Jul 22, 2008

حاجات عجيبة

فى بيتنا لا صوت يعلو على صوت المعركة قصدى صوت
ابن اختى اللى لسه عنده 5 أيام
الولد عذبنا على ما أقنعاه يجى الدنيا

الحال مش عاجبه باين وقاعد يأخر فى الخروج للدنيا
طلع ولد بيفهم
طالع لخاله أكيد

المهم قعدت أفكر فى موضوع الأولاد ده بفكر نظرى فحت قصدى بحت

ولقيت انه بكل الحسابات الإقتصادية اللى بيعملوها جهابذة الإقتصاد

ان الأولاد دول واقعيين بخسارة على الأب

طبعا أنا مش ناسى قوله تعالى

نحن نرزقهم وإياكم
بس ده فكر تجريدى زى ما بيقولو


وان الأب فعلا ما يلزموش حد يعكنن عليه ويخنقه

أكتر ما هو مخنوق
أنا بتكلم كمان عن البهبهات اللى مش متدينين واللى مش واخدين بالهم انهم مسلمين أصلا
وكمان البهبهات اللى مش مسلمين أصلا

يعنى بالحسبة ده المفروض الأب ده يتعكنن أول ما يجيلوه
بتاع صغير يخنقه

لكن سبحان الله

يضع فى قلب الأب والأم محبة الطفل ده
بالذات أول ما يشوفوه

يمكن الأب يفضل معكنن على ام الطفل ده لحد ما يتولد

بعد كده يبقى أكتر واحد فرحان بيه

يمكن الأب نفسه عمره ما يتمنى ان حد يبقى أحسن منه أكتر من ابنه


هذه سنته فى خلقه
حتى يستمر النسل والإعمار فى الأرض الى ما شاء الله
لأن العاطفة ده لو مش موجودة ما كانش هيبقى فيه الدنيا ده أصلا

الكلام ده أنا بتكلم فيه عن الطبيعى ومش جديد ولا حاجة
وهى ده الفطرة اللى ربنا فطر الناس عليها

الغريب بقى ان فيه ناس فطرتهم انتكست

يعنى ما افهمش ازاى فيه أب ممكن يسيب ابنه أو بنته بالسنين
ولا يسأل عنه أو عنها

بلاش كده

ازاى أب بأيده يحطم بنته أو ابنه
بأنه يدفعه فى طريق الهلاك و الخطيئة

أنا عارف ان الجوع ما لووش ملة
بس إلا أبنائى عرضى

بلاش كده

ازاى بقى عادى نقرا فى الصحف ان أب قتل زوجته وأولاده

مش عارف ده بقى ازاى

ده انطماس فطرة معدى حاجة أوفر يعنى
مش هقول ازاى جاله قلب لأن أكيد ما عندوش منه أصلا
بس الحمد لله ان مش ده القاعدة - لأ مش بتاعت بن لادن- والا كنا قولنا
على الدنيا السلام
المهم أنا بقيت خال دلوقتى يا خبر اسوس
الواد ده صعبان عليا جاى فى زمن الخسة والمهانة و... و... وحاجات كتيير
بس ربنا يوفق والديه ويوفقنى انى أخليه شاب ديجيتال قصدى شاب رو

لأ أقصد يعنى يبقى حاجة تنفع المجتمع والإسلام ما يبقاش مع التيار

حتى وان وصف بالرجعية والتخلف زى خاله

دعواتكم معانا بقى علشان نعرف نخوض التحدى ده

وكمان مع اولادى بعد 25 سنة كده
يدوب أكون كونت نفسى
*************
أنا مش عارف التناحة والكلاحة بقت شئ عادى ليه
يعنى فيه حاجات ناس كتير تعملها
أنا لا لأجرؤ أو أفكر انى أعملها
ليه مراعاة الغير ولا فى بالنا

يعنى فيه كذا حاجة شوفتها اليومين اللى فاتو عجيبة
يعنى تبقى وافق فى مواصلة وتلاقى واحد واقف على رجلك

