم تشرحوا ومافيش فايدة

طب نعمل ايه المفروض الأساتذة هى اللى تتغير

بجد أكتر طلبة بتنحت فى الصخر طلبة الأزهر

الدروس عندنا مش منتشرة كالجامعات الأخرى

معالى الباشا لو الأزهر مش عاجبك حضرتك ممكن تتفضل وتسيب مكانك

لحد فعلا معتز بإنتمائه للأزهر

ثم ايه علاقة الكلام الفاضى ده ومستوى الطلبة بفصل الكليات

ما لو حدث الفصل سيبقى الوضع كما هو عليه

والأساتذة هيفضلوا هما هما

والتهدور هيفضل

أى نعم هيجى بقى طلبة مالهومش دعوة بالأزهر

لكن سيؤول بهم الحال للتدهور لا ريب

********

أنا بس عايز أقول للناس اللى بتدق المسامير ده بتاع النعش

بالطريقة ده بتقضوا على الأزهر

مفيش حد هيدخل ابنه الأزهر بعد كده لما يعرفوا إن مافيش إلا كليات شرعية

ومش هيدخل إلا عدد محدود جدا

واحنا مش ناقصين بعد عن ربنا

والسطحية الدينية اللى احنا فيها هتزيد

بجد أنا بأقابل ناس ما يعرفوش أساسيات فى الدين بسيطة

وبيكونوا خريجى كليات محترمة

أنا بأقول للمسؤلين اللى هتعملوه ده فعلا سيئة جارية

هتكون سيئة جارية كبيرة قوى

معنى كلامى إن السيئات بتاعتكم هتزيد كل يوم

وإنت قاعد فى بيتكم حتى بعد ما تموت

أنا نفسى بس تحضروا إجابة السؤال ده لما ربنا يسألكم

عملتو كده ليه؟

*******

بالرغم إنى فعلا اتبهدلت فى الأزهر

لكن ليه فضل كبير عليا كفاية حفظت القرأن

من أول إعدادى باتعلم فقه وحديث وتفسير

أعرف فى النحو والبلاغة حتى الأن الكثير

أحفظ مئات الأبيات من الشعر فى كل الفروع

يا جماعة الأزهر علمنى ازاى أكون مسلم صح

هتقولولى ده طلبة الأزهر زفت

هقولكم العيب فيهم مش فى الأزهر

مش معنى الكلام ده كله إن الأزهر تمام التمام ولا تشوبه شائبة

لأ طبعا

الأزهر محتاج تطوير كبير على كل المستويات والمراحل المختلفة

محتاج تطوير مش إبادة يا أصحاب الفخفخينا

ويبقى السؤال اللولبى

لما يحصل فصل الكليات والمستشفايات والأساتذة والأفلامانات ده

هيبقوا تبع مين؟

أنا بأقترح الأمم المتحدة

الحاجة باطنة

وعدى الشفوى أبو 80 درجة عمى لا يساوو أى شئ فى بحر الباطنة العظيم

والحمد لله الكروت اللى سحبتها كانت فى المعقول والعملية مشيت

والحمد لله ان اللى بيمتحنو الشفوى هما الدصنانورات الصغيرة

وحتى أكون منصفا الناس كانوا كويسين جدا

حتى فى دكتور من اللى كانوا بيدونا فى المحاضرات شافنى واقف

على باب اللجنة مستنى دورى الذى لكل أسف كان اخر واحد لحد ما كانت أعصابى باظت

وقالهم الواد ده كويس بس لو ما عجابكومش ارموه من الشباك

وللأسف كنت أول مرة أشوف الناس اللى امتحنتى كان يوم الإمتحان

يعنى لا أعرف أسامى ولا ده كويس ولا وحش

بس المهم عدت

*******

وتبدأ العدة للمحطة الأهم فى تاريخك كطالب طب

وهو يوم الكلينيكال أى العملى بتاع الباطنة

وما يسمى بأغلى يوم فى الطب

ويوم النزيف الأكبر أى نزيف الدرجات

امتحان من 250 درجة يعنى أكتر من ربع درجات المادة

واستأثر به دصنانورات الباطنة الكبيرة

وأبوا الا انهم يعلموا علينا

وحيث انك هتمتحن ثلات حالات بثلاث ممتحنين

ومفيش أصلا فى القسم كله ثلاثة يتقال عليهم بيدوا درجات

