May 30, 2008

حكومة منحرفة وشعب منحرف



إذا كانت الحكومة بما تفعله معنا يعد انحرافا على كل المستوايات
سواء كان انحرافا اقتصاديا ببيعها البلد والغلاء الفاحش


والمصالح المشتركة بينها وبين أغنياء البلد زى أحمد عز -اه فعلا بيعز عليه يشوف حد تانى معاه فلوس-


اللى خلاص نويت أقدم له طلب يشغلنى عنده أى حاجة انشا الله مكنة خراطة أو حتى سيخ حديد


أو إنحرافا أخلاقيا ودينيا وهذا لا يخفى فى الكذب اللى عمال على بطال ميعرفوش إن الكداب بيروح النار


وهما بيكدبوا ليل ونهار


فما يفعله الشعب - اللى هما احنا يعنى- يعد أكثر انحرافا
خلينا بس نشوف ازاى احنا منحرفين اقتصاديا


بقت كماليتنا ضروريات وبقينا محدش يعرف حد غير نفسه وبس


بقى كل واحد يقول يللا نفسى ومابعديش حد


يعنى مش هاين عليه يكون الطوفان بعده


يعنى مثلا فى الكام يوم اللى فاتوا دول عدى عليا مواقف كتيرة ورا بعض بتقولى إن إحنا نستاهل اللى بيعملوه فينا
اه من حقهم يعملوا أكتر من كده


إذا كان كافيه زى سيلنترو متلقيش فيه موضع لقدم طوال اليوم


خصوصا فى وقت الإمتحانات ده


وأقل واحد هيدفع 50 جنيه ده بالميت


لما تبقى عربيات المرسيدس مرطرطة فى الشوارع


لما تلاقى البنات كل واحدة عاملة ميك اب وكوافير بفلوس توكل عيلة فى إسبوع


بلاش كده خلينا فى الموت حتى


لو شوفتو عزاء فى الحامدية الشاذلية حيث بتلاقى الناس مبتسمة و كلوا لابس بدل على الموضة وجميع الألوان


و عزاء السيدات حيث الإلماظات والفوريرات - جمع فورير البتاع الفرو اللى بيلبسوه ده-


والأنكى من كده انهم ممكن يصوروه فيديو مش عارف ليه بصراحة يمكن علشان لما يحبوا يزعلوا ولا حاجة
بقينا حتى فى العزاءات فيه عنطزة وتفرقة



هتقولولى يا عم الحاج اللى انت بتتكلم عنهم دول الناس المتريشة اللى معاهم فلووس



هقولكم بلاش كده
خلينا نشوف حاجة زى المحمول مثلا


تلاقى الراجل لابس جزمة مقطعة ومعاه محمول اخر موديل


وجايبه بالتقسيط ومضيع عليه قوت عياله


مش ده انحراف وغباء


بلاش كده
لما نيجى نعمل فرح
ممكن تلاقى الفرح يتكلف فلوس تجوز واحد تانى
اه والله عجبا نفعل


ده غير ان أبو العروسة بيكون خرب بيت العريس فى المهر


يعنى لما يبقى واحد لسه متخرج من طب وراح يخطب زميلته
يقوم أبوها عايز مهر 30 ألف


ده غير الشقة والفرح والذى منه


الكلام ده حصل
لو أنا مكانه كنت قلتله خليها جنبك


وكمان فى الأكل احنا مانتوصاش فيه


وبناكل وكمان بنرمى اللى فاضل


اه ده غير مثلا الفلوس بتاع الكورة
يعنى مثلا كل لاعب فى نادى الزمالك أخد 50 ألف جنيه
علشان بيلعبوا وكسبوا كاس الصفيح ده



واخدين بالكم بيلعبوا مش بيعملوا حاجة ليها لازمة


والسبب احنا وتعصبنا الزايد اللى خللى الحاجات ده بالمبالغ ده
نفس الكلام عن أفلام السينما
لما واحد زى عادل إمام ياخد 10 مليون علشلت فيلم
مش احنا السبب ولا ايه


أقول ايه ولا ايه


ومع ده كله فيه بقى الناس اللى مش لاقية بجد


واحنا ولا هنا


جارك ومنفضله
معاك فى الشغل ومصدرله الطرشة


مالين الشوارع ومحتاجين فعلا على الآخر




ناهيلكم عن الإتحرافات الأخلاقية والدينية


لا تخفى على أحد

من سرقة وإغتصاب وإحتكار واستغلال وعلى كل لون تلاقى

إحنا عايزين واحد يحكمنا زى زياد ابن أبيه كده

عندما أصبح واليا على البصرة

ولقى السلب والنهب والإغتصاب والإحتكار على ودنه والناس الكويسة منفضة

فخطب فيهم خطبته المشهورة وقال فيها


إنى رأيت اخر هذا الأمر لا يصلح إلا بما يصلح به أوله لين فى غير ضعف وشدة فى غير عنف
وإنى لأيم الله