اللى انت يا عينى لسه ملمعها
وتبصله رجاء انه يشيل رجله تلقيه يشيل رجله بامتعاض
ده أنا كنت بشيل رجلى من تحت رجل واحد هرسها خلاص
يقولى بتعمل ايه يا أستاذ

بقوله بشيل رجلى أثل اللى تحت معاليك رجلى مش الأرض

بيقولى مش تقولى انت كده كنت هتوقعنى

سعادته مش واخد باله ان رجلى تحت رجله وكمان مضايق انى شيلتها
والألذ انه غلطنى مع انه المفروض يعتذر
والله أنا بعتذر لأى حد خبط فيا بس حتى لو هو الغلطان
بلاش كده

تلاقى حد يطلب منك طلب وهو نفسه عارف ان الطلب ده غالبا
أو يمكن مائة فى المائة هيترفض

ويضايق قوى ويقلب وش كلب ويلبس الشراب المقلوب
لو رفضت حتى لو شرحت الأسباب اللى هو أصلا عارفها
وبتكون أسباب شرعية كمان
رحماك يا رب

**************
أكيد معظمنا سمع عن مشكلة جراند حياة
اه الفندق القيمة اللى على النيل



اللى المالك بتاعه عمل حركة رجالة وحب ينصر الإسلام حتى لو فى بلاده


فلغى الخمور من الفندق

ده بقى اللى يتقال له ينصر دينك

راحو البتوع بتوع البتاعة

قصدى البتوع بتوع السياحة
قالولوه لااااااااااااا وضربو حتة اسكندرانى
وقالو يا روح طنط قدامك مهلة
مش عارف قد ايه كده

لترجع المنكر ده لنخسف بيك الأرض
ونخليك نجمتين يعنى يبقى بنسيون كده
يعنى الحق بقى باطل
هو ده بقى فعلا ما قال عنه صلى الله عليه وسلم
كيف بكم إذا فسدت نساؤكم وفسق شبابكم ، ولم تأمروا بمعروف
ولم تنهوا عن منكر ؟ ! فقيل له : ويكون ذلك يا رسول الله ؟ قال : نعم ، وشر من ذلك
فكيف بكم إذا أمرتم بالمنكر ونهيتم عن المعروف ؟ فقيل
له : يا رسول الله ، ويكون ذلك ؟ قال : نعم ، وشر من ذلك
كيف بكم إذا رأيتم المعروف منكراً والمنكر معروفاً ؟
!
بيطبقوا الحديث بالظبط
حاجة فلة قوى

بقى جراند حياة يا ظلمة يبقى نجمتين
والأوضة بعد ما كانت بالشئ الفلانى وبالدورر قصدى الدولار

تبقى ببلاش كده

المكسب فى الليلة ده انى ممكن بعد 22 أو 23 سنة كده أعمل فرحى فى جراند حياة
لأن أكيد حجز القاعة مثلا هيبقى ب 500 جنيه
المهم ربنا يثبت الراجل ده أيوة راجل بجد

ومايرجعش عن كلامه
ورحماك يارب
يا رب ثبتنا
*********
أكيد برضه معظمنا سمع عن الشنطة بتاع الإسعافات الأولي
اللى عايزينها لازم نبقى فى كل سيارة من أول أغسطس
بيقولك لازم تكون من معدن غير قابل للصدأ يعنى شوفلك دهب كده ولا بلاتين يمكن ينفعو
لأن الإيستانليس كله مضروب دلوقتى وبيصدى
وبيقولو كمان لازم تبقى مقسمة من الداخل على أساس انها غرفة عمليات مثلا
غير المحتوايات من شاش وقطن وبيتادين
ومتنساش كمان كتيب بتاع اسعافت أولية علشان تبقى تقرا وتطبق
ده غير الفكسة

التى عجبت عجبا عجيبا أعجب عجب العجاب لما قالولى عنها

كيس تلج

اه والله بيقولو لازم يبقى فيها كيس تلج
على أساس ان معاك ديب فريزر فى العربية
ولا يمكن عاملينها علشان الظباط لما يعوزو تلج يلاقو