فهذا يعنى وبكل أسى وأسف انك هتتعض وهتتبهدل على ألأقل قى واحدة منهم

ده لو مهماهتنا بتدعيلنا وقطعت سجادة الصلاة

وكما كان يقول الدكتور اللذيذ دائما

ستخسر كثيرا وستذوق العذاب الأليم ولن يرحمك أحد

ده طبعا غير مشكلة المرضى المحترفين

اللى يعرفو حالتهم أكتر من الدكتور نفسه وبالإنزليجى قصدى و بالإنجليزى كمان

ويبدأ الإمتحان دايما انك أول ما العيان يشوفك

يقولك الحلاوة يا بيه

وتبدأ بقى تفاصل فيه وتسيبك من الإمتحان خالص

يقولك 300 تقولوا لأ 100

وترسى على 120 أو 150 فى الأخر

وفى اخر اليوم يكون لم غلة كويسة

هو مش القصد انه يمليك الحالة ولا كمان انه هيقولك الأسئلة بتاعت الأساتذة

أصلهم محترفين امتحانات وبيحضروا امتحانات مثلا من 10 سنين

هما نفسهم ما بيتغيروش

الكارثة انك لو ما رضيتوش هيضيعك ويلخبطك ويقولك حاجات عجيبة

ويدعى حاجات تانية

بالذات المرضى بتوع العصبية وعلى رأسهم

عم عيد أكبر سمسار مرضى فى البلد وكنت بتصل بيه يبعتلنا حالات

وكله على مزاجنا عايز قلب تلاقى صدرية وما أكثرها

عصبية عز الطلب

ولو بطن يبقى لووز قوى

وطبعا كله بحسابه

وطبعا بعد مناهدة وفصال

الموضوع بيمشى ويظبطك ويمليك كل حاجة

وبكل صراحة أنا ناوى ان شاء الله أبلطج(من البلطجة) عليهم ومش هطاولهم حاجة

وبعدين يجى الدكتور ويقولك أنا عارف انه هو قالك كل حاجة

وما يرضاش أصلا يسمع منك حاجة

وبعدين يقولك

هى حالتك ايه ؟

وده السؤال الوحيد اللى هتجاوب عليه لأن العيان محفظهولك

ويا سلام لو حظك تمام وكانت الحالة عيان عادى مش محترف

وحيث ان أكيد الحالة أصلا مش متشخصة ومحجوزة علشان يتعملها فحوصات

فانت وبكل أسى هتسكت

وبعدين الدكتور بقى يقولك طب افحصلى الوجه أو الأيد

وده سؤال ظاهره الرحمة ولكن من باطنه العذاب

لأنك هتقوله عشرة خمستاشر حاجة انت عارفهم

فهيبصلك بكل قرف ويقولك بس

وبعدين يقولك افحصلى كذا

وأول ما تحط ايدك على العيان

يقولك ايه اللى بتهببه ده مين ال.... اللى قالك كده

أصل الكارثة ان كل حاجة وليها كذا طريقة للفحص

وكل دكتور متبنى طريقة أو مفتكس طريقة

والأنكى انك مطالب تعرف ان الدصنانور الفلانى بيحب كذا والتنين العلانى مايعرفش الا كذا

والأضل سبيلا ان بعضهم مقتنعين بحاجات مش صح أصلا وعكس المعلومة الصحيحة

ولو قولتله الصح هتلبس يا معلم

يعنى لازم نداديهم ونحايلهم

تصوروا مثلا فى واحد مسكين فى دفعتنا دخل على تنين من اللى بيطلعوا نار

وقالوا افحص كذا الولد عمل

قاله ايه الهباب ده

وبعدين جاب نايب يعملها برضه معجبهوش وقاله زفت

وبعدها جاب مدرس مساعد يعنى واحد معاه ماجستير

وبرضه معجبهوش وقالهم انتو التلاتة زفت

وفى الأخر الولد اخد 70 من 130

يعنى 60 درجة استفتاحة على الصبح كده

ربنا المنتقم

بعد هذا كله ممكن يسألك حتة كده موجودة فى أعماق كتاب باطنة منقرض

من أمثال الحلمنتيشى سيندروم والبرورروم المستعرض

وأكيد مش هتكون حتى سمعت عنه

وأخيرا هيقولك أعتقد كده إنك ما قولتيش حاجة

وهيحط درجة دون حتى ما يفكر ان كل ذنب اللى قدامه انه دخل طب وحظه العسر وقعه فى سكته