لأخذن الولى بالمولى - يعنى لو العبد غلط هيجيب سيده كمان-
والمقيم بالظاعن - اللى هو المسافر- والمقبل بالمدبر والمطيع بالعاصى
والصحيح منكم فى أهله بالسقيم- المريض يعنى - حتى يلقى الرجل منكم أخاه فيقول انج سعد فقد هلك سعيد
أوتستقيم قناتكم - يعنى تتظبطوا-

عايز يعلمهم يخافو على بعض وازاى يتكافلوا

ثم أحدث عقوبات جديدة علشان يتأدبوا فقال

وإياي ودلج الليل- يعنى الخروج فى الليل ده أول حظر تجول فى الإسلام-
فإني لا أوتى بمدلج إلا سفكت دمه - يعنى هيجيب رقبته-

وإياي ودعوى الجاهلية فإني لا أجد داعياً بها إلا قطعت لسانه

ولقد أحدتثم أحداثاً لم تكن ولقد أحدثنا لكل ذنب عقوبة

فمن غرَّق قوماً غرّقناه ، ومن أحرق قوماً أحرقناه ، ومن نقب بيتاً نقبنا عن قلبه ،
ومن نبش قبراً دفناه فيه حياً .

وايم الله إن لي فيكم لصرعى كثيرة ، فليحذر كل منكم أن يكون من صرعاي
كلام جامد أى نعم ده مش من الإسلام بس برضه اللى هما بيعملوه مش من الإسلام


وكمان اللى إحنا بنعمله


احنا بجد محتاجين نفوق


محتاجين احنا اللى ننصلح الأول


إن الله لا يبدل ما بقوم حتى يغيروا ما بأنفسهم


نعيب زماننا والعيب فينا................. وما لزماننا عيب سوانا

خلينا نبدأ نعمل حاجة


نبدأ نقلل من انحرافنا الإقتصادى

يا جماعة احنا فى حالة كرب وهم عظيمين

بلاش سياسة اللى يعوزه البيت يحرم على الجامع

وخلينا فى سياسة قدم السبت تلاقى الأحد
يعنى قدم فى دنياك علشان أخراك

الحالة جيم لأ ده ضاد جيم

الحزام لازم يتشد شوية
الصدقة فى الأيام ده هى الصدقة اللى بجد
هيا ده اللى تبقى



بجد أنا حصل معايا موقف غريب من يومين


الصدقة رجعتلى أربع أضعاف فى ساعة


كل ما أتمنى أن يكون باقى الأضعاف فى الأخرة


أصلها الحسنة بعشرة أمثالها إلى سبعمائة ضغف




فليعاهد الكل نفسه أمام الله أن يتصدق كل يوم بنص جنيه يعنى 15 جتيه فى الشهر


مش مبلغ كبير اللى يقدر يطلع أكتر يبقى أحسن
وكمان مافيش بواقى أكل يترمى
أتمنى أن يؤخذ الموضوع بجدية
فعذرا إن عزفت اليوم ألحان الشجيينا
........
.. أو أسرفت فى التبيان عما كان يدمينا
هما عايزين الدنيا خليهلهم


وكمان هنسبليهم النار بالسونا والجاكوزى وسلطتها وباباغنوجها


ولا إيه رأيكم

May 24, 2008

خبطتين على الراس







عندى امتحانين الأسبوع ده



الأول يوم الإثنين وده اتدبست فيه على خوانة

الدكتور اللى باخد عنده درس عملى
عامل امتحان نظرى لمجموعة النظرى اللى عنده
المهم قاللى هتيجى تمتحن معاهم
ولازم تجيب درجة عالية
وإلا ماشوفش وشك
أنا من قال عنى الشاعر
ألقاه فى اليم مكتوفا من الأيدى ..........وقال له اياك إياك أن تبتل بالماء

والتانى يوم الخميس

أحلى حاجة إن الإمتحانين فيهم الجزء الأكبر عن أمراض الجهاز العصبى


دعواتكم معايا

ده شكل المخ من بره



وده شكله من جوه
يعنى لما نفصل فصى المخ عن بعض
يعنى زى ماتكون قسمت برتقانة
وبصيتو عليها من جوا