مش عارف ايه العك ده

يعنى الناس هتعرف أصلا تستخدم الحاجات ده
ده ممكن التدخل أصلا يكون السبب فى الوفاة أو تفاقم الأصابة


بالذات لو كان المصاب عنده كسر فى الفقرات العنقية


يعنى لو حركته قطعت رقبته

اللاصة قصدى الخلاصة أكيد فيه سبوبة لحد من ورا الموضوع ده
جيمى مثلا مستورد كام واحدة مش عارف يوديهم فين قال نشيلهالهم

أو هما حطوا الشروط ده علشان يلموا غرامات



وفى الأخر هى برضه سبوبة حلوة للظباط


ورقة حنطور وكل حاجة بتخلص

يا رب رحمااااااااااك من الهلس ده
كفاية كده كلام
طولت تانى يللا بقى نصيبكم

Jul 13, 2008

الديان لا يموت


خلااااااص هقول اللى حصل فى المذبحة قصدى المحرقة بتاع امبارح
طبعا الأسبوع اللى فات كله كان مذاكرة باطنة
هتقولولى قبل كده كنت بتعمل ايه

هقولكم أصل أنا فى راوند أطفال فى نصه بالظبط
هتقولولى طب ازاى تمتحن باطنة وانت مش على ذمتهم أصلا

هقولكم هنا تكمن العبقرية بتاعتهم اصل القرنات بتوع الباطنة مش فاضيين
كان عندهم امتحانات ماجستير ودكتوراة

مع انى مخلص راوند الباطنة من 3 شهور ونص بس لسه ممتحن

لما خلصنا الراوند روحت بقول للدكتور ( خريبة )الإمتحان امتى
قاللى مع الرواند اللى بعدكم
بقوله ليه يا بيه
بيقولى أنا مش فاضيلك
ده على أساس ان احنا شوية حيوانات ومالناش لازمة فى الكلية

مع انه من غيرنا ما يبقاش أستاذ هو مش أستاذ علشان فيه طلبة ولا ايه يعنى

المهم طبعا أنا جبت كتب الباطنة كلها
ورصتها قدامى حاجة عالية كده كبيرة

فرصيت النظرى على اليمين والعملى برضه على اليمين
أحطه ليه على الشمال
مابحبش الشمال أنا
المهم عملت كومتين محترمين كده ونزلت فيهم حتتك بتتك

والوقت كان بيجرى مش عارف ليه والباطنة كبييييييييييرة حاجة كده قد تعتمية صفحة

رقم كبيير كده معرفش أقوله يعنى

وهى ده اللى ينطبق عليها

أدى الحمير و ادى النجيلة
الحمير بتاكل من النجيلة


لا احنا قصدى الحمير بتشبع ولا الباطنة قصدى النجيلة بتخلص

انت مش فاكر اللى ذاكرته ولا حتى هتلحق تخلص اللى ما ذاكرتوش

يلا المهم انا كنت بادعى ربنا

انى يذكرنى ما نسيت

واستودعه ما تعلمت


وجاء اليوم الموعود

نمت كويس أصلى مش من أنصار عدم النوم ليلة الإمتحان

وصحيت الفجر عادى برضه

المهم قعدت أقلب فى الكتب كده

وقمت أرتب شنطة العدة

سماعة سمعو الرعد فى ودانهم

جهاز ضغط مش هدعى عليهم بالضغط كلهم عندهم أصلا

وشاكوش علشان الدكتور يمسمرنى بيه بس أكيد شاكوش طبى يعنى

والشوكة الرنانة علشان اترن بيها على راسى

والمازورة أيوة هيا بتاع الترزى علشان نقيس بيها اللى طالع من اللجنة نشوفه اتنفخ كام بوصة