الكارثة ان معظم الدكاترة ليهم سقف فى الدرجات

يعنى فلانى الفلانى اخره 100 مثلا يعنى اعمل قرد هتاخد 100

وعلى هذا فقس وطبعا الدرجة النهائية تعد ضربا من الخيال العلمى

إحنا إن شاء الله سنعقلها ونتوكل على الله

وإن شاء الله على اخر الأسبوع القادم أخلص الباطنة

قصدى الحاجة باطنة أم خمس أيام ده

وربنا يطلعنى منها على خير إن شاء الله

استعنا على الشقا بالله

ومضت الجولة الأولى

الباطنة النظرى على ورقتين بينهم ثلاث أيام بس يعنى بعون الله قرينا ونحط تحت قرينا

ميتين سطر حوالى خمسمائة صفحة فى ثلاث أيام

وأعتقد ان احنا كلية الطب الوحيدة اللى فيها بين الورقتين ثلاث أيام

وكانوا ورقتين عجب

الورقة الأولى 11 سؤال من النوع الحلوف اللى بيقى راس السؤال فيه

اكتب ما تعرفه وما لا تعرفه عن

ويكتب عنوان درس

الذبحة الصدرية مثلا

الربو الشعبى

والأمر ما يسلمش من سؤالين رخمين من عينة الديفرنشيال دياجنوسيس

وكانت الشكوى الكبرى ان الورقة خلصت ومش راضيين يدو الناس ورقة تانية

أو الوقت ما كفاش وايدينا وجعتنا وملحقناش نخلص

عالم مذاكرة يابا

مش أى حد يعنى

أى نعم هو حط فيه كمية أسئلة عن العلاجات اللى أخدناها فى سنة تالتة

بس على مين يابا كتبنا أى كلام فى أى اتجاه

وما افتكرتش أى جرعة دوا والحمد لله

وطبعا كروتة وخط ما ينقراش

بس عدت

ثم جاء يوم الورقة الثانية

وطبعا قلبنا العصبية والدم والكلى والغدد الصماء كده

فى 3 أيام قوام قوام

وروحنا تانى ورقة ايد ورا وايد قدام

و يا عينى قلقانين على الوقت وكده

وقبل ما تجينى ورقة الأسئلة سمعت صوت واحد بيصوت

بيقول لاااااااا أنا عايز أطلع أنا مش هامتحن

أصل ورقة الأسئلة وصلته قبل ما توصلنى

رئيس اللجنة قاله ما ينفعش قبل نص الوقت

قاله هطلع غصب عنك

قوم ايه وكيل الكلية جه وقطع الورقة وطلعه

وأخيرا وصلتنى الورقة

وقعدت اقرا ووقت الإمتحان كان ساعتين ونصف

وكان الوقت كتيير

أسئلة عجيبة كده

ما تعرفش رايحة فين ولا جاية منين

حاجة زى مثلا ما هى الحاجات اللى تخلى الواحد يطلع قصير

وأنا مالى يا عم خلقة ربنا

ربنا عايز كده

المهم فعلا الناس كانت سايبة القلم بمعنى الكلمة

بما تحمله كل الكلمة من معانى

بعد ما ملوا كراسة فى الورقة الأولى

وزعلانين على حتة نسيوها فى السؤال أو حاجة اضطروا أسفين يسيبوها لضيق الوقت

دلوقتى كله بيبص لبعضه وسايب الورقة

بعد امتحان الورقة الأولى

شافنى واحد من اللى معانا فى الدفعة من اللى هما بيحبوا يحفظوا الحجات العجيبة

من أمثال البدنجنانو سيندروم

ومرض مش عارف ايه المستكنيس

والحاجات اللى بيكتبوها فى الكتب علشان الذكرى

والراجل اللى عملها هو بس اللى عملها واتمدد مات

المهم مسكنى أنا وواحد تانى وكل سؤال يقولى طب كتبت الفنكوشى سيندروم فى السؤال ده

أقوله وايه لازمتها يقولى يا بنى ده مهمة ده لاقوها فى 100 واحد فى العالم

ولا يجى سؤال تانى يقولى طب كتبت الحنكلولو فى السؤال ده

وتتطلع علاقة الحنكولو بالسؤال نفس علاقة ما هو اسم السواق فى الفزورة الشهيرة