معلش بقا بهييس معاكو شويه

إدعولى

___________________________________

تحديث: 4-6-2008

معلش التحديث متأخر علشان كنت ناوى أغطرش على الموضوع

بس هعمل ايه الكل بيقولى عملا ايه فى الإمتحان

أما الإمتحان الأول اللى كان فى الكورس

كان أحلى مافيه انه ماعليهوش درجات يعنى تدريب

بس طبعا فيه تهزئ والدكتور بتاعنا بيحب قوى كلمة يا فاشل يا فاشل

واللى يغلط يدفع جنيه والكلام ده

أنا طبعا ذاكرت اللى فيه النصيب وروحت الإمتحان

لقيت الناس قاعدة والدكتور قاعد يتوعد ويتوغد اللى هيغش

واقفلى الكتاب يا بت و اقفل الكتاب يا بت

كلهم كانوا بنات كام ولد بس هما اللى كانوا موجودين

المهم جت ورقة الأسئلة ولقيت نصف الأسئلة من فرع أمراض القلب

والباقى الأمراض العصبية

وأنا تقريبا ما كنتش فتحت كتاب أمراض القلب

بس الإمتحان كان كويس

عدا سؤال واحد كان غريب جدا

حاجة كده زى

ما هى أسباب تخن الفيل؟

المهم عدى الإمتحان

واللى أنا عرفته بعد كده انى جبت فيه امتياز

أى نعم امتياز نص كم بس الحمد لله

والدكتور قاللى كويس قوى حيث ان ده أول امتحن معاه وكمان أنا مش معاه فى النظرى

أما عن الإمتحان الثانى

فكان خمس أسئلة من عينة

أكتب كل اللى تعرفه واللى كمان متعرفوش فى الآتى

وكان فيه سؤالين يتجاوبوا

وسؤالين بيشاوروا عقلهم

وواحد ماسمعناش عنه

كان سؤال حاجة كده زى

ما هى البوروروم؟

طبعا البتاع ده مش موجود فى ميكى ماوس اللى اجنا بنذاكر منه

بس الدكتور كان لمح لحاجة شبهها فى المحاضرة

وحيث انى كنت قريتها فى كتاب تشيكوسلوفاكى

فجاوبت فيها كويس

المهم مش هفرحكم فى دلوقتى

انتظروا الإمتحانات جاية كتييييير

والأمر مايسلمش

ودعواتكم

May 20, 2008

أيوة باتكسف فيه حاجة



ترددت كتيرا قبل ما اكتب البوست ده


بس ما باليد حيلة


بعد ما بقيت باسمع كلمة ايه اللى انت فيه يا بنى ده حتى البنات مابقوش يتكسفوا



المشكلة ده من صغرى كنت باتكسف من كل الناس وأى حد

ده كان بيخلينى شوية كلامى قليل مش اجتماعى خالص

أفضل أقرأ معظم اليوم

والناس برضه ماكنتش بتسيبنى فى حالى

تحس انهم ما بيلاقوا حد يتريقوا عليه
واللى يقعد يقولك ده بيتكسف زى البنات

وده ماله كده طالع فرفور

وكلام من هذا القبيل
المهم الموضوع استمر لحد دلوقتى

هو أى نعم قل شوية عن زمان
بقى لى اجتماعيات أكتر شوية

وبقيت باتشجع وأقوا رأيى كتير بالذات فى الكلية ومع الأساتذة

لكن مثلا ما زلت برضه باتكسف من والدى

يعنى من زمان دايما كل ما كنت باحتاج حاجة أقول لماما وهى تقوله

فى الأونة الأخيرة- حلوة الأونة ده- بابا بقى بيصمم انى أطلب منه الحاجان بنفسى

ويقول لماما هو اللى يجى يقول

هو عايز بكده يرفع الحرج ده ويخلينى أشجع شوية

اه دلوقتى بقيت باروح أطلب منه علطول

لا أنكر انى مابقتش أطلب الا الضرورى قوى بس برضه أحسن كتير من الأول

الكسوف ده بيتعدى ساعات انى ماطالبش بحقى من بعض الناس

ويمكن مثلا حد ياخد منى حاجة وأطلبها منه ومايرجعهاش واتكسف أكرر الطلب ده مرة تانية