وخافض لسان علشان أتنك بيه على الدكتور أصل محدش هيجيب معاه خافض لسان يعنى

ومالقيتش معايا ترمومتر يا دى الكارثة

المهم قلت أشترى واحد وأنا رايح المستفشى قصدى المستشفى

روحت عملت زى ما شيماء بتاعت الكابتشينو ما قالت

وضربت الحته السينيه الكحلى بس ما لبستش كرافت الدنيا كانت حر ومش ناقصة خنقة

وضربت برضه البرفان التمام

المهم نزلت وعديت على الصيدلية لقيتها مقفولة

المفروض ان الصيدلية ده بتفتح 24 ساعة ايه اللى حصل ما اعرفش

استغفر الله العظيم يا رب مش هتشاءم برضه

المهم روحت ماشى وقولت مش هشترى


وقعدت أدعى ربنا

أن لا يفضحنى وأن لا يخذلنى


المهم يعنى وصلت المستشفى والجو كان حر موووت

وحيث اننا كنا 160 طالب والمدرج ما يكفيش فى امتحان ال

MCQ
الإختيار من متعدد الا 40 بس

راحو مكربسين الباقى زى الخرفان فى اخر القسم كده

وأنا كنت منهم

وهيمتحنونا على أربع مرات

كل مرة 20 دقيقة أصلهم عشرين جملة

أنا دخلت فى المجموعة التالتة

المهم الأسئلة فعلا كانت جحيم

ما ينفعش تتحل

أول ما قريت أول سؤال قلت بلاش سيبه للأخر

لقيت نفسى وصلت للاخر وما حلتش غير 3 أسئلة

يا نهار اثوس

يا نهار مدوحس

المطلوب انك تصحح السؤال اللى مكتوب غلط

وبعدين تختار اختيار من الخمسة

وكمان تلاقى فى الإختيارات 2 أو 3 ينفعوا

والمطلوب انك تنجم وتضرب الودع وتعرف انهى واحدة عاجبة خريبة

والا على رأى اللذيذ - اللى كان مسافر- ستخسر كثيرا وستنال العذاب الأليم ولن يرحمك أحد

المهم وأنا بامتحن بقوله يا بيه ما ينفعش فى أسئلة فيها كذا واحدة صح

بقولى بابتسامته الفتوجونيك ما ليش دعوة

كنت هنشل طب مين ليه دعوة أبويا ولا مين بالظبط

اللى جنبى قاله ما هو برضه زى الإمتحان اللى فات مش عارفين نختار ايه

راح خريبة مكشر ولبس الشراب المقلوب و قاله

ايوة احنا ظلمة ابقى تعالى حط الإمتحان معايا

كانت الأسئلة من نوعية

المحشى يشمل ايه :

الكرنب

ورق العنب

البتنجان

الفلفل
الكوسة

وبعد كده اكتشفنا ان خريبة كان بيختار من الإجابات الغلط

يعنى هو مش عارف يجاوب أصلا

ومش عارف يحط امتحان

حاجة تفقع

وفى الإخر المفروض احنا اللى نشيل الليلة

مش عارف أقول ايه بس

يعنى اللى حصل ده لو حصل فى أى جامعة غير المخروبة بتاعتنا ما كانش حد سكت

أصل احنا حيوانات بقى

المهم لمو الورق وأنا مش متأكد لحد دلوقتى اذا كنت جاوبت تلاتة ولا أربعة زى نموذج الإجابة

اللذيذ ان الأساتذة ما كانوش عارفيين يختاروا ايه فى الأسئلة

يعنى الأساتذة مش عارفيين يحلوه

يلا ضاعت الباطنة والإمتياز

أصل الكلام ده برضه هيتكرر فى اخر السنة


المهم بعد الامتحان ده هنمتحن بقى العملى

أنا كنت هتعفرت وبكلم نفسى

قلت أصبر لحسن أدخل أتخانق مع الدكتور

قعدت شوية كده

وبعدين كان كل الناس خلصت النظرى وباقى شوية لسه ما امتحنوش عملى

أنا منهم

المهم خريبة قال لأ لازم اضيع عليهم العملى كمان

وقال للنايب هاتلى فلان

الللى هو اسمى

أصل أنا معروف بقى

قولت للنايب لأ مش هامتحن عنده

قاللى أقوله ايه

قولتله قوله بيمتحن أنا معنديش استعداد خريبة يخرب بيتى

المهم دخلت على دكتور

كان شكله مضايق من حاجة طلع فى الأخر مضايق من الإمتحان

ما كانش عاجبه

قاللى انت كنت بتحضرلى أنا عارف

بس يا ترى كنت بتحضر للباقى

أنا ما ردتش بس ربنا كرمنى بمدرس مساعد قاله يا بيه ده كان لازق فى البنش الأول على طول