المهم فضل يعقد فينا ويستفز فينا

وطلعنا ممكن ما ننجحش

أنا متأكد ان فيه طلبة من العينة ده فى كل كلية

يحفظون فقط علشان يقرفوا خلق الله

بجد بكون عارف حاجات بس ما بفضلش اطنطط على الناس

ربنا يهديه يا رب

سيبكوا من ده كله احنا خلصنا من النظرى

بسلاطاته ببابا غنوجه

وأى نعم اتعلم علينا فيه علامة جامدة احتمال هى وعلامة أعمال السنة

لوحدهم كفيلين بضياع الإمتياز

الجولة الثانية وهى الشفوى بعون الله

وده مافيش بينك والدصنانور القرن الا المكتب وما حدش معاكم الا ربنا طبعا

وعاملين عندنا نظام كده للشفوى

اللى عمله كان قصده انه يوحد مستوى الأسئلة الى حد ما

فعاملين كروت يفترض جدلا ان الأسئة اللى فيها على نفس المستوى

هى مش كده أصلا

المهم كل تنين من دول بيقى معاه كروت

أول ما تقعد قدامه بتسحب كارت

والمفروض ان الأسئلة لا تخرج عن هذا الدرس

ولكن بقى لو حظك سوبر ومزعل الحاجة فى البيت

تسحب الكارت تلاقي فيه سؤال ولا تسمع عنه

أنا فاكر الدكتور المبتسم كان بيقولنا دخل عليه واحد وسحب كارت

لقى فيه سؤال مش مذاكره كويس

قاله ممكن أغيره فقاله ماشى

أول ما غيره قاله كده نقصت خمس درجات

الواد يا ولداه لقى نفسه مش عارف حاجة فى الكارت الثانى

قاله طب ممكن أرجع للأول

قاله ماشى بس كده عشر درجات طاروا

يعنى الإستفتاحة كده طيرت منه عشر درجات

ولسه بقى هنتكلم والدكتور ما عندوش أى مانع يديك الصفر المتين

وهو بيضحك كمان وممكن كمان تلاقيه يزعق فيك ويلم عليك كل الدصنانورات

وكمان السحالى (النواب يعنى) ويقولهم تعالو شوفوا بيقول ايه

يعنى كأنك ضمنت صفر فى اللجنة ده

وكمان اتوصى عليك توصية تمام فى اللجنة التانية

لأن أكيد التنين التانى هيكون واخد عنك فكرة تمام

وتتنوع الأسئلة طبعا من

قولى يا بنى 600 مرض يعملوا تضخم فى الطحال

الى يا بنى قولى 20 سبب بس يعملو مرض البروروم وانت اصلا مش عارفه هو ايه

تروح انتى يا ولداه تقوله نصهم

يقولك والباقى

ويفضحك فضيحة العالمة فى الحارة ( هو فيه فضيحة كده )

المهم أنا هتوكل على الله ولا هيهمنى اى تنين

وربك كبير على الكبير

وربنا يستر ان ركبى بدأت من دلوقتى تخبط فى بعض

والعملية بقت فى النملية وصبح صبح

يا أهلا بالمعارك

المعارك يعنى الإمتحانات

الناس فى كل الكليات ما اشتروش الكتب لسه واحنا هنمتحن

بعد سنة دراسية طولها حوالى عشروميت يوم

يعنى بتاع سمعوميت اسبوع

بجد سنة بدأت من أول أكتوبر السنة اللى فاتت

ويا ريتنا اتعلمنا حاجة بجد

ولا هما حتى هيمتحنونا فى اللى يعتقدوا انهم شرحوه

كلا وألف كلا طب يبهدلونا ازاى

بس وان كان هما ما علموناش احنا برضه

ولا بلاش احنا أنا فعلا حاسس انى مقصر

ايه حاسس ده كمان هكدب بعد رمضان ولا ايه

انا قطعا مقصر

ايوة أنا مذنب يا بيه

فااااااااااااااشل

أقر أنا وبكامل قواى العقلية ان لو ربنا ماسترش

ولم يستجب لدعاء الناس الكويسة اللى أنا برضه مش منهم

هتظبط ظبطة ما يعلم بيها الا ربنا

كل مرة ما نكونش مبسوطين من الحل بتاعنا فى الإمتحان بنلقى اللوم على واضعى الإمتحان