أى نعم الموضوع ده مش مع كل الناس لكن برضه

هذا طبعا وناهيكم عن الجنس الآخر


أى نعم أنا باتعامل معاهم كويس قوى لكن فى الحدود العادية

أول ما بتبدأ تشذ وشى يجيب ألوان

لسه أخر تعليق سمعته ياختى كميلة وشك احمر انتى بتتكسفى ده البنات مابتتكسفش




ومش هنسى مرة لما دكتور وأنا فى سنة تالتة اتكلم معايا فى موضوع كده فى المدرج ووشى احمر قعد يتريق ويضحك عليا

ولسه قريب كان فى واحد عزيزعلى بيقولى

على فكرة انت كده صح بس مش هتنفع فى الدنيا ده الناس كلها مش زيك محدش هيرحمك لازم تاخد بالك من كده

*********************
المهم دلوقتى المشكلة فعلا انى اكتشفت ان الحياء ده بقى عملة نادرة حتى بين البنات

يعنى مشهد ان ولد بيعاكس بنت باشوفه كل يوم


أول ماشوفه وشى يحمر غضبا وكسوفا


المصيبة ان البنت فى كثير من الأحيان بتستجيب وتلقيها بطئت فى المشى

طبعا أنا معرفش ايه اللى بيحصل بعد كده

بس مهما كان يدل على ان مفيش حياء

ده طبعا غير الألفاظ اللى بتسمعها طول النهار والله ماقدر أكتبها حتى فضلا عن انى أقولها


ومش ناسى مرة كنت فى النادى وولد كتن بكلم بنت وكانت بتقوله ألفاظ وقحة بطريقة عمرى ماشفتها


وكانوا بيتكلموا عادى جدا ولا كأن فى حاجة


طبعا العبد لله ماكنش مصدق ودانه وكنت فاتح بقى مش مستوعب


وطبعا سبت المكان ومشيت

وده غير مواقف تانية كتير شخصية اتكسف أقولها بصراحة

فى تعاملات كتير بيكون البنات أجرأ منى

والله أنا مابقيتش عارف ده جراءة ولا وقاحة

****************

أنا طبعا مؤمن بأن الحياء شعبة من شعب الإيمان كما ورد فى الحديث

وأنه عليه الصلاة والسلام مر على رجل وهو يعظ أخاه فى الحياء- أى ينهره بسبب الحياء لأن حقه قد يضيع بسبب هذا- فقال عليه الصلاة والسلام دعه فإن الحياء من الإيمان

وما أوخذ بسيف الحياء فهو باطل
فضمن أن ما سُلب بسبب الحياء باطل وغير مشروع
وفى الحديث " أن مما أدرك الناس من كلام النبوة الأولى : إذا لم تستحى فاصنع ماشئت"

وقال تعالى " فجاءته إحداهما تمشى على استحياء قالت ان أبى يدعوك ليجزيك أجر ما سقيت لنا "


تفسير الآية ده لوحدها كارثة يورينا حجم البجاحة اللى احنا وصلنالها

أصل بجد ماينفعش الى احنا فيه ده

أنا مابقتش عارف ايه الصح وايه الغلط بعد ما الحق اتقلب باطل


وقال الشاعر


فلا والله فى العيش خير .................... ولا فى الدنيا إذا ذهب الحياء
إذا لم تخشى عاقبة الليالى ......................ولم تستحى فاصنع ما شئت


وصدق الشاعر حين قال

شباب اليوم يا أختي ذئاب *** وطبع الحمل أن يخشى الذئاب

وقال جويدة


رأيتك يا مصر جسما نحيلا

فأين الجمال وأين البهاء؟

وأين ثيابك عند الربيع

وأين عبيرك ملء الفضاء؟

سلبناك كل الذي تملكين

سرقنا النذور قتلنا الحياء

ظلمناك دهرا تركناك نهبا

لليل السجون وذل الغباء


ليس كل ما يأتى لنا من الغرب يؤخذ على علاته

لا بد من مراجعة أنفسنا

الكلام ده اللى أنا مقتنع بيه

اللى رأى تانى يقولوه بس من غير تريقة أنا لسه بادئ راوند عصبية ومش عايز أتعصب على حد

وسلملى على البلد
اللى مابقاش فيها خشا
أصله كمان راح مع الغلا
وبقى نادر زى الوفا
عنيا اتملت عليها بكا
ليه الحيا بين الناس كأنه وبا
ليه زرعنا فى أولادنا البغى
وياعينى يا عينى يا عينى عالولا
بجح وبلطج هى كده المرجلة
***************
اللهم اهدنا لما تحب وترضى
والسلام ختام