هى ده الحقيقة فعلا الراجل ما كدبش

قاللى اسمع صدر العيان

سمعته بالسماعة

بصراحة سمعت حاجة بسيطة قوى

بس علقت كويس على اللى سمعته

وبعدين قاللى امشى

اخدت 10

قولتله يا بيه الإمتحان من 30

قاللى لأ من 10

شوفتو الدصنانورات

عملوا ايه

ده حركة شياطين

اللى عملوها هيضربوا فى 3 بعد كده

يعنى اللى جايب 9 أهو ناقص درجة

بس هتبقى 3 بعد كده

مش عايزين يدونا درجات

زى ما نكون هناكل من أكلهم

وهنقاسمهم فى رزقهم


المهم أنى فلت من مسلخة العملى والحمد لله


بس احنا قررنا هنكشف راسنا ساعة عصرية وندعى عليهم

***********

ليه الظلم اللى حصل ده أنا مش فاهم

ليه أى واحد تحت ايده حد بيفرمه

أنا متأكد

ان سنته فى خلقه انه

لا يضيع أجر من أحسن عملا

ولو خريبة و الركيب وقفوا على راسهم وفى درجة ربنا كاتب انى هاخدها

اكييييييد هتكون من نصيبى


كل واحد فينا فاكر نفسه مظلوم من اللى فوقه

وهو أكيد ظالم اللى تحته

وناسيين قوله عليه الصلاة والسلام

إن الله لَيُمْلِي للظالم حتى إذا أخذه لم يفلته


وقال عليه الصلاة والسلام فى الحديث القدسى


"وعزتي وجلالي لأنتقمن من الظالم في عاجله وآجله، ولأنتقمن ممن رأى مظلومًا فقدر أن ينصره فلم يفعل".

يعنى الكلام واضح مش عايز تفسير

حتى اللى يقدر ينصر مظلوم و يسيبه يبقى هيروح فى الكازوزة و كمان

يعنى الأساتذة عارفين ان الإمتحان عك

وسكتوا ولا كأن فيه ناس اتبهدلت


البر لا يبلي و الذنب لا ينسي و الديان لا يموت فأفعل يأبن أدم كما تشاء فكما تدين تودان


والأخطر من ده كله دعوة المظلوم


قال رسول الله : { اتقوا دعوة المظلوم وإن كان كافراً؛ فإنه ليس دونها حجاب }

يعنى حتى نخاف من دعوة المظلوم ده

وفعلا أعجبنى قول القائل


لاتظلمن إذا ما كنت مقتدراً *** فالظلم آخره يأتيك بالندم
نامت عيونك والمظلوم منتبه *** يدعو عليك وعين الله لم تنم


أنا عن نفسى عايز حقى فى الأخرة أنا شرير بقى

لا هادعى عليه ولا هقول أشوف فيك 3 ايام ولا حاجة خالص


أصل هو ده المفلس بجد

أتدرون ما المفلس، قالوا: المفلس فينا من لا درهم له ولا متاع

فقال: إن المفلس من أمتي من يأتي يوم القيامة بصلاة وصيام وزكاة،

ويأتي قد شتم هذا، وقذف هذا وأكل مال هذا، وسفك دم هذا، وضرب هذا، فيعطى هذا من حسناته،