لكن هذه المرة من الأن وقبل أن أبدأ الإمتحانات أصلا

حتى لو جاب الإمتحان صعب أنا أكيد مش هيكون لأمثالى حق الإعتراض

وامتحانات الباطنة على خمس امتحانات فى خلال تمناشر يوم

يعنى هيمتحنونا فى كل معلومة قريناها أو ما قرينهاش

عفوا حتى أكون أكثر مصداقية حفظناها أو ما حفظناهاش

واللى مش هيكون قرأها قصدى يعنى حفظها زى حالاتى الفاشل فى الحفظ

هيركب التروماى ولو كان بيجيب امتياز قبل كده ايه المانع انه يجيب مقبول فى الباطنة

أصل محدش كبير عليها

عموما فاضل أسبوع على الإمتحان هحاول انقاذ بعض ما يمكن انقاذه

ويا رب بس ما اتفضحش السنة ده فضيحة زى فضيحة الراجل ده بتاع مدينتى

ولا حتى ابقى فى أسفل سافلين زى الناس بتوع الدويقة

اللهم انى أسألك فهم النبيين وحفظ المرسلين والملائكة المقربين

اللهم انى أستودعتك ما علمتنيه

يا رب لا تفضحنى يا رب لا تخذلنى

وأشوفكم بعد معركة النظرى بتاع الباطنة ان شاء الله

المهم انا كنت بكتب البوست ده علشان أهزم القلق اللى جوايا لقيته هزمنى بالقاضية

وده واضح ان العنوان مالووش دعوة بالكلام بس مش هغيره برضه

ومش هوصيكم على الدعوات

من غير عنوان

توقعته

بل وانتظرته

بل قد يكون أنى عملت على التعجيل به

اعددت نفسى لذلك

بل قل ظننت أنى أعددت نفسى له

ها وقد حدث وكان وقعه شديد

لكن وان كان فى الحلق مرارة

وان كنت أرجو من الله حلاوة فى القلب

ولأنى لست ذاك الجلد

ولا ذاك الصلب

بل انى ايضا لست ذاك التقى الورع

ولكن كان لا بد من ذلك

من وقفة

وإعادة النظر

و

لأن درء المفسدة مقدم على جلب المصلحة

ولكن هل كنت مخطئا من الأول

هل تماديت فى ذلك

أعتقد هذا

يمكن كان يمكن الحفاظ على ذلك لو كنت أعقل

هل أنا ألأن أكذب على نفسى مرة أخرى

لا أدرى

ها قد قطعت شعرة معاوية كما يقولون

ولكن

كل ما أعلمه

أنه سبحانه لن يخذلنى أبدا

وكل ما أرجوه أنى كنت مخلصا له فيما فعلت

اللهم انى أسألك اخلاصا وطاعة أجد حلاوتها فى قلبى

اللهم أسألك ثباتا وقوة اجدها فى همة أعلى ورضا بقضاءك

اللهم أسألك عطاء وكرما أجدها فى مستقبل أحسن

اللهم أسألك عقلا متقدا بإستحضار النية فى كل الأفعال

اللهم بلغنى ليلة القدر

اللهم انك عفو تحب العفو فاعف عنا

يا مقلب القلوب ثبت قلوبنا على دينك

اللهم اعتق رقابنا من النار

اتفضلوا معانا

ابدا امتحان الراوند بتاع الأطفال

اتفضلوا معانا

اللهم بلغنا رمضان

يأتى رمضان هذا العام فى وقت أنا على الأقل فى أمس الحاجة اليه

فعلا كم أسرفت على نفسى

كم فقدت من مصداقيتى حتى أمام نفسى

يأتى رمضان وقد علق بنا من الذنوب التى نحن فعلا فى حاجة لغسلها

اه غسلة نضيفة كده فى غسالة اتوماتيك

نعمل فورماتينج زى الكمبيوتر كده

نترتب من أول وجديد

محتاجين رمضان علشان نتغير فعلا

كلنا وأنا أولكم

يأتى رمضان بالنسبة لى قبل امتحانات أخر العام مباشرة

يا رب أنتفع به

فعلا لم أكن أتمنى رمضان أبدا كم تمنيته فى هذه السنة

كم خلطت أعمال صالحة قليلة بأعمال سيئة كثيرة

كم شاحنت وباغضت

كم عصيت دون حتى أن أدرك ذلك

كم أتقلت ذنوبى كاهلى حتى لا أقدر أصلا على حملها

كم من المرات نسيت انه قريب مطلع

كم كنت أسأل ويعطى وكنت حتى أنسى شكره على ذلك