May 15, 2008

غطينى وزعقى على

الأيام اللى فاتت ده كنت بذاكر علشان امتحان النفسية


المهم عادة كل ما أبدأ اذاكر باكتب فى صفحة الكشكول اللى بذاكر فيه أبيات شعر أنا حافظها أو حديث أو اية قرأنية


المهم لقيت نفسى باكتب الأبيات ده:



قد علم القبائل من معد................إذا قببا بأبطحها بنينا


بأنا المطعمون إذا قدرنا :............:::::.وأنا المهلكون إذا ابتلينا


وأنا المانعون لما أردنا...............::: وأنا النازلون بحيث شينا


ونشرب إن وردنا الماء صفوا:::::::::::::::::: ويشرب غيرنا كدرا وطينا


إذا بلغ الفطام لنا رضيع::::::::::::::::::::: تخر له الجبابر ساجدينا



الظاهر ان النفسية كانت مأثرة على فجالى جنون العظمة وقعدت أهلوس


وقعدت أفتكر مين اللى قال الأبيات ده وايه قصتها


الأبيات ده من معلقة بتاعت عمرو بن كلثوم - شاعر جاهلى طبعا يعنى مش ده اللى بيكتب لشعبان عبد الرحيم -


أول ما افتكرت المناسبة اللى قالها فيها قعدت أضحك


قلت أضحكوا معايا


الحكاية بدأت كما يلى

كان يا مكان فى سالف العصر والزمان كان فى ملك اسمه عمرو بن هند - وما تسألونيش ليه كلهم بأسامى ستات اشى بن كلثوم والتانى اسمه بن هند ما علينا- المهم الملك ده كات قاعد كده بيحشش مع الحاشية بتاعته وكان الأفيون جامد ومشعشعين

والراجل مبسوط قوى كده راح قلهم "أنا جدع احنا أحسن ناس ده مفيش ست من الستات بتوع العرب كلهم ما يرضاش يخدم مامى"


قالولوه "مش قوى كده لأ فيه"

قالهم "مين"

قالولوا "ليلى أم عمرو بن كلثوم"

قالهم "اشمعنى يعنى"

قالولوه" أصل أبوها كيت وعمها كيت أعز العرب وجوزها ده أحسن واحد يركب بورش عندهم غير ابنها اللى من ساعت ما راح المدعوقة الجامعة وهما عملوه عمده عليهم"

قالهم "الكلام ده مايكلش معايا هاتوهولى على الماسنجر أكلمه"


فتحوا الماسنجر لقوه أوف لين

قال "خلاص كلموه على الموبايل واعزموه على الأفترنون تى"

ولا أقولكم هاتو أكلمه


أول ما رد عليه قالوا "ازيك ياميرو عامل ايه معاك عمرو بن هند يا ولد"


التانى قاله " أهلا يا أونكل أى خدمة"


قاله:" أنا عازمك بكرة على الشاى وابقى هات معاك الحاجة والدتك"


قاله" ماشى يا أونكل طب نيجى قصر المريوطية ولا حضرتك فى مارينا"


قاله "هستناك فى المريوطية"


المهم بن كلثوم مكدبش خبر وقال لأمه


تانى يوم قال لبس الحتة الكحلى وقال لوالدته " يا اما البسى الطقم البتنجانى بيبقى حلو عليكى"


ماكانتش راضية بس أقنعها


المهم وصلوا القصر والراجل استقبلهم كويس


وقاله " الحاجة والدتك تقعد مع مامى فى التراس


وانت تعال نقعد فى الليفينج رووم نلعب بلاى ستيشن وأغلبك"


دخلت الحاجة أم عمرو بن كلثوم التراس وقابلتها الست أم الملك


المهم الراجل الخادم جاب ترابيزة الشاى وكان جايب معاها طبق فيه كرواسون والتانى فيه شيكولات كيك


المهم أم الملك قالت لأم عمرو " ممكن تناولينى كرواسون بليز"


أم عمرو قالتلها" نعم نعم يا ادلعادى قواظون ايه ده


اتنى بتشتمينى فى بيتك وكمان عايزانى أناولهولك لأ يا عووووومر"


وراحت مزعقة بصوت عالى وقالت" يا عووووووووومر تعالى شوف الولية ده"


فى الوقت ده كان عمرو والأونكل قصدى والملك كانوا بيتخانقوا لأن عمرو كسب الجيم


والملك بيقوله ده ظلم ده الجماهير كانت بتشتم طوول الماتش وبتحدف طووب


المهم عمرو سمع صوت أمه فجرى على التراس وقالها " لبيك أماه"