وهذا من حسناته، فإن فنيت حسناته قبل أن يقضى ما عليه،

أخذ من خطاياهم وطرحت عليه، ثم طرح في النار


انتو عارفيين اللذيذ ايه فى الموضوع

كل واحد دلوقتى بيقرا الكلام ده هيفضل يفكر

فى اللى ظلموه

وينسى هو ظلم قد ايه

يعنى صبح صبح وروح شوف انت ظلمت مين


من كانت عنده مظلمة لأخيه؛ من عرضه أو من شيء، فليتحلله من اليوم

قبل أن لا يكون دينار ولا درهم، إن كان له عمل صالح أخذ منه بقدر مظلمته،

وإن لم يكن له حسنات أخذ من سيئات صاحبه فحمل عليه


يعنى كل واحد يلحق نفسه قبل ما يروح فى القزوزة


طولت عليكم تانى

ده بقى سيندروم ما بعد الإمتحان

Post exam syndrom


وفى الأخر بشكر الناس كلها على الدعوات ده

وجزاكم الله خيرا

عن اذنكم بقى أشوف أنا ظلمت كام واحد النهاردة بس

Jul 5, 2008

يا باطنة عينك حمراااااااااا



تناقلت وكلات الأنباء الطبية بالكلية
أنه سيتم عقد امتحان باطنة أعمال السنة للمجموعة المأسوف على شبابها

واللى أمهاتهم أكيد داعية عليهم وبهبهاتهم خلاص احتسبوهم فى عداد شهداء الطب

الإمتحان سينصب فى المستنفع قصدى فى المستشفى اللى فى باب الشعرية
وسط أعلى كثافة سكانية فى العالم
سينصب الجلاد نصبته يوم السبت القادم

تحت شعار

معانا مش هتقدر تحل سؤال
نياهاهاها نياهاهاها

الضحكة الشريرة ده تبع الشعار

المحرقة تحت رعاية واشراف
التنين خريبة اللى هيخربها

والدصنانور الركيب اللى هيدينا بالمراكيب

على فكرة ده اساميهم فعلا

عموما أنا واحد من المأسوف على شبابه وعنده امتحان مع الشباب دول


وقلت أقول الكملتين اللى مضايقينى من زمان عن الباطنة

لحسن أموت وهما لسه فى قلبى

الأول هتكلم يعنى ايه باطنة؟

ب: بهدلة

ا: انتحر أحسن لك

ط: طريق الأهوال

ن: ناس قرن اللى هما اساتذة الباطنة يعنى

ه: هتسقط هتسقط

بجد فيه ناس كتيير مش عارفيين يعنى ايه باطنة

وفاكرين ان الباطنة ده هيا البطن

احب اقولهم لا وألف لا

الباطنة ينطلق على كل ما هو باطن مش شايفينه

يعنى أمراض الصدر والقلب والعصبية

والنفسية والكلى و أمراض الدم
والغدد الصماء

وكله وكله أى حاجة باطنة لو فاضيين ممكن نقولهم يعنى

فكلمة دكتور باطنة ده صعبة قوى أصلا

المهم مش فاهم ازاى أصلا يبقى فيه حاجة اسمها دكتور باطنة

ده صاحب بالين كداب وصاحب تلاتة منافق

مابالكم بقى بصاحب اا أو 12

ده ربنا بيقول
ما جعل الله لرجل من قلبين فى جوفه

ده عايز يحط بتاع عشرة خمستاشر قلب

وعلى هذا من الصعب جدا بل قد يكون من المستحيل

ان فيه حد يحيط علما بكل الحاجات ده

وعلشان كده تلاقى حيتان ودصنانورات الباطنة اللى هما الأساتذة

فيهم حاجة مش مظبوطة كده وعاملين مفيش زيهم

وصباح الكبر اللى فى الأرض

مع انهم كلهم الا من رحم ربى ما يعرفوش الا تخصص واحد والباقى فيه بلاليص
مش الإنجليز بيقولو
Jack of all trades Master of non