بل كنت أبارزه بمعصيته

كم أتمنى غفرانه

كم أرجو رحمته

لكن الرجا بدون عمل صالح تمنى وغرور وكذب

انه عمل كالسراب وقلب من التقوى خراب

وذنوب بعدد الرمل والتراب

ثم أطمع بعد ذلك فى جنان وارفات

عند ملك الأرض والسماوات

هيهات هيهات

أنا اذا اترنح من المسكرات

فلنبدأ بالتغيير من الأن

ها قد انتصف شعبان

واقترب رمضان

ولا بد ان ندرك جيدا انه لا رمضان الا لمن استعد له

ولا بد أن نفيق من هذه الغفلة

حتى وان كان الحال ماشى زى ما بنقول

وربنا سترها علينا

فلربما يحق قول القائل

رب قوم أناخو عيسهم فى......... ذرا مجدهم حين بسق

سكت الدهر زمانا عنهم......... ثم أبكاهم دما حين نطق

يعنى ممكن يبقى فى ناس عايشين أخر منجهة والبورش والفيرارى مركونين تحت البيت

وربنا فاتح عليهم والدهر ونوائبه سايبينهم وساكتين عنهم

بس أول ما الدهر تكلم أبكاهم دما لا دموعا

ولا يأمن مكر الله أحد

ولا ملجأ من الله الا اليه

لبست ثوب الرجا والناس قد رقدوا (***) وقمت أشكو إلى مولاي مـا أجـد

وقلت يا عُدتي فـي كـل نائبـة (***) ومن عليه لكشف الضـر أعتمـد

أشكو إليك أمـورًا أنـت تعلمهـا (***) مالي على حملها صبرٌ ولا جلـدُ

وقد مددت يـدي بالـذل مبتهـلاً (***) إليك يا خير من مُـدتْ إليـه يـد

فـلا تردَّنَّهـا يـا رب خائـبـةً (***) فبحر جودك يروي كل مـا يـردُ

فلنستعد لهذا ال رمضان لعله اخر رمضان فى حياتنا

الله أعلم هل سندرك هذا أصلا أم لا

ولا يسعنى الا أن أقول قوله عليه الصلاة والسلام

اللهم بارك لنا فى شعبان وبلغنا رمضان

لازم فى الأيام القليلة القادمة نستحضر هذه النية

نعمل لها بجد

****************

قالوا قديما

ولا بد من شكوى لذو مروءة.......... يواسيك أو يسليك أو يتوجع

صدق من قال هذا

فعلا التغيير يحتاج لمن يحفزك

لسانك حصانك

الأسبوع ده روحت السوق أشترى خضار وفاك.. معلش كنت هقول فاكهة بس

دلوقتى بقى أسعارها نار ماحدش معاه يشترى

المهم أنا كنت بشترى خضار من واحدة كده

وقاعدة تقول للناس الخضار الفلانى ده بتاع الشرقية

والخضار العلانى ده بتاع الغربية والمانجة ده بتاعة الإسماعيلة

وتحلف بأغلظ الأيمان ان كل واحدة دول من المحافظة العلانية

بصراحة استفزتنى جامد

فبقولها بلاش كدب محدش قالك تكدبى

اجنا واقفين نشترى أهو ولا قولنالك ده منين

ولا عايزينك تحلفى

مش عارف بتكذبى ليه

من أجل الكذب وخلاص

راحت سكتت وانخرست

برضه

كان واحد صاحبنا بياخد تاريخ مرضى من المريض فى الكورس الخاص اللى بره الكلية طبعا

والمرضى اللى احنا بنشوفهم فى كورسات العملى كلهم طبعا

مرضى محترفين يعرفوا حالتهم يمكن أحسن من الدكتور

المهم المريض قدامى قال للطالب ده كل حاجة

والطالب ما عملش حاجة

ولما الدكتور سمع منه التاريخ كله

قاله أكسد المريض هو اللى قالك ده كله

قوم ايه الطالب يقسم بأغلظ الأيمان لنه هو اللى عامل كل حاجة

والدكتور يأكد عليه كذا مرة

وفى كل مرة يقسم ان هو اللى كتبه بنفسه ولم يساعده ايتها بنى ادم

مش عارف ليه كنت حاسس ان مناخير بتطول وهو بيتكلم

فى الأخر كان مبسوط انه ضحك على الدكتور وأقنعه بانه عمل كل حاجة

عموما الناس بقت بتستسهل الكذب وكأنه حاجة سهلة وبسيطة