قالتله " أماه ايه اتلهى شوف الولية ده بتقول ايه


ده بتقولى أناولها ا لقروظون احنا بنتهزق يا ولد وراحت قالعة القبقاب عايزة تضربها بيه


عمرو مسك ايديها وقالها " لأ يا امه ليها راجل يترد عليه"


"واللى يرشنا بالميه نرشه بالنار"


وعنها


راح عمرو واخد سكينة الفاكهة ودبح الملك فى قلب بيته


وخرج عمرو فى الشارع ماسك السكينة بتنقط دم


وقال معلقته الشهيرة التى فيها:


قد علم الناس اللى فى قبلى................. وبحرى بانأ أبراجا بنينا


ونركب ان أردنا الكار جاجوار................ ويركب الأوتوبيسات المطحونينا


ونشرب إن أردنا الشاى ليبتون ....................ويشرب غيرنا شاى التموينا


اذا بلغ الشباب عندنا عيل.................. دخل ال اه يو سى ليفترينا


انتهت القصة نقلا عن ذاكرتى بتصريف


:D

*****************


شوفتو الراجل جاب راس الملك لمجرد انه حس انه بيتهان

وفين


فى بيت الملك


شوفو بقى احنا بتهان اهانات صريحة وصارخة ويطلعو لسانهم


واحنا ولا هنا


المشكلة الإهانة على مستوى الأفراد وكمان الدول


على فكرة الراجل ده كان عربى واخدين بالكم عربى


يعنى ماكانش انجليزى سخن ولا حاجة


احنا بنتهان ونتهزء ونقول كمان


فعلا


من يهن يسهل الهوان عليه............. ما لجرح بعده إيلام


وفعلا


هيهات أن يرضى بالحقير من ::::::::::::::::المنى إلا الحقير




وأصبح من حق نزار أن يقول:


هذا هو التاريخ يا صديقتى من غير تعليق


وكل ما قرأت عن سيرتنا العطرة


من كرم ونجدة ونخوة


ليس إلا تلفيق




طبعا نزار ماقالش كده غير بعد ما شاف حالنا


ومفيش حد فى العالم يقدر يصدق ان إحنا كنا كده وأصبحنا على النقيض








فقال مطر

عربى أنا ارثينى شقى............... لى قبرا واخفينى


يعنى غطينى وزعقى عليا وصوتى



ولا يسعنى إلا أن أقول


اللهم ارفع مقتك وغضبك عنا


ربنا لا تسلط علينا بذنوبنا من لا يخافك ولا يرحمنا


يارب خفف عنا البلاء






ملحوظة: اللى عايز يقرا القصة الأصلية من غير تصريف أكيد هيلأقيها على النت
ولا لأنا ممكن اخد فيكم صواب قصدى ثواب
هادور على لينك وأحطه ان شاء الله
وكفاية لحد كده
اكيد زهقتوا

اسف على التطويل
____________________________________________________
تحديث : اللينكات : القصيدة كاملة و شرحها