كل واحد يذاكر تخصص وينسى الباقى

واحنا بقى المفروض نعرف كل حاجة

بالذمة مش حاجة تفرس وتفقع المرارة

تاني حاجة هتكلم عنها طبعا

كتب الباطنة

فيه كتب باطنة مصرية وده كتبها دصنانورات الباطنة فى الجامعات المختلفة

وده كتب عاملة زى ميكى ماوس كده

لا تطلع منها لا بحق ولا باطل

ومافيهاش شرح معمولة علشان تتحفظ أصلا

والغريب ان كل الكتب المصرية زى بعض

كلهم يمكن حتى بالكلمة

كلهم فيهم معلومات قديمة

مرصوصة بنفس الطريقة حتى مع اختلاف الناقل قصدى المؤلف

والأغرب بقى والأعجب ما فيش ولا كتاب يشبه أى كتاب من بتوع الخواجات

اللى هما أصلا عملوا الباطنة

بس هما عاملين كتب علشان تفهم مش تحفظ


الحاجة التالتة اللى هتكلم عنها

حاجة شوية متخصصة بس هحاول أوضحها

فيه حاجة عندنا فى الطب اسمها متلازمة

Syndrome

يعنى شوية أعراض كده تلاقيهم مع بعض فى عيان واحد

ويروح الدصنانور اللى شاف الأعراض ده

وفى معظم الأحيان ما يكونش عارف ليها سبب مسميها باسمه

وأكيد يعنى بيكون تنين أو دصنانور خواجة

تلاقى بقى أسامى عجيبة

Herferrodt's syndrom

و

Caplen's syndrom

وممكن تلاقى

Bedengan syndrom


حاجة تفقع فعلا

أى دصنانور يجيلوا حالة ( مريض يعنى) فيها تلات أو أربع خمس حاجات مش عارف يربطهم ببعض

يروح يقول عليها سيندروم ويسميها با سمه

يعنى مثلا نعكشة ممكن حد يجيلها وصباع رجله مدوحس ومتعور فى قفاه

وعنده دور برد ومناخيره كبيرة شوية وشعره منكوش
تروح مسمياها


Na3kasha el na3kosha's syndrom

نعكشة سيندروم

أو سنووايت تلاقى بنوتة حلوة ولابسة فستان حلو

وأكلت التفاحة وأغمن عليها ولقيت كمان ودن فيها حلق والتانية لأ
تروح مسمياها

Snowwhite's syndrom

وعلى هذا فقيس

والمشكلة ان معظم هذه السيندرومات محدش بيشوفها أصلا

والراجل اللى اكتشفها عملها من هنا واتمدد مات

ومحدش شافها تانى

بس هو بلانا بقى بيها فى الكتب

ولازم تحفظها صم والا الحيتان بتوع الباطنة يفرموك

يعنى ممكن تقول لأحد التماسيح دول ده العيان عنده كذا و كذا و كذا

اللى هما الأعراض والعلامات الطبية بتوع السيندروم

وانت يا عينى مش فاكر اسم السيندروم

يفضل يقولك ايه اسمه خلصنا والا ما فيش درجة وكائنه مناسب الدصنانور اللى عمل السيندروم

انتو عارفين ايه العجيب فى الموضوع

ان السيندرومات ده معظمه ملوش علاج

يعنى بنعالج كل عرض لوحده ايه بقى لازمة انى اسميها أصلا مش عارف

وتلاقى الدكتور بتاع الباطنة مضايق

ويقول يا خسارة الحالة ده كان فاضل لها ان صباع رجله الصغير يكون طويل 2 مم

والحالة كانت تبقى فسكونيا سيندروم

عايز أعرف العيان هيستفيد ايه لما يعرف ان اللى عنده ده فسكونيا سيندروم ولا بلا أزرف