وفهلوة على الأخر

ونسيو كلام اللى قلوا ان

الكذب مالوش رجلين

وان الصدق ينجيك

وقوله عليه الصلاة والسلام

وما يزال الرجل يكذب ويتحرى الكذب حتى يكنب عند الله

كذابا

ف اللى يحب يكتب عند الله من الكذابين

يكدب براحته وهو الجانى على نفسه

******

قابلت اتنين فى يوم واحد

هما أصدقاء من كليات علمية تانية

المهم واحد فيهم اتخرج والتانى لسه

هما الأتنين بدأوا يشتغلوا

وشكلهم اتغير كده

وواحد فيهم بقى بيدخن كمان

الغريب ان الإتنين قالولى نفس الكلمة

روح يا طالب ياللى أبوك لسه بيصرف عليك

قالوها بلا مبالاة

ولا كإن اللى سمعها ده بنى ادم

والله الكلمة ده وجعتنى جامد

يمكن لو كان ضربنى ما كنتش هتوجع كده

يا ريت كل واحد فينا ياخد باله من كلامه

فى كلام بيكون أشد قسوة من ضرب السياط

ويتخلف عنه جرح أعمق من لو كان بسكين

******

الصح ان كل واحد ياخد باله من لسانه

ويفكر قبل ما يتكلم

وما يتكلمش كتير عمال على بطال

فإن من كثر كلامه كثر خطؤه ومن كثر خطؤه قل حياؤه

ومن قل حياؤه قل ورعه ومن قل ورعه مات قلبه

ومن مات قلبه دخل النار

وقال عليه الصلاة والسلام

ان العبد ليلقى بالكلمة من غضب الله لا يلقى لها بالا

يهوى بها فى النار سبعين خريفا

يا نهار مدوحس كلمة كده لا راحت ولا جت

تخلى الواحد يدخل النار بطيارة اف ستاشر نسيو يركبولها عجل

ولا بموتسكيل سباق فرامله مقطوع

والله وأنا باكتب الحديث ده ايدى كانت بترتجف

تصوروا احنا بلاش انتو أنا بتكلم كام كلمة فى اليوم

يا ترى بفكر فى كل كلمة ده من غضب الله ولا لأ

بلاش كده أنا كتبت فى المدونة ده كام كلمة

ربنا يستر

والجارة اللى ماسكة جارنها وطول النهار قاعدين

ينمو ويغتابو طول النهار

تاخد بالها من لسانها اللى عايز قطعه

وتفتكر ان ربنا خلق لها أذنين ولسان واحد

يعنى تسمع أكتر من ما تتكلم

مش تتكلم بسرعة تعتمية كلمة فى الثانية

ولما سيدنا معاذ سأل النبى صلى الله عليه وسلم أو نحن

مؤاخذين بما نقول

فقال عليه الصلاة والسلام -ما تصلوا على النبى كده- ثكلتك أمك

يا معاذ وهل يكب الناس فى النار على وجوههم الا حصائد ألسنتهم

فكأنه عليه الصلاة والسلام اختصر أسباب دخول النار فى اللسان

الأحاديث كتيرة جدا جت فى بالى دلوقتى بس

فعلا مش قادر أكتبها حاسس انى كمان رايح فى أبو نكلة

الهى لا تعذبنى فإنى...............مقر بالذى قد كان منى

وكم من زلة لى فى البرايا .......... وأنت علىّ ذو صبر ومَنِ

حاجات عجيبة

فى بيتنا لا صوت يعلو على صوت المعركة قصدى صوت

ابن اختى اللى لسه عنده 5 أيام

الولد عذبنا على ما أقنعاه يجى الدنيا

الحال مش عاجبه باين وقاعد يأخر فى الخروج للدنيا

طلع ولد بيفهم

طالع لخاله أكيد

المهم قعدت أفكر فى موضوع الأولاد ده بفكر نظرى فحت قصدى بحت

ولقيت انه بكل الحسابات الإقتصادية اللى بيعملوها جهابذة الإقتصاد

ان الأولاد دول واقعيين بخسارة على الأب

طبعا أنا مش ناسى قوله تعالى

نحن نرزقهم وإياكم

بس ده فكر تجريدى زى ما بيقولو

وان الأب فعلا ما يلزموش حد يعكنن عليه ويخنقه

أكتر ما هو مخنوق

أنا بتكلم كمان عن البهبهات اللى مش متدينين واللى مش واخدين بالهم انهم مسلمين أصلا