May 12, 2008

كلنا مرضى نفسيين يا عزيزى




الأسبوعين دول الروند بتاع الأمراض النفسية




فعلا أكتر مريض يصعب عليك




أكتر مريض منبوذ من المجتمع




شفت مرضى نفسيين قبل كده فى التليفزيون




بس طلعوا من خيال المخرج


قليل قوى منهم اللى ممكن يأذى


التليفزيون فهم الناس غلط


الناس بقت بتخاف منهم


بدل ما تحاول تقرب منهم بتبعدهم


كده هما بيزودوا فى مرضه




*********




معظم المرضى النفسيين من الطبقة المتوسطة


لأنهم لا منهم طايلين فوق ولا تحت


متعلمين لكن مش لاقيين


متعشمين لكن مفيش فايدة


فخد عندك بقا


إشى إكتئاب


قلق مرضى


فصام


ومن الصدمة يجيله هلع


وفى الآخر يدروش ويسيب دقنه


والناس تعمله بركة


وهو أصلا يا ولداه مسكين


مريض عايز يتعالج




**********




ليه الناس بتخاف تروح للطبيب النفسى


بذمتكم مش كلنا كده عايزين شزلونج ونفضفض


امال إحنا عاملين مدونات ليه


علشان نفضفض


مش معنى انك تروح لطبيب نفسى انك مريض


المفروض كلنا كده نروح لدكاترة بتاعت طب نفسى نفضفض


قبل ما أهالينا يودونا غصب عنا


بعد فعلا ما يكون اللى حصل حصل


فى الأماكن الشعبية الناس بتروح لعم الشيخ


المعالج الشعبى


النصابين دول


الغريبة انهم ممكن يدفعوا أضعاف اللى بيدفعوه للدكتور


علشان يفك العمل اللى الراجل وهمه انه موجود


أنا مش عارف فلسفة الطبيب النفسى عندنا ضايعة ليه


إحنا فعلا فى أمس الحاجة ليه فى الوقت الحالى


الذهول اللى فى عيون الناس


الناس كل واحد بيكلم نفسه


المفروض اليومين دول عيادات الدكاترة النفسيين تبقى زحمة


لكن الناس لسه برضه بتخاف من الكلمة ده


ربنا يهدينا


ويرفع عنا البلاء






May 10, 2008

ليه


ليه مابعرفش أقول اللى جوايا

ليه مبقولش للناس اللى بحبهم انى بحبهم

ليه باحب ده واكره ده

ليه لابس قناع خشب

ليه بضايق ناس مش عايز أضايقهم

ليه مشاعرى مدفونة جوايا

ليه باتردد أقولها

ليه ممكن أموت من غير ما أتكلم

ليه أنينى حتى أنا مابسمعوش

ليه غرقان فى الإبهام

ليه باهتم بالتفاصيل

ليه حاسس انى مستنى حاجة- ايه هيا مش عارف-

ليه بيضايقنى الإنتظار

ليه خايف من بكرة

ليه بارسم خطط لبكرة

ليه بيعملو فينا كده

ليه أحسن حاجة نعرفها الصمت

ليه احنا مش زى اليابان

ليه كل الخايبين اتلمو هنا

ليه بيجيبوا تامر أمين - شُرطة- فى البيت بيتك

ليه

وليه

وليه

وليه فى ناس بتدخل المدونة ماتعلقش

وصبح صبح

May 9, 2008

تحسس قفاك

"الأجرة 75 قرش يا جماعة"


ده كان سواق الميكروباص

قبل ما يكمل كلامه الراجل اللى ورا طلع صوت عميق من قاع الأنف


وقال كلمة إعتراضية بيقولها الإسكندرانية معناها أرفض حدوث هذا

وقاله "ليييييييييييييييييييه مش كانت 50 قرش"

وانطلقت صيحات استنكار مماثلة من باقى الناس

السواق ضرب فرامل كربسنا فوق بعض

وطلع ورقة كده وقالنا
" المنشور بتاع الأسعار أهويا جماعة الجازغلى"

الراجل اللى ورا -هو بعينه- بيقول
يعنى ياخدوا منا العلاوة قبل ما يدوهالنا

مش عايزينها منهم بس يسيبونا فى حالنا حكومة بنت ............... وبلد........ وريس ............

الفراغات ده مكانها ألفاظ بذيئة - حلوة بذيئة ده -

الراجل اللى قدامى علطول بيقول أوعى يكونو هيغلو اللحمة كمان

الراجل اللى جانبى مات على نفسه من الضحك وقال لحمة ايه هيا فين ده

هو احنا بنشوفها أصلا يا دوب باسمع عنها سمع خير



اللى فات ده موقف كده حصل امبارح

معرفتش اكتب غيره لأن باقى المواقف ألفاظها مبتذلة وقميئة -ايه قميئة ده -

الناس مذهولة من اللى حصل

كل واحد عرف انه انضحك عليه

ونفسه يمسك اللى عمل فيه كده

بس المرة ده القفا اللى خدناه كان شديد شوية

الريس قلهم هنديهم بزازة نسكتهم بيها

الناس المساكين والمنافقين برضه طلعوا يقولوا

هشكنا وبشتكنا يا ريس

ده انتا رئيس والنعمة كويس

والحكومة قالت تحت أمرك بس لو معاها ضربة على القفا ماتضرش

اللى لسه ماطلعهوش بالشمال أخدوه باليمين

كام مليون استفادوا من العلاوة ده
وكام مليون تتضرر منها

العلاوة طلعت علاوة على ماسبق سنستكمل عملية اقفاركم مش افقاركم

لأن هما فقرونا من سنين

قاللو اكده بنساعد محدودى الدخل محدودى الدخل

اه علشان يخلوهم مدعوكى الدخل
يعنى ماعرفوش يصبروا شهر كده وبعدين يدونا القفا

المهم احنا ساكتين ليه

أهم زودوا عدد اللى بيضربونا على قفانا - حسب النكتة - اللى مايعرفهاش يقوللى وأنا أقولها له فى الخباثة