هو أهم حاجة عنده انه يتعالج

ارحمنى يا رب

هتكلم كمان عن حاجة شوية متخصصة برضه

اسمها
Differential diagnosis

مش عرف قوى معناها بالعربى

بس هيا حاجة للتفربق بين الأمراض

وتحت العنوان ده فى أى مرض تلاقى فيه عشرين تلاتين مرض تانى يتاشبهوه معاه

حتى ولو فى عرض واحد

يفضلوا يحطو كلام مالوش لازمة

والدصنانورات لازم يسالوك فيها

يعنى الحالة قدامك واضحة ويتحلف عليها انها مرض كذا

لكن التمساح اللى بيسألك مالوش دعوة

لازم تقوله ايه الحاجات التى تتشابه مع المرض ده

يا باشا الحالة واضحة

أفضل أعقدها ليه

اى نعم فيه حالات بتحتاج كده بس المعظم لأ

وتلاقى الدصنانور ده حافظ الحاجات ده صم

وبرضه يغلط فى التشخيص عادى يعنى
انتو متصورين مثلا
سؤال زى

يا ابنى ايه الديفرينشيال دياجنوسيس بتاع الكحة ده يتجاوب ازاى

انت المفروض تقول أى حاجة على وجه الأرض تخلى الواحد يكح

من أول اللى بيدلع وبيستهبل لحد السرطانات

طب وفى الأخر أنا استفدت ايه مش عارف

العيان استفاد ايه برضه مش عارف


هذه هى قصة الباطنة يا ناس

أنا كده استريحت قولت اللى فى نفسى قبل ما اموت

**************
المهم الإمتحان اللى جاى ده

دعواتكم معايا

الإمتحان فى الباطنة كلها

ربنا يستر

هيبقى جزء اسئلة اختار من متعدد

وده الإختيارات فيه مابيبقاش ليها علاقة بالسؤال

ده لو السؤال مكتوب صح أصلا

يعنى لو عرفت تحل نصه يبقى انت من الأوائل أكيد


والجزء التانى بقى العملى

وده منك للدصنانور علطول

وهيفرمك هيفرمك

يعنى لو واحد زى خريبة - عاشت الأسامى- مثلا

هيبتسم ليك ابتسامة فوتوجونيك فى الأول وبعدين ينقض

على الفريسة

نياهاهاها



ولو الركيب - اسم ده مش اللى هو هيعملو فينا بس اسم على مسمى عموما- هيقولك

بصوت هادى كده قوللى يا ابنى عدد خلايا الكبد

هتقوله نعم يابيه أنا معدتهومش

هيروح زوووووووو رازعك الصفر المتين دون أن يطرف له جفن


ويا سلام لو واحد من التانين

زى الدكتور المبتسم - ده مش اسم ده بقى صفة- هيقولك يا ابنى

سيبك من العيان ده زى الفل

قوللى ايه هيا الحنكولولو سيندروم

وحيث انى فاحت الكتب فهجاوبله عليها

هتروح الإبتسامة طايرة ويقولى انت بتجاوب عليا

وبعدين يقولك ايه عدد كرات الدم الحمرا

هاروخ أقوله خمسة مليون فى الديسيليتر

مذاكر بقا

هيقولى بابتسامة النصر على شفتيه قولى أساميهم

نياهاهاها


ولا الدكتور اللذيذ - ده صفة برضه- ده هيسبنى أفحص العيان

فى 5 دقائق

وبعدين يقوللى

ايه اللى فى العيان اللذيذ ده

هقوله فيه تضخم فى الكبد والفص الشمال كذا واليمين كذا

مش بقولكو مذاكر

هيروح الدكنور يحط ادده على العيان

ويقوللى فعلا الراجل عنده تضخم من النوع الفاخر

ويقوللى أكيد فحصت صباع رجله الصغير وإلا ستخسر كثيرا

أنا هبصله كده وأقوله هفحصه ليه

هو يقوللى معنى كده انك مافحصتهوش

ويقولى هاهاهاها خسرت كثيرا

وزووووووو الصفر المتين

*********
أنا عارف انى طولت والعملية وسعت منى المرة ده بس
اعذورونى

عندى امتحااااااااان بااااااااااطنة

واللى أنا فيه ده اسمه

سيندروم ما قبل الإمتحان

Pre exam syndrom

كل الى ارجوه منكم دعوات

ادعوووولى جامد

واشوفكم على خير بعد الإمتحان ان كان لسه ليا أجل
************
تحدييييييييييث : ايه ده
أنا نسيت أكتب الإمتحان امتى
الإمتحان يوم السبت القادم
الثانى عشر من يوليو
دعوات بقى
علشان ما نتروقش كما حصل فى امتحان الباطنة اللى فات