وكمان البهبهات اللى مش مسلمين أصلا

يعنى بالحسبة ده المفروض الأب ده يتعكنن أول ما يجيلوه

بتاع صغير يخنقه

لكن سبحان الله

يضع فى قلب الأب والأم محبة الطفل ده

بالذات أول ما يشوفوه

يمكن الأب يفضل معكنن على ام الطفل ده لحد ما يتولد

بعد كده يبقى أكتر واحد فرحان بيه

يمكن الأب نفسه عمره ما يتمنى ان حد يبقى أحسن منه أكتر من ابنه

هذه سنته فى خلقه

حتى يستمر النسل والإعمار فى الأرض الى ما شاء الله

لأن العاطفة ده لو مش موجودة ما كانش هيبقى فيه الدنيا ده أصلا

الكلام ده أنا بتكلم فيه عن الطبيعى ومش جديد ولا حاجة

وهى ده الفطرة اللى ربنا فطر الناس عليها

الغريب بقى ان فيه ناس فطرتهم انتكست

يعنى ما افهمش ازاى فيه أب ممكن يسيب ابنه أو بنته بالسنين

ولا يسأل عنه أو عنها

بلاش كده

ازاى أب بأيده يحطم بنته أو ابنه

بأنه يدفعه فى طريق الهلاك و الخطيئة

أنا عارف ان الجوع ما لووش ملة

بس إلا أبنائى عرضى

بلاش كده

ازاى بقى عادى نقرا فى الصحف ان أب قتل زوجته وأولاده

مش عارف ده بقى ازاى

ده انطماس فطرة معدى حاجة أوفر يعنى

مش هقول ازاى جاله قلب لأن أكيد ما عندوش منه أصلا

بس الحمد لله ان مش ده القاعدة - لأ مش بتاعت بن لادن- والا كنا قولنا

على الدنيا السلام

المهم أنا بقيت خال دلوقتى يا خبر اسوس

الواد ده صعبان عليا جاى فى زمن الخسة والمهانة و... و... وحاجات كتيير

بس ربنا يوفق والديه ويوفقنى انى أخليه شاب ديجيتال قصدى شاب رو

لأ أقصد يعنى يبقى حاجة تنفع المجتمع والإسلام ما يبقاش مع التيار

حتى وان وصف بالرجعية والتخلف زى خاله

دعواتكم معانا بقى علشان نعرف نخوض التحدى ده

وكمان مع اولادى بعد 25 سنة كده

يدوب أكون كونت نفسى

*************

أنا مش عارف التناحة والكلاحة بقت شئ عادى ليه

يعنى فيه حاجات ناس كتير تعملها

أنا لا لأجرؤ أو أفكر انى أعملها

ليه مراعاة الغير ولا فى بالنا

يعنى فيه كذا حاجة شوفتها اليومين اللى فاتو عجيبة

يعنى تبقى وافق فى مواصلة وتلاقى واحد واقف على رجلك

اللى انت يا عينى لسه ملمعها

وتبصله رجاء انه يشيل رجله تلقيه يشيل رجله بامتعاض

ده أنا كنت بشيل رجلى من تحت رجل واحد هرسها خلاص

يقولى بتعمل ايه يا أستاذ

بقوله بشيل رجلى أثل اللى تحت معاليك رجلى مش الأرض

بيقولى مش تقولى انت كده كنت هتوقعنى

سعادته مش واخد باله ان رجلى تحت رجله وكمان مضايق انى شيلتها

والألذ انه غلطنى مع انه المفروض يعتذر

والله أنا بعتذر لأى حد خبط فيا بس حتى لو هو الغلطان

بلاش كده

تلاقى حد يطلب منك طلب وهو نفسه عارف ان الطلب ده غالبا

أو يمكن مائة فى المائة هيترفض

ويضايق قوى ويقلب وش كلب ويلبس الشراب المقلوب

لو رفضت حتى لو شرحت الأسباب اللى هو أصلا عارفها

وبتكون أسباب شرعية كمان

رحماك يا رب

**************

أكيد معظمنا سمع عن مشكلة جراند حياة

اه الفندق القيمة اللى على النيل

اللى المالك بتاعه عمل حركة رجالة وحب ينصر الإسلام حتى لو فى بلاده

فلغى الخمور من الفندق

ده بقى اللى يتقال له ينصر دينك

راحو البتوع بتوع البتاعة

قصدى البتوع بتوع السياحة

قالولوه لااااااااااااا وضربو حتة اسكندرانى

وقالو يا روح طنط قدامك مهلة

مش عارف قد ايه كده

لترجع المنكر ده لنخسف بيك الأرض

ونخليك نجمتين يعنى يبقى بنسيون كده

يعنى الحق بقى باطل

هو ده بقى فعلا ما قال عنه صلى الله عليه وسلم

كيف بكم إذا فسدت نساؤكم وفسق شبابكم ، ولم تأمروا بمعروف

ولم تنهوا عن منكر ؟ ! فقيل له : ويكون ذلك يا رسول الله ؟ قال : نعم ، وشر من ذلك

فكيف بكم إذا أمرتم بالمنكر ونهيتم عن المعروف ؟ فقيل

له : يا رسول الله ، ويكون ذلك ؟ قال : نعم ، وشر من ذلك

كيف بكم إذا رأيتم المعروف منكراً والمنكر معروفاً ؟

!

بيطبقوا الحديث بالظبط

حاجة فلة قوى

بقى جراند حياة يا ظلمة يبقى نجمتين

والأوضة بعد ما كانت بالشئ الفلانى وبالدورر قصدى الدولار

تبقى ببلاش كده

المكسب فى الليلة ده انى ممكن بعد 22 أو 23 سنة كده أعمل فرحى فى جراند حياة

لأن أكيد حجز القاعة مثلا هيبقى ب 500 جنيه

المهم ربنا يثبت الراجل ده أيوة راجل بجد

ومايرجعش عن كلامه

ورحماك يارب

يا رب ثبتنا

*********

أكيد برضه معظمنا سمع عن الشنطة بتاع الإسعافات الأولي

اللى عايزينها لازم نبقى فى كل سيارة من أول أغسطس

بيقولك لازم تكون من معدن غير قابل للصدأ يعنى شوفلك دهب كده ولا بلاتين يمكن ينفعو

لأن الإيستانليس كله مضروب دلوقتى وبيصدى

وبيقولو كمان لازم تبقى مقسمة من الداخل على أساس انها غرفة عمليات مثلا

غير المحتوايات من شاش وقطن وبيتادين

ومتنساش كمان كتيب بتاع اسعافت أولية علشان تبقى تقرا وتطبق

ده غير الفكسة

التى عجبت عجبا عجيبا أعجب عجب العجاب لما قالولى عنها

كيس تلج

اه والله بيقولو لازم يبقى فيها كيس تلج

على أساس ان معاك ديب فريزر فى العربية

ولا يمكن عاملينها علشان الظباط لما يعوزو تلج يلاقو

مش عارف ايه العك ده

يعنى الناس هتعرف أصلا تستخدم الحاجات ده

ده ممكن التدخل أصلا يكون السبب فى الوفاة أو تفاقم الأصابة

بالذات لو كان المصاب عنده كسر فى الفقرات العنقية

يعنى لو حركته قطعت رقبته

اللاصة قصدى الخلاصة أكيد فيه سبوبة لحد من ورا الموضوع ده

جيمى مثلا مستورد كام واحدة مش عارف يوديهم فين قال نشيلهالهم

أو هما حطوا الشروط ده علشان يلموا غرامات

وفى الأخر هى برضه سبوبة حلوة للظباط

ورقة حنطور وكل حاجة بتخلص

يا رب رحمااااااااااك من الهلس ده

كفاية كده كلام

طولت تانى يللا بقى نصيبكم