القفا ورن خلاص

يا جماعة من أُستغضب فلم يغضب فهو حمار

أنا مش عارف هما متوقعين رد فعلنا ايه

هما أكيد قاللوا دول هيولولوا شوية وبعدين يسكوتوا

اااااااااااااااااااااااه يانى - أدينى كتبتها-

لأنى مش قادر أقولها

يا ريت تيجى على كده

ده الناس بتقول يا ريت تيجى على قد كده

بيرضوا بقليله

بس لسه و لسه

البلد ده مش هتفوق إلا على كارثة

تيجى خمناشر تمناشر ريختر

أصل القفا ده كان بتاع تكعة ريختر

لكن عندما تأتى الصاعقة سيفيق الناس

للأسف أرادونا خانعين فكنا

أرادونا مذلولين فكنا

أرادونا مفلسين فمكدبناش خبر

ساقونا إلى الهاوية فقفزنا فيها

اتى أشتم رائحته العطنة

انها تزيد يوما بعد يوم

رائحة قاع الهاوية

الذى نقترب منه

ربنا يستر

يا رب من ولى من أمرنا شئ فشق علينا فاشدد عليه
اللهم إنا نبرأ اليك مما يفعل هؤلاء

ربنا لا تؤاخذنا بما فعل سفهاؤنا

كفاية نكد على كده

وسلملى على المترو - إلا بالحق غلى وللا لسه-

وتحيا مصر بتاعتنا مش بتاعتهم

وصبح صبح يا عم الحاج



May 3, 2008

"ماجيتوش ليه مش كنتو تيجو"


يوم الأربعاء الماضى كان آخر يوم فى راوند الكارديو -القلب يعنى- ومعنى كلمة آخر يوم فى الروند إن فى امتحان.


المشكلة بقى ان قسم القلب معروف انه مافيهوش حضور لأن الدكاترة مش فاضيين ومابتشرحش فأول يوم فى الروند - من أسبوعين يعنى- عملت فيها مجتهد وقولت أروح كده أسلم عليهم وأشوف ايه النظام وكان الغريب انى لقيت المحاضر موجود بس أنا كنت لوحدى فطبعا مارضييش يشرح.


روحت بعد كام يوم على أساس يكون أى حد من زملائى نوى يحضر أو حاجة وناخدلنا محاضرة. طبعا مالقيتش حد ولقيت أحد أعضاء هيئة التدريس وكان مذهول انه شافنى وقاللى
" يا بنى ايه اللى جابك هو فى حد بيحضر الخايبيبن بس هما اللى بيحضروا "
وسألنى عن تقديرتى ولما لقانى كويس
قاللى " يبقى مذاكر وجى تضيع وقتك"
طبعا أنا ماكتنش عارف أرد عليه فقولتله "يعنى أمشى"
قاللى " أصل محدش هيشرح لواحد بس روّح ذاكر يابنى" وبعدين قاللى "بس مادام جيت" قولت فى نفسى خلاص بقى هيشرحلى لقيته قال " لازم تاخد واجبك اقعد اشرب الشاى يا راجل لازم نوّجب معاك".
طبعا سعادته بيتريق لأنى بحضر
أخدت بعضى وروحت أضرب أخماسا فى أسداس
وحلفت ما أنا رايح تانىِ


المهم يوم الأربعاء كان يوم الإمتحان


والله أنا كنت شاكك انهم هيمتحتنونا


وماكنتش فاهم هيمتحنونا فى ايه أذا كان هما ماشرحوش حاجة أصلا


وطبعا فى اليوم ده الطلبة حضرت


دخل الدكتورالمدرج - اللى هو أحقر مدرج شوفته فى حياتى- بعد انتظار


وقال "كان نفسنا نشوفكو ونعلمكوا لكن النهاردة الإمتحان وهو سؤال واحد علشان نعلمكم بيه "

وكتب فعلا السؤال على السبورة

وكان سؤال فعلا مايتحلش

الظاهر انهم كانوا عايزين يعلمونا الأدب- طبعا مش كارديو-
تصدقوا انهم سابونا ومشيوا والطلبة معرفتش تغش حتى من الكتاب.

وطلع حظنا النحس ان الأساتذة كانوا منتظمين وكانوا بيجوا كل يوم

اشمعنى أنا معرفش.

ياللا يعنى جت عليهم من أول السنة وهما بيروقونا فى امتحانات الروندات.


المهم هو الراجل اللى قاللى روح جه بص علينا فى الإمتحان و كان بيضحك أكيد طبعا علينا.
الظاهر إن الراجل ده غرر بيا.
وصبح صبح يا عم الحاج خربانة من فوقيها لتحتيها.